Lynbreuk
<br /> plaas 'n lynbreuk in 'n reël teks
In die meeste gevalle is die paragraaf merker (<p>) - wat 'n reël oorslaan voor dit 'n nuwe reël begin - die beste manier om teks op te deel in leesbare eenhede. Daar mag egter gevalle wees wanneer jy 'n reël wil eindig en 'n nuwe wil begin sonder om 'n reël oor te slaan tussenin. In hierdie gevalle kan jy van 'n lynbreuk gebruik maak met die <br />-merker.
Die HTML vir 'n gedig wat van lynbreuke gebruik maak, lyk soos volg:
<p>Swart is die nag<br />
Donker is die maan<br />
Op die oewer van Zambesi<br />
Het Amakeia gestaan</p>
|
en dit sal soos volg vertoon:
Swart is die nag
Donker is die maan
Op die oewer van Zambesi
Het Amakeia gestaan
|
Sien jy die spasie en vorentoeskuinsstreep binne die merker? Tot en met HTML 3.2 sou die merker net <br> gewees het. Dit was nie nodig om die <br>-merker te eindig nie. Nuwe ontwikkelinge in HTML soos HTML4.1+ en XHTML1.0+ vereis egter dat alle merkers geëindig word. <br /> word korrek deur ouer webblaaiers geïnterpreteer en dit voldoen aan die vereistes vir nuwe generasie webblaaiers. Gebruik dit dus maar so, dan sal jou webblaaie versoenbaar wees met nuwe generasie webblaaiers.
OM OP TE SOM:
- <br /> plaas 'n lynbreuk in 'n reël teks
- <br /> eindig 'n reël en begin 'n nuwe reël sonder om 'n reël oor te slaan tussenin.
|
Indien jy voel jy het die <br>-merker onder die knie, gaan gerus na die volgende les oor blokaanhalings.
| 