Immigrasie
|
|
|
Immigrasie beteken om jou geboorteland te verlaat en jou elders te gaan vestig. Daar is baie redes waarom mense immigreer, wat wissel van politiek, na ekonomies na misdaad. Maak nie saak wat jou rede is nie, immigrasie bly 'n ingrypende verandering wat permanente gevolge op jou lewe het. Daar is baie verhale van mense wat die land verlaat het, net om na 'n tyd weer terug te keer en te vertel hoe aaklig hulle ervaring was. Daar is ook net so baie wat uiters gelukkig is in die nuwe land waar hulle hulself vestig.
Om suksesvol te immigreer, is daar 'n klompie stappe waardeur mens moet gaan:
- Besluit
- Motiveer
- Positief
- Waarheen
- Inligting
Neem 'n bewustelike besluit dat jy wil immigreer. Gaan sit en dink oor alles wat jou tot hierdie besluit gebring het. Jy moet minstens 200% seker wees van jou besluit voordat jy voortgaan met die immigrasieproses, anders gaan jy ook dit "nie maak nie"
Motiveer jou besluit om te immigreer BAIE duidelik. Skryf die redes neer waarom jy dit wil doen. Immigrasie is 'n LANG proses, tot solank as twee jaar vandat jy jou aansoek om emigrasie ingedien het, tot jy uiteindelik in jou nuwe land aankom. Deur hierdie tyd gaan jy baie teenkanting ondervind van jou familie en vriende af. Daarom is dit belangrik om presies te weet waarom jy wil immigreer. Moet ook nie jou lys van redes weggooi na 'n week nie, bewaar daardie lys soos goud. Wanneer jy in jou nuwe land aankom, gaan jy baie maal moedeloos raak en terugverlang "huistoe". Dit is dan wanneer jy na hierdie lys van jou moet kyk om jouself te motiveer om in die nuwe land te bly en nie terug te keer met verhale van hoe sleg dit was nie.
Wees positief! Wees so positief dat jy donker kamers verlig! 'n Negatiewe houding gaan jou laat bly net waar jy is. Deur die hele proses gaan jy baie probleme teenkom, sien dit as uitdagings en pak dit met 'n positiewe houding aan. Wanneer jy in jou nuwe land aangekom het is dit die heel belangrikste om positief te wees. As jy voortdurend wil kla omdat dit 80% van die tyd reën in London, gaan jy uiters misrabel wees en verander in 'n "Whenwe". Wees eerder positief en sê dankie omdat jy reën mag ervaar en nie droogte nie.
Versamel eers genoeg inligting oor verskillende lande om te kan besluit waarheen jy wil gaan. Moenie jouself beperk tot net een land nie, kies drie of vier verskillende lande en spits jou inligtingsoektog op daardie lande toe. Die besluit van waarheen gaan beïnvloed word deur faktore soos ekonomiese welvaart, lewensomstandighede, klimaat, en vele meer, maar die belangrikste gaan wees die beskikbaarheid van werk. Tensy jy ekonomies onafhanklik is, gaan jou uiteindelike bestemming bepaal word deur die land waar jy kan werk kry. Moet ook nie jou ore uitleen aan ander mense se negatiewe ervarings oor 'n spesifieke land nie, jou persoonlike omstandighede en houding gaan bepaal hoe jy 'n land ervaar.
Kry inligting. Inligting oor die proses van immigrasie, inligting oor verskillende moontlike bestemmings. Moenie jou beperk tot net een land nie. Onthou, die wêreld is groot en daar is baie moontlike bestemmings. Elke land het ook sy eie emigrasie beleid, reëls en regulasies. Jy mag dalk nie kwalifiseer vir die land wat jy jou hart op gesit het nie. Kyk dus na verskillende lande waarheen jy moontlik kan gaan. Benut elke moontlike bron van inligting en versamel soveel as moontlik om jou besluit op te baseer. Gebruik veral die Internet en e-pos om inligting te bekom. Kontak enige persoon wat jy ken wat in 'n ander land is of was en vra inligting oor die ekonmiese, politieke en lewenstoestande in daardie land.
Daar word ook baie gratis seminare oor emigrasie aangebied, gaan woon so 'n seminaar by ter wille van die inligting wat jy daar gaan kry. Jy hoef ook nie van 'n emigrasie agentskap gebruik te maak nie, jy kan alles self hanteer. 'n Agentskap gaan jou 'n klomp geld uit die sak jaag wat jy baie beter vir ander dinge kan aanwend. 'n Agentskap kan ook nie die proses vinniger afhandel as wat jy dit self kan doen nie. As jy wel van 'n agentskap gebruik maak, moet jy nog steeds self al die nodige inligting versamel, vorms invul en indien en so meer, net soos wanneer jy alles op jou eie sou hanteer.
'n Handige bron van inligting is ander mense wat ook besig is om te immigreer of reeds geïmmigreer het. Om sulke mense bymekaar te bring het ek 'n e-pos groep vir die spesifieke doel gestig. Die groep funksioneer deur middel van e-pos wat na 'n sentrale adres gestuur word en van daar na die lede van die groep versprei word. Die diens word verskaf deur Yahoo Groups en is gratis.
As jy by Relocate wil aansluit:
Stuur 'n leë e-pos aan [email protected]
Om 'n boodskap aan die groep te stuur nadat jy ingeskryf het, stuur dit aan [email protected]
Indien jy nie meer pos van die groep wil ontvang nie, kan jy jou lidmaatskap kanselleer deur 'n leë e-pos te stuur aan [email protected]
Om vorige gesprekke van die groep te gaan lees
Nadat jy ingeskryf het by die groep, kan jy vorige gesprekke gaan lees by http://www.groups.yahoo.com/list/relocate
| Kliek hier om my te kontak |