Kommentaar-merker
<!-- --> maak 'n spasie vir kommentaar
Die kommentaar-merker doen dit wat die naam impliseer. Dit skep 'n spasie in jou HTML dokument wat nie vertoon word nie, waar jy vir jouself kommentaar kan skryf. Aangesien die kommentaar nie vertoon gaan word nie, kan jy die spasie gebruik om notas te maak oor wat die HTML-kode doen. Onthou egter dat die kommentaar sigbaar sal wees vir enige een wat na die bronkode van jou dokument kyk.
Die kommentaar-merker begin met 'n linkerhoekhakie, gevolg deur 'n uitroepteken, twee strepies en 'n spasie. Dit word geëindig met 'n spasie, twee strepies en 'n regterhoekhakie. Kommentaar-merkers lyk soos volg:
<!-- die p-merker begin 'n nuwe
paragraaf -->
|
en sal soos volg vertoon... uhmm... nee, ek kan jou nie wys hoe dit gaan lyk nie, want dit word nie vertoon nie! Jy sal maar net my woord moet neem hiervoor. Of gaan skryf 'n kommentaar-merker in jou HTML-dokument en kyk vir jouself of dit vertoon of nie.
Die kommentaar-merker kan op enige plek binne jou HTML-dokument gebruik word, selfs buite die <html>- en </html>-merkers, aangesien dit nie vertoon word nie. Let ook op dat die spasies tussen die <!-- en jou kommentaar, en tussen jou kommentaar en die --> verpligtend is.
OM OP TE SOM:
- <!-- --> maak 'n spasie vir kommentaar.
- Die kommentaar word nie vertoon nie.
- Die kommentaar-merker kan op enige plek binne jou HTML-dokument gebruik word.
- Die spasies tussen die <!-- en jou kommentaar, en tussen jou kommentaar en die --> is verpligtend.
|
Indien jy voel jy het die kommentaar-merker onder die knie, gaan gerus na die volgende les oor hoofopskrifte.
| 