|
Extracción de mineral en Casalonga,
Teo. (c) H. Neira 1999
A
economía
Respecto da economía dos concellos da Ulla indicaremos
a súa gran dependencia da veciña cidade de Santiago,
pois unha parte dos traballadores e traballadoras trasládanse
a Compostela diariamente. A vila da Estrada representa outro
importante centro de atracción de man de obra de toda
a comarca.
O resto da poboación activa traballa no propio Val
e dedícase fundamentalmente a actividades relacionadas
directa ou indirectamente co aproveitamento dos recursos do medio:
- O sector primario ocupa
a unha boa parte da poboación, principalmente a agricultura
e a gandería, actividades moitas veces compaxinadas; nas
parroquias próximas ó río cobra especial
importancia a viticultura, e ultimamente apareceron empresas
de floricultura que posúen grandes invernadoiros e viveiros.
Unha boa parte da producción agrícola comercialízase
en Madrid e en Santiago.
Logo, temos na Serra do Pico "a mellor mina de seixo metalúrxico
do mundo", coñecida como Serrabal, e, como parte
da súa producción é de áridos, materiais
destinados á construcción, tamén podemos
dicir que é unha canteira; a explotación realízase
a ceo aberto. Anteriormente o mesmo filón explotouse na
mina do Castelo en Cira.
Outra canteira importante está en Casalonga (Teo) e a
súa producción dedícase en parte á
fabricación de cementos e formigóns.
- O sector secundario tamén
ten certa importancia, pois ás industrias de transformación
de productos alimenticios (productos cárnicos, polos,
productos lácteos como manteiga e queixos e, cómo
non, productos vitivinícolas coma o viño e a augardente)
súmanse varios serradoiros que aproveitan a riqueza forestal;
parte da madeira que producen é transformada en mobles
polas numerosas fábricas do sector asentadas na Estrada.
A construcción ocupa
tamén a gran número de traballadores, debido ó
aumento de edificacións que se experimentou nestes concellos
nos últimos anos.
- O sector servicios
está representado principalmente por comercios
de alimentación que fornecen as despensas dos habitantes
da comarca, establecementos para venda dos mobles de producción
local e almacéns que lles subministran ós agricultores
todo o que poidan necesitar, así como todo tipo de establecementos
e oficinas dos que se acostuman atopar en vilas de tamaño
medio, e polo que se refire á facturación, destacan
empresas como os concesionarios de automóbiles ou as de
distribución de combustibles. Existen ademais empresas
que se dedican á exportación dos productos agrícolas
a outras comunidades. Recentemente cobrou importancia a hostalería,
no tocante ás casas rurais, ó redor dunha vintena
en toda a comarca, e non hai que esquecer os numerosos bares
e restaurantes. O sector terciario ten unha importancia maior
nos núcleos máis desenvolvidos como Os Tilos ou
A Estrada, con todo tipo de establecementos capaces de satisfacer
a maioría das demandas da poboación.
EMPRESAS
Segundo os datos da guía "5.000 empresas de Galicia
y 250 del Norte de Portugal", publicada por Editorial Compostela
(O Correo Galego)
en 1999, nos catro concellos analizados, durante o ano 1997 soamente
sete empresas sobrepasaron os mil millóns de pesetas de
facturación. Estas foron: Automóviles Gestoso,
S.L. (A Estrada, 1986,9 millóns); Hierros Diego, S.L.
(A Estrada, 1860,3 millóns), Cash Froiz La Estrada, S.A.
(A Estrada, 1.515,5 millóns) e Carburantes Acibro, S.L.
(A Estrada, 1.199,2 millóns); Núñez Galicia,
S.A. (Teo, 1.768,5 millóns); Gasóleo Calefacción
S.L. (Teo, 1.050,1 millóns) e Rivadulla S.L. (Vedra, 1.506,7
millóns). A maior empresa de Boqueixón, Santos
Cocina y Baño, S.L., facturou 997,3 millóns de
pesetas.
Finalmente, dicir que entre esas 5.000 empresas de Galicia que
máis facturaron, 54 teñen a súa sede nos
catro concellos analizados, das cales 24 están na Estrada,
1 en Boqueixón, 20 en Teo e 9 en Vedra.
Escríbanos a [email protected]
© A Ulla, Comarca Virtual 1997-2002. Tódolos dereitos
reservados.
|