|
|
Chamador nun pazo na Ponte Ulla. (c)
D. Janeiro 1998
O
patrimonio cultural
Coa esperanza de que con iso se aprenda a considerar mellor
o seu valor, quixemos dar a coñecer nestas páxinas
unha listaxe o máis completa posible de bens de interese
cultural e histórico nos catro concellos nos que se asenta
o Val do Ulla. Pregámoslle a calquera persoa que descubra
a falta dalgún ou crea que hai outros que se poidan engadir
á lista, contacten co Concello correspondente para engadilo
ó inventario oficial, ou ben connosco a través
do correo electrónico en [email protected],
desde onde faremos chegar esa suxestión. Debe terse en
conta que, a pesar de que un ben cultural non apareza dentro
desta relación, iso non quere dicir que non estea protexido,
xa que existen leis xenéricas que obrigan a conservar,
de forma global, por exemplo os cruceiros de máis de cen
anos.
Actualmente, a lei protexe de xeito especial os edificios e construccións
declarados bens culturais ou bens arqueolóxicos, e obriga
a seguir certas normas de harmonización nas construccións
próximas. As pontes, fontes, cruceiros, monumentos escultóricos
e equiparables dispoñen dunha distancia de protección
de 15 metros nas que é obrigado non alterar o contorno,
excepto para axardinamento, adecentamento ou iluminación
ornamental. Os restos arqueolóxicos e vestixios históricos
están protexidos no perímetro da propiedade onde
estean situados, en solo urbano, e para o caso de solo non urbano
debe respectarse unha distancia de protección de 200 metros.
Para realizar obras na zona debe dispoñerse do informe
da Comisión Provincial de Patrimonio.
Para elaborar esta listaxe de bens patrimoniais e cultural empregamos
as seguintes fontes: listaxe facilitada polo Concello de Boqueixón
e traballo da Asociación Cultural Raíña
Lupa deste concello sobre os muíños que se encontran
no mesmo; listaxe facilitada polo Concello da Estrada, o libro
"A Estrada Rural" de Manuel Reimóndez Portela
e unha relación que nos cedeu o ex alcalde da Estrada
Mario Blanco Fuentes; listaxe facilitada polo Concello de Teo
e listaxe de bens inventariados publicada no DOG do 11 de xullo
de 1991; listaxe de bens protexidos facilitada polo Concello
de Vedra e publicada no Boletín Oficial da Provincia da
Coruña o 17 de outubro de 1995; Inventario do Patrimonio
Histórico-Artístico do Concello de Vedra no Diario
Oficial de Galicia do 29 de xaneiro de 1990. A todo este material
engadíronse datos propios, pero aínda así
faltan por engadir algúns bens que están aínda
por ser estudiados e inventariados.
Pontes e fontes de entidade menor non se inclúen por falta
de datos sobre a súa antigüidade. Os muíños
do concello de Vedra son ó redor de cen e non están
incluídos no inventario de bens culturais publicado no
BOP, razón pola que tampouco se sinalan na listaxe, aínda
que é a nosa intención incluílos no futuro
na páxina web sobre o Val do Ulla.
En canto ó antigo Camiño Real, polo que circulaban
os peregrinos procedentes de Ourense (prolongación da
Vía da Prata), consérvase con maior ou menor fortuna,
podendo encontrarse o seu itinerario concreto no libro "El
Camino a Santiago por el Sudeste". Na actualidade, emprendéronse
diversas accións para a súa delimitación
e protección. Nós falamos del no capítulo
dedicado ós Camiños de Santiago.
Concello de Boqueixón
Concello da Estrada
Concello de Teo
Concello de Vedra
Escríbanos a [email protected]
© A Ulla, Comarca Virtual 1997-2002. Tódolos dereitos
reservados.
|
