|
Primavera do 2000. As árbores
comezan a botar follas coa calor do sol. (c) H. Neira 2000
O
clima
Primeiramente, indicar que o val do Ulla goza dun clima oceánico
húmido, o que quere dicir que debido á acción
moderadora do océano Atlántico, que fai diminuír
a oscilación térmica e aporta abundantes precipitacións,
a zona goza de invernos suaves e veráns non extremadamente
cálidos.
A temperatura media anual oscila entre os doce ou trece graos
centígrados; as temperaturas medias mensuais oscilan entre
os oito graos de xaneiro ou febreiro e os dezaoito de xullo ou
agosto.
As precipitacións anuais superan facilmente os 1.700 mm
e mesmo os 2.000 mm, que se reparten durante uns cento cincuenta
días: cincuenta no inverno, corenta na primavera, vinte
no verán e corenta no outono. As "precipitacións
sólidas", isto é, saravia, pedrizo ou neve
son moi escasas, presentándose só un ou dous días,
ou ningún, ó longo de todo o ano, circunstancia
favorable para agricultores e gandeiros. Máis frecuentes,
lamentablemente, son as xeadas, que teñen lugar, principalmente,
de novembro a febreiro, pero que de se presentaren máis
tarde, poden provocarlles importantes perdas ós agricultores.
Entre os días que chove e os que están
nubrados, quedan a penas noventa días totalmente despexados,
a maioría nos meses de verán, o que explica que,
malia todos os seus esforzos, os agricultores da Ulla non consigan
froitas do tamaño das que se obteñen en zonas de
clima mediterráneo, con máis horas de insolación,
como Valencia ou Murcia; ó diminuír o número
de horas de luz tamén diminúe a intensidade da
fotosíntese, crecendo as plantas máis lentamente
e dando froitos máis pequenos; isto provoca tamén
un baixo contido en azucre nas uvas, de modo que o resultado
da fermentación do mosto é un viño de baixo
contido en alcol, moito menos que os viños de Andalucía,
coma o Xerez.
Paisaxe no concello de Vedra. (c)
C. Neira 1998
Escríbanos a [email protected]
© A Ulla, Comarca Virtual 1997-2002. Tódolos dereitos
reservados.
|