|
|||
Uren Banalerroaren Ibilbide Handia. Sarrera
|
|||
Uren Banalerroaren Ibilbide Handia amaitu dugu. Atzean geratu dira Euskal Herrian zehar emandako 15 hilabete, Berberana izeneko herri ttipi batetik hasi ginenetik.
Izotza zegoen; eta Gaztelako ohiko hotz sarkorra egiten zuen. Herrixkatik, oso ezaguna ez den eta Burgos eta Araba arteko mugan dagoen Peña Erea izeneko mendi baterantz abiatu ginen, Ibilbide Handiaren hasiera ematen zion tontorrerantz, alegia. Peña Erea kaskoak Gibijo Mendirako ateak irekitzen zizkigun, bertan dauden hainbat putzu, otsotegi, paisaje idor eta latza ... erakutsiz. Harrez geroztik, mendigune garrantzitsu asko zeharkatu dugu gure ibilaldietan barrena, Gorbeia, Anboto, Aizkorri, Saioa, Irati, Abodi ... besteak beste, beti Kantauri eta Mediterraniar itsasoetarantz doazen uren banalerroa jarraituz. Banalerroa bilatuz, hainbat eta hainbat mendate, ataka eta lepo iragan dugu gure bidean, batzuk lehen mailako errepidez zeharkaturik eta beste batzuk aldiz, antigoaletik erabilitako gurpidez eta zidorrez, Urdaite, Larrañe, Organbide ... esaterako. Ibilbidearen paisajearen aniztasuna nabarmena da. Eibarko Kirol Elkarteak, Durangoko Tabira Elkarteak eta Feliu eta Peña Santiago autoreek beren ikuspegi pertsonala eman nahi izan dute ibilbide honi buruz.
Ostadar eta Goierri taldeok, aurreko guztiek egindakoarekin erabat egokitzen ez den baina era berean bakoitzarekin zerikusi handia ere duen interpretazioa egin dugu Ez dira gutxi izan orain arte herriko mendizaleok etapaz etapa burutu ditugun ibilaldiak, "Bost Hiriburuen Ibilbide Handia", "Gipuzkoako Bira", "Erromesaren Ibilbidea", "Uren Banalerroaren Ibilbide Handia" ..., eta gehiago izan litezke lagunen batek mapak ikertzeko, ibilaldiak prestatzeko eta irteerak gidatzeko lana bere gain hartuko balu. Azkenik, bi taldeok Jonmikel Intsausti biziki eskertu nahi dugu, etapaz etapa erabilitako testuen osaketan eta liburuxka honen bilketa lanetan parte hartu duelako. 1996ko apirila. |
|||
|
|||
Orri honetako euskarazko testuak IXA Taldeko
XUXEN Zuzentzaile/Egiaztatzailea erabiliz zuzendu dira. |
|||
© Copyright Ostadar M. T.
ostadar.geo@yahoo.com Jai-alai behea 4, 20700 Zumarraga (Gipuzkoa) Euskal Herria - The Basque Country Tlf.: (+34) 943.72.33.85 |