Ji Abdulmecîd Melek re hevalê biçûkaniya min li gundê Doda
Nizanim çilo vê nîvrojê
Huşê min firiya çû Doda?
Gundê ji hezarê salan ve,
Bi xanîk û manîk ava,
Dîdevanê bûna min
Û jiyana sereta...
Gundê bi dewar, sewal û
Keriyê pez;
Bi car, newal û
Dar û rez;
Gundê ku li ser
Du şivên hesin
Maye raketî;
Ji jor ve bi nav bûye
Serxet
Ji jêr ve bi nav bûye
Binxet
* * *
Doda;
Bêndera kul, êş û janên min...
Stirana:
(Bavê Syero û Derwêşê Evdî )
Û evîna min;
Hêlîna pîr û kal, jin û mêr,
Keç û xort û tev
Gundîyên min.
* * *
Doda;
Ji pêncî salî ve,
Xwe di nava min de
Dipêçe;
Ji danheva pûş, qîvar û şoqilan...
Ji ser ( girê Qereçe );
Ta bi henek û laqirdîyên
( Seyid Xelîl û Şêr Elî )
yên ku tew ji hiş naçe...
* * *
Doda;
Tirabêlik û xwêdana
Ku ez pê hatime şûştin...
Bêhinvedana şivanan
Li ( guhera Ademo ) û
Rawestandin;
Leza bêrîvanan ta bi
( Guhjîka Ehmê ) û
Pez dotin;
Xwêdana xebatkarên
( Besta zixur û Duavê ) û
Qûm firotin;
Civata her êvar
Li ser banê gir
Û şor û gotin;
Çîrokên jin û jinbiyan
Li ser tenûrê
Û qal û qult û şerkirin;
Serpêhatiyên apê min ( Birko )
Û şev buhirandin...
* * *
Ji Doda re,
Ji girê Doda re,
Ji sax û mirîyên Doda re,
Û ji ( Kevrê Birûskê ) re...;
Destan li ser hev datînim,
Temene û xûz dibim,
Xweşî, geşî û pêşketinê
Ji tev gundiyan re dixwazim.
1-Doda: Gundê ku ez lê çêbûme, li ser herdu şivên hesin dikeve di navbera Amûdê û Mêrdînê ji baxerb ve û Qamişlo û Nisêbînê ji bareş ve.
3-Seyd Xelîl û Şêr Elî: Du gundiyên henekçî û feqîr bûn,çi bigotina kesî îşê xwe ji wan ne tanî.
4-Guhera Ademo: Cihê mexelbûna keriyê pez bû.
5-Guhîjka Ehmê: Cihê ku bêrîvanya lê pez didot.
6-Besta Zixur û Duavê: Cihê ku gundiyan lê kar dikir.
7-Birko: Hecî Îbrahîm an sofî Birko,apê bavê min bû,her êvar ji me re çîrok û serpêhatî di gotin.
8-Kevrê birûskê:Kevirekî girovere,li bakurî gund dikeve,çi kesê/a ku birûsk dikeve pişta wî/wê,di roja çarşemê de,çengek xwê,nanekî û pîvazekê bi xwe re dibe û diçe bal wî kevirî,wan datîne ser kevir û pêlekê pişta xwe dide kevir..dibêjin birûsk ji pişta wan derdikeve..
