Ditingki
marhata diiulaon adat ni halak hita sai
tar adong do dipatubegehon na mandok hata
angka umpama ni Ompunta sijolo-jolo tubu.
Ia umpama adong do na jempek jala adong do
na ganjang. Contoh ni umpama na jempek ima
" SISOLI-SOLI
DO ADAT, SIADAPARI GOGO",
Ia umpama na ganjang tarbagi dua doi,
parjolo do jolo tudosan, umpe i asa isi ni
umpama i na sasintongna, contoh ni umpama
na ganjang ima " ANDOR
HALUMPANG MA PATOGU-TOGU LOMBU; SAI
NANGNANG MA I SARIMATUA SAHAT RO DI NA
PAIRING-IRING PAHOMPU"
HATA
PASU-PASU
*
Janji
urat ni eme tu laklak ni simarlasuna, Adat
na denggan na so ra sega, uhum na uli na
so ra muba i, asa manumpak ma Tuhanta i
sinur ma pinahan gabe na niula jala horas
jolma. *
Martumbur ma baringin, mardangka ma
hariara, matorop ma hamu maribur,
matangkang ma juara. *
Sai
marrongkap mai songon bagot, marsibar
songon ambalang, jala sai masigomgoman ma
tondi ni nasida tu na tama.
*
Dangka
ni hariara ma pinangait-ngaithon, tubuma
dihamu anak dohot boru, sai unang ma
panahit-nahithon.
*
Balintang
ma pagabe tumandakhon sitadoan, saut do
hamu gabe asal ma tontong masipaolo-oloan.
*
Dangir-dangir ni batu ma hamu, pandakdahan
ni simbora, Gabe do hamu jala sarimatua
asal ma sai marsada ni roha. *
Ai
na tinapu salaon, salaon situa-tua,
Denggan ma hamu masianju-anjuan asa saut
gabe jala sarimatua.
*
Sai situbu laklak ma hamu situbu singkoru
di dolok ni purbatua, sai tubuan anak ma
hamu tubuan boru, donganmuna sarimatua. *
Hariara
na bolon bahen parlape-lapean, Sai tubu ma
di hamu anak dohot boru na bolas
pangunsandean.
*
Bagot na mandung-dung tu pilo-pilo marajar,
Tading ma antong na lungun, sai roma na
jagar. *
Sahat-sahat
ni soluma sahat tu bontean, Sahat ma hamu
tu parhorasan, sahat tu panggaben.
ANGKA
UMPAMA NA MARRAGAM
*
Tuat
ma na dolok martungkot sialagundi, adat ni
ompunta sijolo-jolo tubu siihuttonon ni na
di pidi.
*
Sinuan
bulu sibahen nalas, Sinuan uhum sibaen na
horas.
*
Muba dolok muba duhutna, muba luat sai
adong do muba adatna. *
Eme na masak di gagat ursa , ia i namasa
ima di ula. *
Aek godang aek laut, dos niroha sibahen
nasaut *
Sori
manungkun sori mandapot, sai matua
marpanungkun tu na nidapot.
*
Tangan do botohon, ujungna jari-jari,
Bangko nihata si dohonon, asal ma jumolo
marsatabi. *
Ramba na poso na so tubuan lata, halak na
poso na so umboto hata. *
Tampuk ni sibaganding di dolok ni
pangiringan, horas ma hamu na marhaha maranggi, sai
masipairing-iringan. *
Bola-bola
ni tangan, sitongka i bolahononhon,
bola-bola ni halak, sitongka i
tangihononhon.
*
Tinallik randorung bontar gotana, Dos do
anak dohot boru nang pe pulik margana, ai
dompak marmeme anak, dompak do tong
marmeme boru, andung ni anak sabulan di
dalan, andung ni boru sataon. *
Habang leang-leang songgop tu parapian,
Bolak ni rosu angka na marpariban, sai
masitopot-topotan songon pidong
leang-leang. *
Na niida ni mata paula so niida, na binege
ni pinggol
paula so ni bege.
sam
|