Kurdiya min
Zarê zêrîn
Şana devê min
Derya bêbinî
Rêya min a bêdawî
Tu
Lorîka diya min
Jîn û jiyana bav û kalên min
Xwîna laşê min
Çav û gav
Mêjî
Hizr û ramana min
Bi te radizim
Radibim bi te
Bi te ye girî û şîna min
Û şahiya min bi te ye
Kurdiya min
Zarê min
Şana hingivîn
Bi te ye strana min
Dîlok û govenda min
Qîr û hawara min
Bi te ye bi te
Bi te ye sond û peymana min
Hêrs û berza min
Gula baxçeyê min
Bihar bi te ye
Bihara min
Bi te şîn tên
Nêrgiz
Şîlan
Berfîn û beybûn
Bi te reng didin
Kesk û sor û zer
Bi te dihile roja min
Heyva min bi te
Û bi te diçirisînin
Stêrên ezmanê min
Tu nebûyayî
Kî bû Ehmedê Xanî
Çi bû Mem Zîn çibû
Kê nas dikir Meleyê Cizîrî
Feqiyê Teyran
Elî Herîrî
Nalî û Qedrîcan
Îro jî
Bi te diherike Dîcle
Ferad bi te pêlan dide
Û bi te dijwar e Xabûr
Bi te bilind in Cûdî û Gabar
Bi te geş in
Amed
Dêrsim
Amêdî û Mehabad
Bi te ye navê Kurd
Kurdistan bi te
Îro
Windaya axa min
Xaliye dîrok
Bin lingan de ye
Çanda min
Tu tenê mayî
Kurdiya min
Diya min
Evîna min
Çêbûm bi te
Bi te dimirim
ÇAR PERÇEYÊN WELAT
Dilo
Dilê bixem
Ez te bikim çend perçe
Te li kû bigerinim
Perçek ji te li Amed
Yê din li Hemrîn
Perçek li Mehabad
Û yek li Efrîn
Lê wiha nabe
Dilê bi êş
Dilê dilodîn
Tu destek goştî
Te nakim perçe
Te nagerînim
Ezê çar perçeyên axa zêrîn
Li te bicivînim
KURD Û DAGIRKER
Çi bibêjim
Fêm nakin ew
Xwe nenas û nezanin
Ketine xew
Dibêjin
Axxx dibêjin
Em bi qijikan nikarin
Tewww tew!
Qijik ji kû karin bi kew
Kew bi kew...
AGIRÊ DIL
Pêt û agir têdeye
Agirdan e
Hêtûne Kurdistan
Di şewite
Di şewite
Lê di dilê min deye Kurdistan
Axxx
Dil di şewite
KURDÊ RAKETÎ
Ma tu denga nakî
Qêrîna dayîkan
Û nalîna zarokên Kurd
Qey çima tu dengan nakî
Bûne bombe teqiyan
Û bûne agir şewitîn
Qîz û xortên bedew
Hê tu dengan nakî
Kurdê raketî
Xewxweşê xemsar
Cîhan hilçenî
Rabû ji piyan
Biguman im tu kerr î
Tu ne kerr bî
Tu ker î
DÎSA AGIR E SONDA MEZIN
Agir...
Agir barandin hovan
Çiya
Gund
Û mal şewitîn
Agir...
Agir barandin egîdan
Dil
Bejin
Û bal şewitîn
Lê dîsa bi agir e
Bi agirdanên Zerdeşt
Bi agirê kûra Kawa
Û bi ronahiya Hurmiz e
Sonda min
Dîsa agir e
Sonda min a mezin
