ஶ்ரீமத்பாகவதமஹாபுராணம் :: எட்டாம் ஸ்கந்தம் :: அத்யாயம் 19.
பகவான் வாமனர் பலியிடம மூன்றடி மண்ணையாசித்தல், பலி வாக்குக் கொடுத்தல் மற்றும் சுக்ராசர்யர் அவனைத் தடுத்தலும்
அத2 ஏகோநவிம்ஶோऽத்2யாய:
ஶ்ரீஶுக உவாச -
இதி வைரோசநேர் வாக்யம் த4ர்மயுக்தம் ஸ ஸூந்ருதம்|
நிஶம்ய ப4க3வான் ப்ரீத: ப்ரதிநந்த்3யேத3மப்3ரவீத்|| 1
ஶ்ரீப4க3வாநுவாச -
வசஸ்தவைதஜ்ஜனதே3வ ஸூந்ருதம்
குலோசிதம் த4ர்மயுதம் யஶஸ்கரம்|
யஸ்ய ப்ரமாணம் ப்4ருக3வ: ஸாம்பராயே
பிதாமஹ: குலவ்ருத்3த4: ப்ரஶாந்த:|| 2
ந ஹ்யேதஸ்மின் குலே கஶ்சித் நி:ஸத்த்வ: க்ருபண: புமான்|
ப்ரத்யாக்2யாதா ப்ரதிஶ்ருத்ய யோ வாதா3தா த்3விஜாதயே|| 3
ந ஸந்தி தீர்தே2 யுதி4 சார்தி2நார்தி2தா:
பராங்முகா2 யே த்வமனஸ்விநோ ந்ருபா:|
யுஷ்மத் குலே யத்3யஶஸாமலேன
ப்ரஹ்ராத3 உத்3பா4தி யதோ2டு3ப: கே2|| 4
யதோ ஜாதோ ஹிரண்யாக்ஷஶ்சரந்நேக இமாம் மஹீம்|
ப்ரதிவீரம் தி3க்3விஜயே நாவிந்த3த க3தா3யுத4:|| 5
யம் விநிர்ஜித்ய க்ருச்ச்2ரேண விஷ்ணு: க்ஷ்மோத்3தா4ர ஆக3தம்|
நாத்மானம் ஜயினம் மேனே தத்3வீர்யம் பூ4ர்யநுஸ்மரன்|| 6
நிஶம்ய தத்3வத4ம் ப்4ராதா ஹிரண்யகஶிபு: புரா|
ஹந்தும் ப்4ராத்ருஹணம் க்ருத்3தோ4 ஜகா3ம நிலயம் ஹரே:|| 7
தமாயாந்தம் ஸமாலோக்ய ஶூலபாணிம் க்ருதாந்தவத்|
சிந்தயாமாஸ காலஜ்ஞோ விஷ்ணுர் மாயாவிநாம் வர:|| 8
யதோ யதோऽஹம் தத்ராஸௌ ம்ருத்யு: ப்ராணப்4ருதாமிவ|
அதோऽஹமஸ்ய ஹ்ருத3யம் ப்ரவேக்ஷ்யாமி பராக்3த்3ருஶ:|| 9
ஏவம் ஸ நிஶ்சித்ய ரிபோ: ஶரீரம்
ஆதா4வதோ நிர்விவிஶே ऽஸுரேந்த்3ர|
ஶ்வாஸாநிலாந்தர்ஹித ஸூக்ஷ்ம தே3ஹஸ்
தத் ப்ராணரந்த்4ரேண விவிக்3நசேதா:|| 10
ஸ தந்நிகேதம் பரிம்ருஶ்ய ஶூன்யம்
அபஶ்யமாந: குபிதோ நநாத3|
க்ஷ்மாம் த்3யாம் தி3ஶ: க2ம் விவரான் ஸமுத்3ரான்
விஷ்ணும் விசின்வன் ந த3த3ர்ஶ வீர:|| 11
அபஶ்யந்நிதி ஹோவாச மயான்விஷ்டமித3ம் ஜக3த்|
ப்4ராத்ருஹா மே க3தோ நூனம் யதோ நாவர்ததே புமான்|| 12
வைராநுப3ந்த4 ஏதாவாநாம்ருத்யோரிஹ தே3ஹிநாம்|
அஜ்ஞான ப்ரப4வோ மன்யு ரஹம்மாநோபப்3ரும்ஹித:|| 13
பிதா ப்ரஹ்லாத3புத்ரஸ்தே தத்3 வித்3வான் த்3விஜவத்ஸல:|
ஸ்வமாயுர் த்3விஜலிங்கே3ப்4யோ தே3வேப்4யோऽதா3த் ஸ யாசித:|| 14
ப4வாநாசரிதான் த4ர்மாநாஸ்தி2தோ க்3ருஹ மேதி4பி4:|
ப்3ராஹ்மணை: பூர்வஜை: ஶூரைரன்யைஶ் சோத்3தா3ம கீர்திபி4:|| 15
தஸ்மாத் த்வத்தோ மஹீமீஷத்3 வ்ருணேऽஹம் வரத3ர்ஷபா4த்|
பதா3னி த்ரீணி தை3த்யேந்த்3ர ஸம்மிதானி பதா3 மம|| 16
நான்யத் தே காமயே ராஜன் வதா3ன்யாஜ்ஜக3தீ3ஶ்வராத்|
நைந: ப்ராப்நோதி வை வித்3வான் யாவத3ர்த2 ப்ரதிக்3ரஹ:|| 17
ஶ்ரீப3லிருவாச -
அஹோ ப்3ராஹ்மணதா3யாத3 வாசஸ்தே வ்ருத்3த4 ஸம்மதா:|
த்வம் பா3லோ பா3லிஶமதி: ஸ்வார்த2ம் ப்ரத்யபு3தோ4 யதா2|| 18
மாம் வசோபி4: ஸமாராத்4ய லோகாநாம் ஏகமீஶ்வரம்|
பத3த்ரயம் வ்ருணீதே யோऽபு3த்3தி4மான் த்3வீபதா3ஶுஷம்|| 19
ந புமான் மாமுபவ்ரஜ்ய பூ4யோ யாசிதுமர்ஹதி|
தஸ்மாத்3 வ்ருத்திகரீம் பூ4மிம் வடோ காமம் ப்ரதீச்ச2 மே|| 20
ஶ்ரீப4க3வாநுவாச -
யாவந்தோ விஷயா: ப்ரேஷ்டா2ஸ்த்ரிலோக்யா மஜிதேந்த்3ரியம்|
ந ஶக்நுவந்தி தே ஸர்வே ப்ரதிபூரயிதும் ந்ருப|| 21
த்ரிபி4: க்ரமை ரஸந்துஷ்டோ த்3வீபேநாபி ந பூர்யதே|
நவவர்ஷ ஸமேதேன ஸப்த த்3வீபவரேச்ச2யா|| 22
ஸப்த த்3வீபாதி4பதயோ ந்ருபா வைன்ய க3யாத3ய:|
அர்தை2: காமைர் க3தா நாந்தம் த்ருஷ்ணாயா இதி ந: ஶ்ருதம்|| 23
யத்3ருச்ச2யோபபன்னேன ஸந்துஷ்டோ வர்ததே ஸுக2ம்|
நாஸந்துஷ்டஸ்த்ரிபி4ர் லோகை ரஜிதாத்மோபஸாதி3தை:|| 24
பும்ஸோऽயம் ஸம்ஸ்ருதேர் ஹேதுரஸந்தோஷோऽர்த2காமயோ:|
யத்3ருச்ச2யோபபன்னேன ஸந்தோஷோ முக்தயே ஸ்ம்ருத:|| 25
யத்3ருச்சா2லாப4 துஷ்டஸ்ய தேஜோ விப்ரஸ்ய வர்த4தே|
தத் ப்ரஶாம்யதி அஸந்தோஷாத3ம்ப4ஸேவாஶுஶுக்ஷணி:|| 26
தஸ்மாத் த்ரீணி பதா3ன்யேவ வ்ருணே த்வத்3 வரத3ர்ஷபா4த்|
ஏதாவதைவ ஸித்3தோ4ऽஹம் வித்தம் யாவத்ப்ரயோஜனம்|| 27
ஶ்ரீஶுக உவாச -
இத்யுக்த: ஸ ஹஸந்நாஹ வாஞ்சா2த: ப்ரதிக்3ருஹ்யதாம்|
வாமநாய மஹீம் தா3தும் ஜக்3ராஹ ஜலபா4ஜனம்|| 28
விஷ்ணவே க்ஷ்மாம் ப்ரதா3ஸ்யந்தமுஶநா அஸுரேஶ்வரம்|
ஜானம்ஶ்சிகீர்ஷிதம் விஷ்ணோ: ஶிஷ்யம் ப்ராஹ விதா3ம் வர:|| 29
ஶ்ரீஶுக்ர உவாச -
ஏஷ வைரோசனே ஸாக்ஷாத்3 ப4க3வான் விஷ்ணு ரவ்யய:|
கஶ்யபாத3தி3தேர் ஜாதோ தே3வாநாம் கார்யஸாத4க:|| 30
ப்ரதிஶ்ருதம் த்வயைதஸ்மை யத3நர்த2மஜானதா|
ந ஸாது4 மன்யே தை3த்யாநாம் மஹாநுபக3தோऽனய:|| 31
ஏஷ தே ஸ்தா2னமைஶ்வர்யம் ஶ்ரியம் தேஜோ யஶ: ஶ்ருதம்|
தா3ஸ்யத்யாச்சி2த்3ய ஶக்ராய மாயாமாணவகோ ஹரி:|| 32
த்ரிபி4: க்ரமை ரிமான் லோகான் விஶ்வகாய: க்ரமிஷ்யதி|
ஸர்வஸ்வம் விஷ்ணவே த3த்வா மூட4 வர்திஷ்யஸே கத2ம்|| 33
க்ரமதோ கா3ம் பதை3கேன த்3விதீயேன தி3வம் விபோ4:|
க2ம் ச காயேன மஹதா தார்தீயஸ்ய குதோ க3தி:|| 34
நிஷ்டா2ம் தே நரகே மன்யே ஹ்யப்ரதா3து: ப்ரதிஶ்ருதம்|
ப்ரதிஶ்ருதஸ்ய யோऽநீஶ: ப்ரதிபாத3யிதும் ப4வான்|| 35
ந தத்3தா3னம் ப்ரஶம்ஸந்தி யேன வ்ருத்திர் விபத்3யதே|
தா3னம் யஜ்ஞஸ்தப: கர்ம லோகே வ்ருத்திமதோ யத:|| 36
த4ர்மாய யஶஸே ऽர்தா2ய காமாய ஸ்வஜநாய ச|
பஞ்சதா4 விப4ஜன் வித்தமிஹாமுத்ர ச மோத3தே|| 37
அத்ராபி ப3ஹ்வ்ருசைர் கீ3தம் ஶ்ருணு மேऽஸுரஸத்தம|
ஸத்யமோமிதி யத் ப்ரோக்தம் யந்நேத்யாஹாந்ருதம் ஹி தத்|| 38
ஸத்யம் புஷ்பப2லம் வித்3யாதா3த்மவ்ருக்ஷஸ்ய கீ3யதே|
வ்ருக்ஷேऽஜீவதி தன்ன ஸ்யாத்3ந்ருதம் மூலமாத்மன:|| 39
தத்3 யதா2 வ்ருக்ஷ உன்மூல: ஶுஷ்யத்யுத்3வர்ததே ऽசிராத்|
ஏவம் நஷ்டாந்ருத: ஸத்3ய ஆத்மா ஶுஷ்யேன்ன ஸம்ஶய:|| 40
பராக்3 ரிக்தமபூர்ணம் வா அக்ஷரம் யத் ததோ3மிதி|
யத் கிஞ்சிதோ3மிதி ப்3ரூயாத் தேன ரிச்யேத வை புமான்|
பி4க்ஷவே ஸர்வமோங்குர்வந் நாலம் காமேன சாத்மனே|| 41
அதை2தத் பூர்ணமப்4யாத்மம் யச்ச நேத்யந்ருதம் வச:|
ஸர்வம் நேத்யந்ருதம் ப்3ரூயாத் ஸ து3ஷ்கீர்தி: ஶ்வஸன் ம்ருத:|| 42
ஸ்த்ரீஷு நர்மவிவாஹே ச வ்ருத்யர்தே2 ப்ராணஸம்கடே|
கோ3 ப்3ராஹ்மணார்தே2 ஹிம்ஸாயாம் நாந்ருதம் ஸ்யாஜ்ஜுகு3ப்ஸிதம்|| 43
|| இதி ஶ்ரீமத்3பா4க3வதே மஹாபுராணே பாரமஹம்ஸ்யாம் ஸம்ஹிதாயாம் அஷ்டமஸ்கந்தே4 வாமன ப்ராது3ர்பா4வே ஏகோநவிம்ஶோऽத்4யாய: || 19 ||
எட்டாம் ஸ்கந்தம் - பத்தொன்பதாம் அத்யாயம் முற்றும்.