ஶ்ரீமத்பாகவதமஹாபுராணம் :: பத்தாம் ஸ்கந்தம் :: அத்யாயம் 22.
வஸ்திராபஹரணம்
அத2 த்3வாவிம்ஶோऽத்4யாய:
ஶ்ரீஶுக உவாச -
ஹேமந்தே ப்ரத2மே மாஸி நந்த3வ்ரஜ குமாரிகா:|
சேருர் ஹவிஷ்யம் பு4ஞ்ஜாநா: காத்யாயன்யர்சநவ்ரதம்|| 1
ஆப்லுத்யாம்ப4ஸி காளிந்த்3யா ஜலாந்தே சோதி3தேऽருணே|
க்ருத்வா ப்ரதிக்ருதிம் தே3வீமானர்சு: ந்ருப ஸைகதீம்|| 2
க3ந்தை4ர் மால்யை: ஸுரபி4பி4ர் ப3லிபி4ர் தூ4பதீ3பகை:|
உச்சாவசைஶ் சோபஹாரை: ப்ரவாள ப2ல தண்டு3லை:|| 3
காத்யாயநி மஹாமாயே மஹாயோகி3ன்யதீ4ஶ்வரி|
நந்த3கோ3பஸுதம் தே3வி பதிம் மே குரு தே நம:|
இதி மந்த்ரம் ஜபந்த்யஸ்தா: பூஜாம் சக்ரு: குமாரிகா:|| 4
ஏவம் மாஸம் வ்ரதம் சேரு: குமார்ய: க்ருஷ்ணசேதஸ:|
ப4த்3ரகாளீம் ஸமாநர்சுர் பூ4யாந் நந்த3ஸுத: பதி:|| 5
ஊஷஸ்யுத்தா2ய கோ3த்ரை: ஸ்வைரன்யோன்யா ப3த்3த4 பா3ஹவ:|
க்ருஷ்ண முச்சைர் ஜகு3ர்யாந்த்ய: காளிந்த்3யாம் ஸ்நாதுமன்வஹம்|| 6
நத்3யா: கதா3சிதா3க3த்ய தீரே நிக்ஷிப்ய பூர்வவத்|
வாஸாம்ஸி க்ருஷ்ணம் கா3யந்த்யோ விஜஹ்ரு: ஸலிலே முதா3|| 7
ப4க3வாம்ஸ்ததத3பி4ப்ரேத்ய க்ருஷ்ணோ யோகே3ஶ்வரேஶ்வர:|
வயஸ்யை ராவ்ருதஸ் தத்ர க3தஸ் தத் கர்மஸித்3த4யே|| 8
தாஸாம் வாஸாம்ஸ்யுபாதா3ய நீபமாருஹ்ய ஸத்வர:|
ஹஸத்3பி4: ப்ரஹஸன் பா3லை: பரிஹாஸ முவாச ஹ|| 9
அத்ராக3த்யாப3லா: காமம் ஸ்வம் ஸ்வம் வாஸ: ப்ரக்3ருஹ்யதாம்|
ஸத்யம் ப்3ரவாணி நோ நர்ம யத்3 யூயம் வ்ரதகர்ஶிதா:|| 10
ந மயோதி3தபூர்வம் வா அந்ருதம் ததி3மே விது3:|
ஏகைகஶ: ப்ரதீச்ச2த்4வம் ஸஹைவேதி ஸுமத்4யமா:|| 11
தஸ்ய தத் க்ஷ்வேலிதம் த்3ருஷ்ட்வா கோ3ப்ய: ப்ரேம பரிப்லுதா:|
வ்ரீடி3தா: ப்ரேக்ஷ்ய சான்யோன்யம் ஜாதஹாஸா ந நிர்யயு:|| 12
ஏவம் ப்3ருவதி கோ3விந்தே3 நர்மணாऽऽக்ஷிப்த சேதஸ:|
ஆகண்ட2மக்3நா: ஶீதோதே3 வேபமாநாஸ்தமப்3ருவன்|| 13
மானயம் போ4: க்ருதா2ஸ்த்வாம் து நந்த3கோ3பஸுதம் ப்ரியம்|
ஜாநீமோऽங்க3 வ்ரஜஶ்லாக்4யம் தே3ஹி வாஸாம்ஸி வேபிதா:|| 14
ஶ்யாமஸுந்த3ர தே தா3ஸ்ய: கரவாம தவோதி3தம்|
தே3ஹி வாஸாம்ஸி த4ர்மஜ்ஞ நோ சேத்3 ராஜ்ஞி ப்3ருவாம ஹே|| 15
ஶ்ரீப4க3வாநுவாச|
ப4வத்யோ யதி3 மே தா3ஸ்யோ மயோக்தம் வா கரிஷ்யத2|
அத்ராக3த்ய ஸ்வ வாஸாம்ஸி ப்ரதீச்ச2ந்து ஶுசிஸ்மிதா:|| 16
ததோ ஜலாஶயாத் ஸர்வா தா3ரிகா: ஶீதவேபிதா:|
பாணிப்4யாம் யோநிமாச்சா2த்3ய ப்ரோத்தேரு: ஶீதகர்ஶிதா:|| 17
ப4க3வாநாஹ தா வீக்ஷ்ய ஶுத்3த4பா4வ ப்ரஸாதி3த:|
ஸ்கந்தே4 நிதா4ய வாஸாம்ஸி ப்ரீத: ப்ரோவாச ஸஸ்மிதம்|| 18
யூயம் விவஸ்த்ரா யத3போ த்4ருதவ்ரதா
வ்யகா3ஹதைதத் தது3 தே3வ ஹேலனம்|
ப3த்3த்4வாஞ்ஜலிம் மூர்த்4ன்யபநுத்தயேம்ऽஹஸ:
க்ருத்வா நமோऽதோ4 வஸனம் ப்ரக்3ருஹ்யதாம்|| 19
இத்யச்யுதேநாபி4ஹிதா வ்ரஜாப3லா
மத்வா விவஸ்த்ராப்லவனம் வ்ரதச்யுதிம்|
தத்பூர்திகாமாஸ் தத3ஶேஷ கர்மணாம்
ஸாக்ஷாத்க்ருதம் நேமுரவத்3யம்ருக்3 யத:|| 20
தாஸ்ததா2வனதா த்3ருஷ்ட்வா ப4க3வான் தே3வகீஸுத:|
வாஸாம்ஸி தாப்4ய: ப்ராயச்ச2த் கருணஸ்தேன தோஷித:|| 21
த்3ருட4ம் ப்ரலப்3தா4ஸ்த்ரபயா ச ஹாபிதா:
ப்ரஸ்தோபி4தா: க்ரீட3நவச்ச காரிதா:|
வஸ்த்ராணி சைவாபஹ்ருதான்யதா2ப்யமும்
தா நாப்4யஸூயன் ப்ரியஸங்க3நிர்வ்ருதா:|| 22
பரிதா4ய ஸ்வவாஸாம்ஸி ப்ரேஷ்ட2 ஸங்க3ம ஸஜ்ஜிதா:|
க்3ருஹீத சித்தா நோ சேலுஸ்தஸ்மின் லஜ்ஜாயிதேக்ஷணா:|| 23
தாஸாம் விஜ்ஞாய ப4க3வான் ஸ்வபாத3ஸ்பர்ஶ காம்யயா|
த்4ருதவ்ரதாநாம் ஸங்கல்பமாஹ தா3மோத3ரோऽப3லா:|| 24
ஸங்கல்போ விதி3த: ஸாத்4வ்யோ ப4வதீநாம் மத3ர்சனம்|
மயாநுமோதி3த: ஸோऽஸௌ ஸத்யோ ப4விதுமர்ஹதி|| 25
ந மய்யாவேஶிததி4யாம் காம: காமாய கல்பதே|
ப4ர்ஜிதா க்வதி2தா தா4நா ப்ராயோ பீ3ஜாய நேஷ்யதே|| 26
யாதாப3லா வ்ரஜம் ஸித்3தா4 மயேமா ரம்ஸ்யதா2 க்ஷபா:|
யது3த்3தி3ஶ்ய வ்ரதமித3ம் சேருரார்யார்சனம் ஸதீ:|| 27
ஶ்ரீஶுக உவாச|
இத்யாதி3ஷ்டா ப4க3வதா லப்3த4காமா: குமாரிகா:|
த்4யாயந்த்யஸ்தத் பதா3ம்போ4ஜம் க்ருச்ச்2ராத் நிர்விவிஶுர் வ்ரஜம்|| 28
அத2 கோ3பை: பரிவ்ருதோ ப4க3வான் தே3வகீஸுத:|
வ்ருந்தா3வநாத்3 க3தோ தூ3ரம் சாரயன் கா3: ஸஹாக்3ரஜ:|| 29
நித3கா4ர்காதபே திக்3மே சா2யாபி4: ஸ்வாபி4ராத்மன:|
ஆதபத்ராயிதான் வீக்ஷ்ய த்3ருமாநாஹ வ்ரஜௌகஸ:|| 30
ஹே ஸ்தோகக்ருஷ்ண ஹே அம்ஶோ ஶ்ரீதா3மன் ஸுப3லார்ஜுன|
விஶாலர்ஷப4 தேஜஸ்வின் தே3வப்ரஸ்த2 வரூத2ப|| 31
பஶ்யதைதான் மஹாபா4கா3ன் பரார்தை2காந்த ஜீவிதான்|
வாதவர்ஷாதப ஹிமான் ஸஹந்தோ வாரயந்தி ந:|| 32
அஹோ ஏஷாம் வரம் ஜன்ம ஸர்வப்ராண்யுப ஜீவனம்|
ஸுஜனஸ்யேவ யேஷாம் வை விமுகா2 யாந்தி நார்தி2ன:|| 33
பத்ர புஷ்ப ப2லச்சா2யா மூலவல்கல தா3ருபி4:|
க3ந்த4நிர்யாஸ ப4ஸ்மாஸ்தி2 தோக்மை: காமான் விதன்வதே|| 34
ஏதாவத் ஜன்மஸாப2ல்யம் தே3ஹிநாமிஹ தே3ஹி ஷு|
ப்ராணைரர்தை2ர்தி4யா வாசா ஶ்ரேய ஏவாசரேத் ஸதா3|| 35
இதி ப்ரவாலஸ்தப3க ப2ல புஷ்பத3ளோத்கரை:|
தரூணாம் நம்ரஶாகா2நாம் மத்4யேன யமுநாம் க3த:|| 36
தத்ர கா3: பாயயித்வாப: ஸும்ருஷ்டா: ஶீதளா: ஶிவா:|
ததோ ந்ருப ஸ்வயம் கோ3பா: காமம் ஸ்வாது3 பபுர் ஜலம்|| 37
தஸ்யா உபவனே காமம் சாரயந்த: பஶூன் ந்ருப|
க்ருஷ்ண ராமாவுபாக3ம்ய க்ஷுதா4ர்தா இத3மப்3ரவன்|| 38
இதி ஶ்ரீமத்3பா4க3வதே மஹாபுராணே பாரமஹம்ஸ்யாம் ஸம்ஹிதாயாம் த3ஶமஸ்கந்தே4 பூர்வார்தே4 கோ3பீ வஸ்த்ராபஹாரோ நாம த்3வாவிம்ஶோऽத்4யாய: || 22 ||
பத்தாம் ஸ்கந்தம் - இருபத்தி இரண்டாம் அத்யாயம் முற்றும்.