HUASCARÁN —Iñaki Alvarez, Jon Maroto, Xabier Ormazabal —

24, ostirala Urretxuko Kultur Etxea 20:00etan Eta asteko ostiralean, hilaren 24an, Urretxu-Zumarragako herritarrak diren Iñaki Alvarez, Jon Maroto eta Xabier Ormazabal lagunez osatutako taldeak, Hegoameriketan ipar hemisferioko udan egindako bidaia erakutsiko digu. Espedizioa Perun dagoen Huáraz herritik abiatu eta Churup aintziraraino iritsi zen (4.600 m). Handik, Quebrada de Ishinca guneraino iritsi ziren (4.500 m), eta bertan jarri zuten beheko kanpamentua. "Ishincatik hiru mendietara igo ginen, lau egunetan: Urus (5.420 m), Ishinca (5.530 m) eta Tocllaraju (6.032 m) gailurrak. Astakeria hutsa izan zen baina Huascaránera igotzeko denbora irabazi nahi genuen. Mendirik mendi ibili artean atsedena hartu beharrean, denak bata bestearen segidan egin genituen eta bi egunetako erretserba lortu genuen" adierazten digute mendizaleek. Handik Musho herriraino abiatu ziren, handik igotzen baita Huascarán mendira. Lehendabiziko kanpamendura igo eta berriz atzera jaitsi behar izan zuten egiten zuen haiz bortitza dela medio. Geroago, bigarren kanpamendura igo eta erdi galdurik ibili ziren beste espedizioetako gidariak agertu arte. Gidarien urratsa segi eta gailurrera iritsi ziren. Gertakizun txarra ere adierazi behar da, Josu Marotok eskuetako hatz batzuetan izozte arazoak izan eta Zaragozara joan behar izan zuen etxera etorri baino lehen. Peruko gailurrik garaiena den Huascaránera (6.768 m) egindako espedizio honen gaineko diapositiba emanaldi honetan, ibilaldiaren gorabeherak eta argazkiak erakutsiko dizkigute. Informazioa ematearren, Urretxu-Zumarragako Otamotz aldizkarian [>>] 2001eko irailean kaleratutako informazioa erabili dugu. Era berean, beren espedizioari buruz beraiek idatzitako testua [>>] eskaintzen dizugu.