Bigarren helburua Oslotik Helsinkirako bidea piraguaz egitea zen. Hasiera eta amaiera puntuak, bata bestetik
749 kilometrora izan arren, "Hiru Pauso, Hiru Norabide" espedizioko kideek 1500 kilometroko arrauneko ibilbidea egin
behar izan zuten Helsinkira iritsi baino lehen. Talde honetako partaideek
—hiru gizonezko eta emakume bat—, hotza, eguraldi txarra eta haizea gaindituz, ibaietako 100 kilometroko
bidea egin zuten, 1.000 itsasoko uretan (300 Atlantikoan eta beste 700 Baltikoan), 200 kilometro kanaletan
zehar eta beste horrenbeste lur haietan dauden aintzira anitzetan: euriaz blai eginda arraunean aritu behar
izan zuten, izan ere negua aurreratu zen... hotz-beroa 12 gradu zero azpikoa zenean eta arraun egiteko
gogo handiegirik ez zegoenean iritsi ziren Helsinkira. Ura izoztear zegoen eta izotzak ez zien zenbait tokitan
arrauna uretan sartzen.
Oslotik irailaren 17an irten ziren eta azaroaren 19an Helsinkira iritsi... beraz, 64 egun, 9 aste,
egunero 25 kilometro arraun egin izan zituzten egunak, bataz beste 5-6 orduko lan jardunaldian. Eta egun batean,
arraunak lehortzen utzi behar izan zituzten eguraldi txarragatik, eta Estokolmo, edo Marienham edo Turku
ezagutzeko aukera izan zuten atsedeneko unetan. Baltiko itsasoa zeharkatzea oso arriskutsua zen... itsasontzi
handiek ur horiek zeharkatzen baitituzte eta eurak ikusiak izan ezean, istripuren bat izateko aukera
bazuten: horregatik zituzten horiak diren piraguak, baita horiak diren jantziak ere, urrutitik begiztatuak
izan ahal izateko:�Platano azaletan arraunean aritu izan bagina bezala zen�,
diosku Josuk umore puntu batean.
|
Aurre egin behar izan zuten beste arazoetako bat orientazioarena izan zen. GPS (Global Positioning System)
satelite bidezko nabigazioaren bitartez, espedizioko kideok 24.000 irla osatzen duten labirintuaren artean nabigatzeko
aukera izan zuten norabide egokia galdu gabe.
Baina dena ez zen nekadura eta sufrikarioa izan. Espedizioko kideek aurora boreala — Naturak inoiz
eskaini izan ditzakeen ikuskizunik ederrenetakoa— ikusteko aukera aprobetxatu zuten,
191 kilometrotan zehar Goteborg eta Estokolmo batzen dituen Göta-ko kanala —bere 65 esklusa txiki eta
guzti— ezagutu, taiga ere bai —pinuz, izeiz eta urkiz betea, oihan boreala dela zalantzarik
gabe—, fokak eta izurdeak lagun arraunean aritu ziren, eta baita bertako baxurazko arrantzaleen berotasuna
eta irribarrea sentitu zuten ibilbide osoan zehar.
