Dinya bîskek kurt e
di navbera guneh û dojehê de
Hetav mîna rûreşkirinê hiltê
û roj
şermek bêderman e.
Ah
ji berî di nav rondikên xwe de bixeniqim
tiştekî bêje!
Dar
wek bar guneha nezanîna bavkalan hildigirin
û ba
pistînek nekêrhatî ye.
Heyva payizê
xezeba dinyayê diherimîne ye.
Tiştekî bêje
ji berî di nav rondikên xwe de bixeniqim
tiştekî bêje!
Her pencereyek
dîmena êş û janan e.
Evîn
qirêjiyek şil e, qirêjiyek fistewî
û esman
sivandeyek e
ku mirov dikare li bin rûne,
bo feleka xwe
bigirî.
Ah
ji berî di nav rondikên xwe de bixeniqim
tiştekî bêje,
hema çi be!
Kanî
ji tabûtan dixulxulin
û şînîker serbilindiya dinyayê ne.
Bêgunehiya xwe nefiroşe neynikê:
gunekaran zêdetir pêwîstî pê heye.
Bêdeng rûnene,
bi Xwedê kî!
Ji berî di nav rondikên xwe de bixeniqim
tiştekî bêje
ji evînê!
Stranek evînî
Yê dibêje: "Ji te hez dikim",
stranbêjek xemdar e,
strana xwe wenda kiriye.
Xwezî evînê ziman heba
da pê bipeyiviya.
Hezar kakolên* şad
di çavên te de ne.
Hezar zerîle** bêdeng
di gewriya min re.
Xwezî zimanek heba
bi evînê bipeyiviya.
*
Yê dibêje: "Ji te hez dikim",
dilşevînek dilgiran e
Xwezî evînê ziman heba
da pê bipeyiviya.
Hezar rojên rûken di tevgerên te de ne,
hezar stêrên hêsirbar di
hêviyên min de.
Xwezî zimanek heba
bi evînê bipeyiviya.
___________________________
* Kakol: torxe, şivankujk, pezkujk firindeyek e. Navê wê/wî yê zanistî Alauda arvenis e. Bi îngilîzî "skylark" û bi tirkî "tarla kuşu" ye.
** Zerîle: zerdelok, qenarî (Serinus canaria), bi îngilîzî "canary bird", bi tirkî "kanarya kuşu".
