Namnet Sigdestad vert i daglegtale ikkje brukt, folk i bygda seier Segestad. Dette namnet vart difor naturleg å bruke på interessegruppa som danna seg rundt denne staden.
Etter at siste brukaren døde i 1961, vart husa ståande for ver og vind i ein 20-års-periode, utan vedlikehald. Det var på høg tid at foreininga "Segestads vener" vart skipa i 1983. Då var taka delvis avblesne og veggane i våningshuset var byrja å ta skade. Vind og væte hadde fritt spelerom om ingenting vart gjort SNART.
Drivkraft i denne perioden var den 70 år gamle Jon Tunold, som var søskenbarn til siste brukar, Jon Sigdestad.
"Segestads vener" hadde som
føremål å restaurere våningshuset og låven for
seinare å kunne bruke staden til overnattings- og
serveringsstad i samband med friluftsliv. 
I dag kan foreininga sjå tilbake på 15 aktive år der mykje arbeid er gjort for Segestad, det viktigaste er:
- Tak på både låve og våningshus er nye.
- Dei skeive steinveggane på huset er jekka på plass.
- Der er kome nye glas og delvis nytt loftsgolv i huset.
- Låven og fjøset er rydda, alt som var der er sortert.
- Utstilling av gamle ting i eine "bruten" (halve sida) av låven.
- Nytt golv i andre "bruten", = forsamlingslokale.
- Langbenkar og -bord på låven.
- Nytt utedo bygt ved hammaren på nordvest-sida.
- Stiar og bøar er rydda for attgroing.
- I hallet bak fjøset er det opparbeidt ein liten grønsakhage.
- Der har vore arrangert samlingar av ulik slag.
Tyngda av arbeidet er gjort på dugnad.
Offentlege midlar.
Siste åra har det også kome til ein del offentlege midlar til dekkjing av m.a.transportkostnader (helikopter) når store byggjemateriale skulle på plass, og ein har og fått dekt løn til noko av snikkararbeidet.
"Segestads vener" er framleis ei aktiv foreining med ca.100 medlemer.
Kanskje er du av dei som har vore på Segestad og som støttar restaureringsarbeidet ? Eller har du lyst å besøkje staden ein gong, då er du velkomen. Kanskje kan du tenkje deg å støtte arbeidet ?
Kontonr. er 3795.20.045