|
|
|||||||||
Mi Epiphania
Linguistic
|
Le studio de linguas ha essite sempre un affaire multo intrigante pro me. Le latino, e le developpamento del linguas romanic sempre guardava in me un interesse profunde. Intre le linguas e dialectos romanic, le lingua franca usate in le mediterraneo per commerciantes de multe nationes in le seculos anterior, esseva un introduction al idea de un lingua international, usabile per gentes de nationes differente pro lor communication mutue. Il es ci que io me interessava in le studio de linguas international. Io trovava Interlingua in le Internet. Il es gratias a iste medio moderne que io studia linguas estranier. In mi recercas io trovava information supre Esperanto, in visitar iste paginas io legeva referentias a altere linguas international: Ido, Interlingua, Occidental, Latino sine Flexione, Volapük, e multe altere linguas minus famose. Mi prime visita a http://www.interlingua.com/ esseva multo placente. Pro me iste nove trovate lingua pareva un sorte de italiano, espaniol e francese in combination. Io legeva e pronunciava lo assi como si illo esseva anglese. E illo me pareva multo natural, completemente comprensibile e facile a rememorar. Interlingua non me presentava con le terminos estranie e deformate del Esperanto. Sin studio previe io poteva leger le multitude de parolas sin effortio, e comprender le signification de quasi toto que io legeva. Immediatemente io recercava le Internet pro plus information supre Interlingua. Trovante un grammatica e un dictionario in-linea, io commenciava apprender lo. Ora io pensa que mi comprendimento de Interlingua es tanto bon como illo de mi linguas studiate al schola: espaniol, francese. E isto in solmente alicun menses de uso. Pro omne persona qui vole communicar se con alteres in altere nationes io recommenda Interlingua. Como dice un del paginas pro Interlingua, illo es le "lingua sin frontieras". Sincermente Mike Stephens |
||
