le 4 de februario 1959
Car amico Berger:

Il es ver, io non sapeva que Martinet esseva formalmente affiliate con le occidentalistas al tempore de su labores pro IALA, sed iste revelation non me surprende.

Durante le directorato Martinet nos laborava secundo un estranie systema que prestava nulle attention al previe labores de Stillman e de me e que, de su parte, esseva naturalmente abandonate in toto immediatemente post le partita de Martinet. Iste systema requireva le compilation plus o minus systematic de varie datos in un folio special pro omne termino individual. Un angulo del folios esseva reservate pro Martinet qui insereva ibi su decision final con respecto al forma del termino in question. Io me rememora que durante un sejorno de Martinet in Francia le folios esseva inviate a ille per posta aeree e retornate per ille in lemesme maniera, e io me amusava per predicer lo que le decision final de Martinet esserea. Mi methodo in isto esseva multo simple. Io consultava un dictionario de occidental, e quasi omne mi predictiones essev correcte.

Sec nos non debe exaggerar le importantia de Martinet in le campo de nostre interesses. Io es convincite que Martinet merita omne respecto de su collegas in le branca del linguistica in que ille labora. In le interlnguistica su nomine merita esser oblidate. Un formula que describe le situation excellentissimemente esseva trovate per Pigal in un documento multo private que ergo non pote esser citate publicamente. Analysante le idea del prototypismo, Pigal remarca que iste idea esseva "ne comprendet per prof. Martinet" e nota in parentheses que Martinet esseva "un gast transitori in interlinguistica." Ecce le complete historia in nuce. - - Io repete: Non citar Pigal.

Cordialmente,
Alexander Gode