Gabi ng Disyembre 5, rumagasa ang mga mensahe ng pagpupugay at pakikiramay para sa pagpanaw ng isa sa mga itinuturing na haligi ng pambansang demokratikong kilusan. Kilala bilang magiting na guro at aktibista na dumanas ng matinding pagpapahirap sa ilalim ng Batas Militar, si Prop. Monico M. Atienza ay sumakabilang-buhay matapos ang halos isang taong pagkaratay sa sakit na kanser, at mahigit apat na dekada ng masigasig na pakikibaka’t pag-oorganisa.

“Lubos na pinahahalagahan ng Partido Komunista ng Pilipinas (PKP) at buong rebolusyonaryong kilusan ang maraming dakilang ambag ni Kasamang Monico M. Atienza sa pagtatatag at pagpapalakas ng Partido at rebolusyonaryong kilusan at sa pagsusulong ng rebolusyonaryong pakikibaka ng sambayanang Pilipino,” ayon sa partido sa kanilang pahayag ng parangal noong Disyembre 9 para kay Atienza.

Bago ang kanyang pagpanaw, si Atienza ay guro ng panitikan at araling Pilipino sa Departamento ng Filipino at Panitikan ng Pilipinas sa UP Diliman.

Si Atienza ay naiulat na isa sa mga lumahok sa muling pagtatatag ng PKP noong 1968, at nahalal bilang isa sa mga kagawad ng Komite Sentral ng partido. Kaya’t gayon na lamang ang pagpapahirap na dinanas niya nang siya’y arestuhin noong 1974 sa edad na 27: pamamaso ng ari, pangunguryente, at mga iniksyon ng “truth serum.” Pinalaya si Atienza noong 1980.

Noong 1987, naging biktima si Atienza ng tangkang pamamaslang ng militar sa mga pinuno at kasapi ng Partido ng Bayan, kung saan kabahagi siya sa pagtatatag. Namatay ang dalawa niyang kasama, habang malubha siyang nasugatan. Isang bahagi ng punglo ang permanenteng nakabaon sa kanyang batok, at hindi na gumaling pa ang sugat na tinamo niya sa kanyang binti.

Nagtapos si Atienza sa mataas na paaralan ng Far Eastern University noong 1964, kung saan siya ay class valedictorian, pinuno ng konseho, at naging kasapi at kalauna’y pangkalahatang kalihim ng Kabataang Makabayan (KM).

Sa UP kung saan siya kumuha ng kurso sa araling Pilipino, naging pinuno rin siya ng Student Cultural Association of the Philippines, kung saan naging malapit sila ni Prop. Jose Ma. Sison, tagapangulong tagapagtatag ng PKP. Si Atienza rin ang pangulong tagapagtatag ng First Quarter Storm Movement, na nagbigay-daan sa pagpapabagsak sa represibong rehimeng Marcos.

“Siya ay isang dakilang makabayang Pilipino para sa paglulubos ng pambansang demokratikong rebolusyon sa pamamagitan ng digmang bayan at isang matatag na komunistang mandirigma para sa pagpapatupad ng makasaysayang misyon ng uring
manggagawa sa pagtatayo ng sosyalismo,” ani Sison sa kanyang pahayag noong Disyembre 7.

Ilan sa mga isinulat ni Atienza sa kanyang pananaliksik sa kasaysayan ng rebolusyong Pilipino at sa pagpapaunlad ng wikang pambansa ay ang “Kilusang Pambansang Demokratiko: Mga Hakbang at Aktibidad sa Pambansang Wika,” “Filipino ng Kilusang Pambansa-Demokratiko (KPD): Pilosopiya at Pulitika sa Pambansang Wika,” “Ang Rebolusyong 1896 at ang Nagpapatuloy na Pakikibaka para sa Pambansang Dignidad at Solidaridad,” at “Ang Pulitika sa mga Tula ni Huseng Batute.”

Inatake sa puso si Atienza noong Disyembre ng nakaraang taon, at sa pananatili niya sa ospital napag-alamang may kanser siya sa lalamunan. Halos isang taong hindi nagkamalay si Atienza, hanggang sa kanyang pagpanaw.

“Ang kanyang kasaysayan sa pakikibaka ay patuloy na mag-iinspira, magpapasigla at magpapaunlad sa kilusang rebolusyonaryo… Walang humpay ang paglilingkod niya sa sambayanang Pilipino at rebolusyong Pilipino,” ayon kay Sison.  

<< back to home