Werin em sala nû ya Kovara MEHNAME bi hev re pîroz bikin.
Bi hejmara piştî vê kovara me dikeve salek nû ya weşana xwe. Bi xêr û saya we nivîskar û xwendevanên dilsoz û alîkarên dilpak em gihane roja îro.
MEHNAME dixwaze bizane ka hûn derbareyî wê çi dibêjin:
Mehnameyê ta niha kariye ta çi pile û dereceyê xizmeta we bike? Ji Mehnameyê çi kêm e û di wê de çi zêde ye?
Divê di hejmarên bên de em çi bikin daku baştir bersiva pêwîstî û hewcedariyên nivîskar û xwendevanên me bê dan?
Di demekê de ku gelek kovarên din jî yên elektronîkî bi kurdî tên weşandin, rola Mehnameyê çi ye yan gelo rolek wê maye?
Bi kovarên din ên elektronîkî yên kurdî re divê Mehname di nav hevkarî yan pêşbaziyê (reqabetê) de be?
Bi kurtî: Tu Mehnameyek çawan dixwazî?
Helwest û dîtinên Te bo me giring in. Em bo Te vê kovarê diweşînin. Tu ji me re bibêje ka Tu çi dixwazî daku em Mehnameyek bi dilê Te derbixin.
Berhemên we dereng digihin me
Gelî nivîskarên hêja
Kovara MEHNAME bêdawî spasdarî we ye ku hûn berhemên xwe bo weşandinê jê re dişînin.
Lê mixabin berhemên gelek kesan bi berdewamî dereng digihin me.
Em hêvî dikin ku hûn berhemên xwe, hindî ji we bê, zû bigihînin me û herî dereng 25ê meha berî wê ya mehê ya hûn dixwazin berhema we di kovarê de derbikeve.
Bi vî awayî hûn ne tenê barê me sivik dikin lê em dikarin ji we re kovarek birêkûpêktir û delaltir amade bikin.
