KUT HNATHAWH UAR MC.Rothangzuala Saiha Tlângkâwn.Branch Y.L.A.

  Mizorama tlâwmngai pâwl lian ber dawttu ni hiala inngai, Young Lai Association hian General Conference meuhah eng vâng kherin nge kut hnathawh uar kuma a puan chu le tiin mi tam takin in lo ngaihtuah mai thei a. Young Lai Association hian Motto fel tak neiin hna a thawk a, tanpui ngai te tanpuiin kawng engkimah Laifa te tân hna a thawk a. Young Lai Association member te hi kan lo inthlahdahin, kan lo thatchhiain hmantlâk lohah te kan lo inchhuah palh ang tih hi kan hotute hian an hlau a ni.  

|halai te hi nguntakin kan inngaihtuah a ngai a, lehkha zirnaah te, lo neih chungchângah te pawh a ni thei ang. Zirlai te hian kan taihmâk tâwk loh avângin Lai hnam tihmingtha tûr pawhin, tumah kan la hlawhtling lo va, a ve mai maiin lehkha te kan zir a. Kut hnathawh uar kum anih ang takin zirlaite pawhin zir tam kumah puang nawn leh ila, Lai hnam tân hian tan lain theihtâwp chhuah zai i rêl ang u. Lai hnam te hi awm mai mai leh in duh dah hman kan ni ta lo. Kan thianten râltiang an kai zo ta, i harh thar thuai teh ang u. Laifa te hian kut hnathawh hi zahpui lovin, a tûl apiang thawk thei tûrin kan rilru i siam thar leh ang u. Ka zak ti mai lovin chhûngkua, khawtlâng, Ram leh hnam tân theihtâwp chhuahin hna i thawk uar deuh deuh ang u. Laifa te hi Zirlai kan ni emaw, office kal kan ni emaw, mi hausa kan ni emaw, in dahthain, a chhelai siam thatu ni tûr leh mite entawntlâk ni tûrin kut hnathawh hi i uar thar leh ang u.

  Lo neia eizawng mi tân kan eizawnnaah taima tak leh malsâwmna dawng tlâka hna kan thawh a ngai a ni. |halai te pawhin nu leh pa te thawhchhuah sa ring mai lovin, mania a tûl apiang thawk thei tûrin tan ila thar leh ang u. Chhûngte châwmhlâwm tlangvâl nih nge i duh, châwmhlâwm mai ni lo, chhûngkaw tâna mi tangkai? Hnathawk tam mi rêng rêng chu an hlimin, Sawrkâr hnathawk mi te ai hian an dam rei zâwk niin an sawi thîn a ni.

Laifa zîngah hian thatchhiatna hian hmun chang lo se, hreawm tuar te hi chak ila, a pawimawh berah chuan Rinawmna hi ngai pawimawhin, kan nunah hian tuh nghet tlat ila, ava awhawm dâwn êm! Kan pi leh pu te hunlaia mi huaisen, mi taima, rinawm ni thîn kha tûnah chuan mi thatchhia, zu ngawlvei, Drugs ngawlveiah kan lo in chhuah zo ta a nih hi. Chutiang anih avâng chuan kan hnam hi mualpho lova a kal zêl theih nân, Laifa te hian kan rilru siam tharin hmalam pan ula, kan eizawnna zâwnah theuh hian rinawmna i vawng zêl ang u.

  Keimahni in kan thawh loh chuan tumah in min thawhsak dâwn lova, nu leh pa te tibuai tu ni lovin, chhawmdâwl tu nih i tum theuh ang u. Kut hnathawh uar kum atang hian keimahni leh kan chhûngkua kan lo intodelh theih nân tan ila thar leh ang u.

Kut hnathawh hi i uar deuh deuh ang u. Tumahin min thawhsak dâwn si lo a, chuvângin a tlai hma hian mahni intodelh tum rânin, policy thar duang chhuakin, kut hnathawh uar ve tawh rawh le.