BUL TAN DIK Zothankimi Vaivakâwn Aizâwl

                Kum 2000 AD han kai meuh chuan Mizo fate pawh kan changkâng ve tain, Upa in “Mual êng hmu phâk” an lo tih thin ang kha kan ni ta deuh fur mai a, a lâwmawm hle mai. Zirna kawngah pawh India rama a duai lo berte zînga mi kan ni ta hial te hi Pathian malsâwmna ropui tak a niin, Chanchin |ha-in Tuipui râl atanga a rawn ken kan ti lo thei lovang.

               Hetih lai hian veirûk riau ka lo nei ve a. Hnam dang kan ngaihsânna reh thei lo leh nupui pasal a tâna kan iai lo riau mai hi ngaihtuah tham ‘Thu’ a tlingin ka hre thîn. Kan tu, kan fate finna leh thiamna duhin ram hrang, hmun hrangah kan tîr chhuak a, kan la intîr chhuak dâwn chauh tûrah pawh ngai ila, chutih rualin hnamdang pawhin kan ram ngeiah min chîm mêk a. Tûn aia nasa zâwka minchîm hun pawh a lo la thleng lovang tih sawi theih a ni lo. Hetiang hi kan dinhmun a nih avângin Nupui/Pasal zawn chungchângah fîmkhur taka inzirtîr kan mamawh a, a bîk takin hmeichhiate hian zirtîr kan ngai zual ni te pawhin a hriat a ni.

               Pathian hnam thlan Israel fate’n hnamdang nupui/pasalah an neih pawlh a, milian leh rorêltute pawh an bâng chuang lo. Tih puithiam Ezra’n a lo hriat chuan na a ti êm êm a, a kawr leh puante pawtthlêrin, zak tak chungin Pathian hmaah nasa takin thupha a chawi tih Bible-ah kan hmu a. Hnam a zawnga kan ngaihsân ber, hnam upa leh fing, thenkhatte phei chuan, Mizote hi an thlahte ni ngeia an ngaih (A nih pawh kan ni mahna) ten chutiang taka an ngaih pawimawh, Pathian laka thupha an chawi phah hialna a nih si chuan, Ringtu kan nih ang leh hnam kan nihna ang pawhin ngaihtuah tûr kan va nei mai âwm e.

                   Ka thian kawmngeih tak pakhat chu Hnam dang pasal nei a ni a, |umkhat chu chinchâng ka zâwt mai mai a. “Keiin ka ti tawh a, midang rawn tih ve chu ngai ka ti lo khawp mai” tiin min chhâng a. Hei hian a sawi thui hle âwm e. Nupui/Pasal hi neih nawn fo chi a ni lova, chuvângin uluk tak leh fîmkhur taka ngaihtuahna hman hmasak ngeina tûr a ni. Nitin khawsak, ei leh bâra nawm deuh hlek thlâkhlelh avâng maite hian mahni ramchhûng ngeiah pawh hnamdang an nih hai rual loh tu leh fate hi kan kawi duah mai ang a, miten an nihna dik tak an sawilan nikhuain kan rilru a na leh lawi si ang tihte pawh hi hlauhthâwn lo theih a ni ta lo. Hmeichhiate hian kan mizo pui pasal kan neih hian Mizo hnam nu kan ni mai a ni tih kan hriat a pawimawh hle a ni.

                Kan pi leh pute hun atang pawhin nupui/pasal inzawn chungchângah an fîmkhur êm êm a. Thuneitu bul ber chu nu leh pa an ni thîn. Hmêl hmai ni lo hrisêlna leh nungchang an inchîksak thîn. Hei hian nupui/pasal inneihna hi thil narâna an ngaih lohzia a ti chiang a. A innei tûra te mai ni lovin, thlah kal zêl tûr thlengin an thlîr phâk a ni tih a tilang a ni. Kan pi leh pu thingbul, lungbul bia, a thente phei chuan ‘Mi lû la hnam’ tih hiala an koh, tûn lai tehna atang phei chuan mâwl zâwk hlea kan dahte mah heti khawpa an fîmkhur a nih chuan, khawvêl finna tinrêng chawlûta kum sângbi thara ding mêkte phei hi chuan heti lamah hian fîmkhur nachâng hre zâwk tûr kan va ni tehlul êm!.

               Aw le, hei famkim lo leh phelh pheng phungin ka vei zâwng ka han phuh chhuak ve rawih mai a. Kei anga vei, kei aia ziak thiam zâwk te ka cho chhuak ta hlauhte a nih phei chuan hlawhtling thawkhatah ka lo inngai mai dâwn a ni. Kan hla phuahtu Pu Rokûnga’n ‘Hnam dang hmusit mai lovin, thianah i siam ang u’ a tih kha zâwm ila, he ti chinah hian i duh tâwk bawk ang u. Chutichuan kan thlah lo kal zêl te Lalpa tâna mi rinawm leh hman tlâk, Ram leh Hnam tâna tangkai, khawtlâng tinuamtu leh kan inchhûngkhur tiphuisuitu an lo nih theih nân, bul tan dik i zirtîr ang ul  

(Hmeichhia zawng zawngte hriat atâna tha leh zawm vek tûr atân a thurâwn tha. Ram leh hnam tâna himdam.  Pi Zothangkimi’n min rawn ziak sak hi kan va lâwm teh lul êm. Ziak zêl tûrin kan sâwm nghâl e. Ed)