SENA B

IL-QUDDIESA TAL-ĦADD – JUM IL-MULEJ

6 ta’ Settembru 2009

L-XXIII ĦADD MATUL IS-SENA

Messalin Paġna 458

IL-FIDI HIJA “KLIEM” U “SMIEGĦ”

L-EWWEL QARI

Qari mill-Ktieb tal-Profeta Isaija.                 Is 35, 4-7a

Għidu lil dawk ta’ qalb imbeżżgħa:
“Agħmlu l-ħila, li tibżgħux.
Hawn hu Alla tagħkom!
Waslet il-vendetta,
il-ħlas ta’ Alla,
hu ġej biex isalvakom.”
Imbagħad jinfetħu għajnejn il-għomja,
widnejn it-torox jinfetħu;
imbagħad iz-zopp jaqbeż bħal ċerv
u lsien l-imbikkem jgħajjat bil-ferħ.
Iva, igelgel l-ilma fid-deżert,
u x-xmajjar jiġru fix-xagħri;
u r-ramel jikwi jinbidel f’għadira,
u l-art niexfa f’għejun ta’ ilma.

Il-Kelma tal-Mulej.

Inroddu ħajr lil Alla.

SALM RESPONSORJALI                           Salm 145

Rit: Faħħar, ruħ tiegħi, il-Mulej.

Il-Mulej iżomm kelmtu għal dejjem,
jagħmel ħaqq lill-maħqurin,
jagħti l-ħobż lill-imġewħin.
Il-Mulej jeħles ’l-imjassrin.

Rit: Faħħar, ruħ tiegħi, il-Mulej.

Il-Mulej jiftaħ għajnejn ’il-għomja.
Il-Mulej jerfa’ ’l-milwijin,
il-Mulej iħobb ’il-ġusti.
Il-Mulej iħares ’il-barranin.

Rit: Faħħar, ruħ tiegħi, il-Mulej.

Il-Mulej iżomm ’l-iltim u ’l-armla,
imma triqat il-ħżiena jħarbathom.
Il-Mulej isaltan għal dejjem,
Alla tiegħek, Sijon, minn nisel għal nisel.

Rit: Faħħar, ruħ tiegħi, il-Mulej.

IT-TIENI QARI

Qari mill-Ittra ta’ San Ġakbu Appostlu.                   Ġak 2, 1-5

Ħuti, fl-istqarrija tal-fidi f’Sidna Ġesù Kristu msebbaħ qisu li ma tħarsu lejn wiċċ ħadd. Għax jekk fil-laqgħa tagħkom jidħol wieħed biċ-ċrieket tad-deheb f’subgħajh u bi lbies ilellex, u jidħol ukoll wieħed fqir liebes imċerċer, jekk intom idduru ma’ dak li hu liebes ilellex u tgħidulu, “Oqgħod komdu hawn bilqiegħda,” waqt li lill-fqir tgħidulu, “Oqgħod hemm bilwieqfa,” jew, “Oqgħod bilqiegħda hawn taħt, fejn inserraħ riġlejja,” ma jidhrilkomx li tkunu qegħdin tagħmlu għażla bejniethom u hekk issiru mħallfin qarrieqa?
Isimgħu, ħuti għeżież: mhux Alla kien għażel ’il dawk li huma l-foqra tad-dinja biex isiru għonja fit-twemmin u werrieta tas-Saltna li hu wiegħed ’il dawk li jħobbuh?

Il-Kelma tal-Mulej.

Inroddu ħajr lil Alla.

VERSETT
Hallelujah. Hallelujah.
Urini, Mulej, it-triq tiegħek,
mexxini minn mogħdija watja.
Hallelujah.

╬ L-EVANĠELJU
Qari mill-Evanġelju ta’ San Mark.               Mk 7, 31-37

F’dak iż-żmien: Ġesù telaq mill-inħawi tal-belt ta’ Tir, u għadda minn Sidon lejn il-baħar tal-Galilija, fl-inħawi tad-Dekapoli.
U ġibulu wieħed trux u mbikkem, u talbuh iqegħidlu idu fuqu. Ġesù ħarġu għalih waħdu minn qalb in-nies, daħħal subgħajh f’widnejh u messlu lsienu bir-riq tiegħu. Imbagħad refa’ għajnejh lejn is-sema, tniehed tnehida, u qallu: “Effata”, jiġifieri, “Infetaħ”! U dak widnejh infetħulu, l-irbit ta’ lsienu nħallu minnufih, u qabad jitkellem sewwa.
Ġesù wissiehom biex ma jgħidu lil ħadd; iżda aktar ma wissiehom, aktar bdew ixandruh. U, mimlijin bil-għaġeb, bdew jgħidu: “Kollox għamel tajjeb: jagħti s-smigħ lit-torox u l-kliem lill-imbikkmin.”

Il-Kelma tal-Mulej.

It-tifħir lilek Kristu.