Sa kabila ng hindi pagdalo ng administrasyon sa isinagawang pulong ng iba’t ibang sektor sa UP Baguio, tinatayang 200 estudyante pa rin ang nagwalk-out upang igiit ang kanilang demokratikong karapatan kasama ng mga guro at kawani ng unibersidad.

Pinangunahan ng Ugnayang Multisektoral laban sa Komersyalisasyon ng Edukasyon (UMAKSYON) ang pulong noong Enero 29 na dapat sana’y naging lugar para maisaayos at maintindihan ng lahat ang mga isyu ng bawat sektor sa UPB.

Bagaman ipinaalam ito isang linggo bago ang pulong, hindi nagpakita sina Chancellor Priscilla Supnet-Macansantos, Vice Chancellor for Administration Teofina Rapanut, Director for Student Affairs Teofino Macabiog at iba pang miyembro ng administrasyon.

Ayon kay Macansantos, ayaw na niyang maulit ang nangyari sa University Assembly noong 2005 kung saan nagwalk-out ang mga estudyante sa kalagitnaan ng kanyang pagsasalita. “Hindi ko natanggap ang respetong dapat kong tanggapin,” ani Macansantos. Hindi rin umano kayang resolbahin ang lahat ng isyu sa isang pulong lamang kung kaya’t kailangang isa-isang kakausapin ni Macansantos ang mga kinatawan ng mga sektor.

Dagdag ni College of Social Sciences Dean Raymund Rovillos, ang mga isyu ng bawat sektor ay dapat na malinaw muna at mapag-isa upang hindi umano mauwi sa “mob rule” ang diskusyon.

“I think we’re responsible enough to make our own program, make house rules, prepare a proper flow of discussion during the dialogue itself…Naniniwala naman ako na hindi tayo ganoon kabastos,” ani University Student Council (USC) Chairperson Deo Florence Onda sa bungad ng pulong.

Naglabas ng position paper ang kinatawan ng mga estudyante, sa pangunguna ng USC, noong Enero na tumutuligsa sa mga palisiyang ipinatupad ng administrasyon ng UPB ngayong taon, na hindi umano dumaan sa konsultasyon sa mga estudyante.

Ilan sa mga palisiyang ito ang pagbabawal sa paggamit ng mga silid sa mga performing organization, hindi pag-abruba sa mga proyekto at gawain ng mga organisasyon nang walang basehan, curfew sa mga silid, at hindi pagpapagamit ng mga pasilidad tuwing katapusan ng linggo.

Binanggit din ni All UP Workers’ Union (AUPWU) UPB Chapter President Larry Laureta ang hindi maliwanag na paggamit ng magkahiwalay na batas ng Civil Service Commission (CSC) at ng UP ukol sa pagpapalakad ng administrasyon ng UPB.

Kinuwestyon ni Laureta kung ang pagpapaupo ng opisyal ay ayon sa napagkasunduan ng mayorya o desisyon pa rin ng appointing office ni Macansantos.

Ayon din sa All-UP Academic Union (AUAU), may mga kawani na pansamantalang inilagay sa mga bakanteng posisyon subalit hindi nabibigyan ng karampatang benepisyo.

Nahihirapan din umano ang iilang research, extension and professional staff (REPS) sa dami ng kanilang ginagawa, at hindi sila nabibigyan ng karampatang pribilehiyo sa study leaves at fellowships habang pinagsasabay nila ang trabaho at pag-aaral, dagdag ni Sally Leung, pangalawang pangulo ng REPS.

Nagkaisa ang tatlong sektor na maglabas ng iisang position paper para sa administrasyon na naglalaman ng lahat ng isyu ng mga kawani at guro. Ani Onda, bagamat ilan sa mga isyu ng demokratikong karapatan sa mga estudyante ay naresolba na, patuloy pa rin ang pakikiisa ng mga estudyante sa laban ng mga guro at kawani.

Samantala, hinihingi pa rin ng mga kinatawan ng mga sektor ang isang multisektoral na pulong kasama ang administrasyon upang tiyak na maresolba ang lahat ng usapin. # Philippine Collegian

<< back to home