|
Kakapirasong papel
Iyong itupi at gawing bangka
Sa dako ng hapon mo isagwan
Ang mga nagpupursiging panaginip
Kung ikaw ay biglang magising
Maudlot sa iyong kasiyahan
Maaari pang pumikit
At ibalik ang kaligayahan
Damhin mo ang mainit na hangin
Na bumubulong sa iyong dibdib
Nangangakong papawi sa hapdi ng sugat
Ngunit sakit ay pinapatindi
Buksan mo ang iyong mga mata
At sumilip sa kalangitan
Ano ang iyong nakikita?
Ano ang iyong nadarama?
Sa dagat ba ng mga bituin pumupunta
Ang mga ligaw na kaluluwa?
Umaasa sa bawat gabi
Na titigil ang kanilang paghikbi
Sa dulo ba ng buwan
Kailangan mong pumunta
Kung ang puso mong nasaktan
Ay ayaw nang kumanta?
Published in The Philippine Star
(October 6, 2000)
|
|
