MEHNAME - HELSINKI. Li destpêka îsal malperek din jî bi xurtî ket xizmeta wêje û zimanê kurdî. Malpera HELBESTAN di demek kurt de gelek navên giring yên helbestvaniya kurdî li xwe civandin.
HELBESTAN li şûna malpera helbestvan Ehmed Huseynî derdikeve:
Lê ti daxwiyanî di malperê de nînin bo ku diyar bibe ka armanca malperê çi ye yan ew berhemên çawan diweşîne û yên çawan naweşîne. Herwiha ne diyar e ka kî vê malperê bi rê ve dibe lê dixwiye ku serkêşiya wê di dest Ehmed Huseynî de ye.
Ji navê wê (HELBESTAN) û ji berhemên tê de weşandî berçav e ku ev malper giringiyê dide helbestan. Lê ne diyar e ka rê ji berhemên din re heye yan na ji ber ku ta dema ev nûçe dihat amadekirin (05.01.04), ji bilî helbestan ti berhemên din tê de cî negirtibûn. Herwiha naxwiye ka HELBESTAN dê wek kovar her heyamekê (bo nimûne mehê carekê) derbikeve yan jî her berhema bigihe wê dê di heman demê de di malperê de bêt bicihkirin. Lê ta îro (05.01.04) rojane yek yan zêdetir berhem li malperê hatine zêdekirin.
Ji bilî helbestvanên kurd, HELBESTAN cih daye kurdiya çend helbestên biyanî jî.
Kovara MEHNAME malpera HELBESTAN pîroz dike û jê re jiyek dirêj hêvî dike.
