Divê Dewleta Tirk Rêz Li Daxwaz û Armanca Kurdên Başûr Bigire!
Paş eşkerê bûna proseya avadankirin û nusazîya Iraqê, Kurdên Başûrê jî proje û bernama xwe bona duwerojê Iraqê pêşkeşê raya giştî kirin. Usa xuya ye, ji ber vê projeyê, şoven û nijadperestên Tirk, ji nijadperest û şovenên Iraqê pirtir ecîz bûne.
Hêzên sîyasî yên Kurdistana Başûr heya îro gelek caran îlan kirin ku dijî perçebûna Iraqê ne, Iraqeke demokrat û federal dixwazin. Herweha îlan kirin, ku li ser Biryara Parlementoya Kurdistan ya derberayê federasyonê, pêgir in û ji vê biryarê paşve nakêşin.
Dijmin û neyarên Kurd li Tirkîyê, ji pêşkeşkirina projeya federasyonê û biryara yekxistina hukumeta Kurdistanê, dîn û har bûn. Hukumeta Tirk, leşker û -bilî ji çend rojnemevan û niviskar- rojname û televîzyonên Tirk, bi hevra gefa Kurdên Başûr dixwin, “daxwaza federasyonê û Kerkukê ji bîr bikin” dibêjin.
“Divê demografî û demokrasîya Iraqê neyê xirab kirin, ji ber vê yekê me hişyarîya xwe yê pêwist da” dibêje wezîrê Karûbarê Derweyê yê Tirkîyê. Û bi vê gotînê xwe va carekî din nişan dide, ku gava pirs û pirsgirêka Kurd were holê, dewleta Tirk guhê nade prensîbên dîplomasîyê. Ji ber ku Kurd neteweke eslî ye li Iraqê, û mafê wî jî heye bona duweroja welatê xwe raman û projeyê xwe pêşkeş bike. Gava dewleta Tirk rêz li daxwaz û armanca Kurdên Başûre negre û gefa wan bixwe, ev tê vê wateyê, ku dewleta Tirk destê xwe dirêjî kar û barên hundurîyê Iraqê dike.
Berhemên vê sîyasetê, aloztir û ne aramtir bûna navçe ye. Ji bona vê yekê jî divê dewleta Tirk dev jê vê halwesta xwe berde. Þûna wê bona çareserkirina pirsa Kurdî li Tirkîyê kar û xebat bike.
Hêzên azadîxwaz, demokratên Tirkîyê, divê li hemberê gef xwarina dagirker û şoven û faşîstên Tirk bê deng nemînin, bona ku hukumeta Tirk rêz li daxwaza Kurdên Başûr bigre, kar û xebat bikin.
Koma Milletan, Dewleta Yekbûyî a Amerîka, Birîtanya û dewlet û sazîyên din, ku di pirsa Iraqê da teref in, divê dijî helwesta Tirkîyê, ku pêpeskirina prensibên navnetewî ye, dengê xwe bilind bikin, nehelin Tirkîyê destê xwe dirêji kar û barên Iraqê bike.
Divê hemû Kurd, -ci li welat, çi li derwayê welat- parezvanê biryara Parlamena Kurdistanê bin; vê biryarê wekî ronîya çavên xwe biparêzin. Divê hezên welatparêzên Kurdistana Başûr, pêş hemî herdu hezên sereke PDK û YNK, yekitîya xwe hin xurttir bikin, bona avadan kirin û nusazîya welatê xwe, bernameyên hevbeş amade bikin.
PSK-Partîya Sosyalîsta Kurdistan, di vî warê da, wê erkên xwe bi cî bîne, hazir û amade ye ligel rexistinên din va, kar û xebatên hevbeş bike.
