MEHNAME - HELSINKI. Bi navê KNN televizyonek nû ya kurdî dest bi weşanê kir. Taybetiya KNNê ew e ku ew tenê li ser Internetê derdikeve. Yekem weşana KNNê roja 06.01.04 derket û saetekê vekêşa.
KNN kurtebêjeya Kurdish News Network (Tevnê Nûçeyan yê Kurdî) e. Ew ji alî çend pisporên bi gotina xwe serbixwe yên ji Başûr-Rojavayê Kurdistanê ve tê birêvebirin. KNN armancên xwe wiha rêz dike: ragihandina nûçeyên kurdî û parastin û belavkirina çande û zimanê kurdî û pêşvebirina wan.
Hêjayî gotinê ye ku ji mêj ve ye amadekarî bo kenalek dî yê kurdî - GELTV - jî tê kirin û hatiye ragihandin ku hunermend Şivan Perwer bi serperiştiya wê radibe. Lê ta niha hê ne diyar e ka dê kengî dest bi weşanê bike.
Mehname tiştek pirr baş û erênî dinirxîne ku êdî çapemeniya kurdî ya serbixwe bi xurtî rikeberiyê li gel medyaya bi partiyan ve girêdayî dike.
