2003
自我介紹 談情說愛 Forever Friends 天地 商品介紹 文章分享 談天說地 留言天地 禮物相記 小虎妹篇
2003 年 12 月 24 日 (WED) 平安夜
平安夜，我們一起到山頂吃自助餐。跟住互相交換禮物，然後到中環睇燈色，一齊寫許願卡......就是這樣就渡過了一個咁浪漫的節日了！
2003 年 11 月 1 日 (SAT) 努力工作......
最近他工作的確比較忙，無乜時間傾計，亦無乜時間見面。有時連星期日也要返工。假若今個月公司傾成左工程，星期日都可能要返工。見他那麼的辛苦，我也戥他心痛。由於他唔係做文職工作，公司派甚麼地方佢就要去那兒工作，還要走上走落。因此他放左工，有時都會話好疲倦。還記得初初認識他的時候，我曾經在"E-MAIL"講過一句說話，就係"唔辛苦點得世間財"呢？點解我當時咁答佢，因為佢果時話工作好疲倦辛苦麻。
每當他辛苦努力工作，我都提醒自己也要努力工作。我覺得兩個人相處之道，就係在於大家亙相鼓勵同支持對方。
2003 年 11 月 1 日 (SAT) 十分愕然....
昨天係萬聖節，我竟然收到一束鮮花。當時我在辦公室工作，突然有一位送花的小姐遞張簽收的單給我，那張單有我的大名的。這一刻，我只覺得"下........唔係掛，估緊邊個送花比我！"因為我心想男朋友去左星加坡工幹，無理由架！我立即打開張CARD，睇下邊個送。唉！原來真係我男朋友。
OH.....簡直嚇左我一跳，我無諗過他會送一束鮮花給我的。由於他去星加坡之前，我曾講過一句說話，"你好似好耐無比過"SURPRISE"我啦！當時我諗住講下咋麻，點知他鬼咁認真。雖然我都知他是一番心意，但亦唔希望佢亂咁洗錢。因為第一次就話有驚喜，但再有第二次就變得無意思了！這次我巳經覺得既驚且喜！在此多謝他的一番心思，我實在開心到都唔知點多謝佢。 (3:07 PM)
2003 年 10 月 28 日 (TUE) 他去了工幹.....
明天他去星加坡工幹了！因此他今晚對我說；"明天一起吃早餐！"。我當然表現得很雀躍啦。因為他很久沒有過來同我一起吃早餐了！他要去那兒工作幾日，星期日下午先返來！希望他工作一切都順順利利！努力呀！ (11:59PM)
2003 年 10 月 28 日 (TUE) 拍拖兩週年
十月廿一日，我與他也會記得這個大日子！哈哈！就係我地拍拖兩週年啦............雖然那天我和他只是一起吃飯，好像沒有甚麼特別！不過我也十分開心同高興。而我亦只送了兩件衫作為紀念，而他因為近排為工作而忙，亦沒有甚麼準備。我揀左一樣床具用品，而他也送了給我！ (11:45PM)
2003 年 9 月 26 日 (FRI) 輕鬆兩日
前幾日(星期日,星期一)放大假，同媽媽和妹妹，去左中山珠海玩左兩日。如果你問我，好唔好玩？我就覺得一般啦！因為跟團，會帶你去周圍買野，有時會在於這些規定性的活動覺得沉悶。而覺得好玩在於，今次可以玩到"石景山公園"之索道。點解我會話好玩！因為它可以自己控制快慢囉。其次，就係可以玩"碰碰車"，跟住，仲去左大桶牛奶按摩腳，仲按埋全身添，幾舒服架。 (11:10PM)
2003 年 9 月 26 日 (FRI) 他忙於工作....
最近他的工作很忙，公司有很多工程要他做到好夜先可以放工！真係慘！慘！慘！每晚傾電話，我也聽得出他的聲音是很疲倦的，我也很體惊他的工作很辛苦，所以傾左幾句，就說"早D訓啦"！因為一來，他疲倦到無乜野講，二來，第日他也要早起身。
前幾天他同我講，可能十月中會去新加坡！我就即時問佢，點解要去呢？他說："經理話要去那兒教野"，會過去兩三日！我問："去的機會大唔大呢？他答話有八成機會！我就話：去都好既，可以見識下，學下野麻！哈哈！我心想：唔知到時去的機會大唔大呢？ (10:35PM)
2003 年 8 月 6 日 (WED) 壞消息...
唉！今日經理出左去開完會返來，說今次會有壞消息！第一就係，下年度開始無 "雙糧"！第二就係，他無直接講給我們聽，只講一大堆關於公司的業績: 下年又會有一間競爭的對手；另外仲暗示，問我地邊一個想自願離職！我心想：你咁樣問，邊有人話會架。我們的同事其實一早收左料，話公司會想CUT人，不過人選就唔知邊一D。
她們聽到這確認的壞消息，當然個個都好驚啦！我地個個都唔知心驚驚到幾時！邊一個被抄，其實經理都唔想，他也只是打工，要這樣決擇.........又真係令他很難定奪！
我也擔心今次會被踢出局！不過都唔擔心得咁多，公司舊一批的同事反而仲驚，因為有些仲供緊樓！又有仔女要讓喎！唉！佢地咪仲驚過我！
工作對我真的很重要，有左工作，就有錢，有錢生活就會變得有樂趣！有生活樂趣，人都會開心D啦！
2003 年 7 月 30 日 (WED) 足球熱....
最近興起睇足球熱潮，連小虎妹都會睇埋一份架！哈哈，不過唔係去現場睇，而係安坐家中睇！我雖然都好想支持奧雲仔同朗拿度，但是現場睇我覺得反而睇得無咁清楚。無錯，現場睇係會好有氣氛，不過睇唔晒全個過程呢？一來又太逼，二來我又唔係瘋狂fans。
今次有兩隊咁有份量級的足球隊伍來港，還與港隊一起踢友誼賽。我覺得港隊真係要珍惜這個機會，盡量表現自己的踢ball能力，咁先有體育精神！無論輸贏也好，吸收經驗就巳經上了寶貴的一課。 (10:30PM)
2003 年 7 月 28 日 (MON) 飲茶記
昨日他和我一家人一起飲茶，今次是他主動約埋我屋企人一起飲荼的。雖然之前都有主動試過請我屋企人飲荼，但這次我覺得特別有感覺的。我們飲完茶埋單的時候，媽媽唔好意思就拿錢出來，而他就說：伯母唔好，我請飲荼麻！而我媽媽就講：次次都要你請......而我爸爸就話，尤得佢啦.........最後當然是他埋單啦！我們每次星期日飲親荼多數都會在金龍翔飲的，所以次次埋親單都幾貴架！不過這間酒家D野食就的確幾好味。 (11:30PM)
2003 年 7 月 28 日 (MON) 六合彩記
最近這幾次我和他都有買六合彩。哈哈！不要以為我們很爛賭，通常派彩池大(幾千萬)，我們先會買，而且只是買了廿蚊咋！
講開買六合彩，記得我生日的那天，我們都有買六合彩，他當時還對我說："如果贏左頭獎，我地結婚囉！" 我當時即係答佢，你贏左先講啦！雖然我知道贏六合彩頭獎係好難，不過聽到他當時講這句說話感覺幾開心！ (11:10PM)
2003 年 7 月 21 日 (MON) 總是有陰影....
以前妹妹認識他，我沒有反對他們的來往！不過自從妹妹被他整親隻手之後，我感覺上唔係幾鐘意他，可能因為他令到我妹妹跌傷隻手，所以我對於他沒有好感！
我得一千零一個妹妹，他不但沒有好好保護她，還令到他受傷！每次我望見妹妹的傷口，我總是不喜歡他，還有點兒憎恨他的感覺。我想這個陰影，我永遠都不能磨滅的。
2003 年 7 月 15 日 (TUE) 心情總是忐忑不安......
不知是否之前唔開心，現在心情還未回復狀態。可能係我諗得太多吧！
我應該同自己講一句，香港人，放鬆D啦！(11:40PM)
2003 年 7 月 14 日 (MON) 雨過天晴！
之前真係有好多唔開心的事情發生，不過全部都巳成過去。
由開始認識他，我自以為好了解他，但原來自己並不了解他。今次我們和好，很感謝我同事的幫忙。她開解了我和他，雖然我問過他，係咪因為我同事點醒左你呢？他說：都唔係。但他並沒有答主要原因。雖則他話唔係我同事開解左他，但我覺得她解開了我們的心結，令到我們更清楚對方在想什麼。當大家冷靜下來反省，原來效果還來得好！
我同事勸解我，你不要打給他，騷擾他，給他一點空間，讓他冷靜一下。在這期間，我亦反省了自己的錯誤，靜下一日又一日，第五日，他突然打給我，當時感覺很開心，因為他很久沒有主動打給我了。雖則他說未考慮完........不過那刻我們傾計的感覺很好。他本來說下星期五先再打給我的，但我們昨晚大家都訓唔著，當時巳經零時一點幾，當時我聽到收message的聲音，我打開看看，原來他send給我的，我當然開心，因為佢話掛住我喎！不過我應承過他不打給他，所以我send message 給他，我話：我都係呀！你訓唔著打給我啦。跟著，電話就響起了！我們照平常咁傾電話，有說有笑，還約會今晚見面添。這刻我覺得好開心好興奮，仲成晚都訓唔著.......
今日終於見面了，感覺雖然無以往那麼好，不過感情還可以慢慢重新培養的。如果沒有發生今次的事件，我也不知道他心底的想法。這幾日來，我也反省了很多東西，亦學習了很多......不要太過執著，放鬆一點，冷靜反思自己的錯誤，讓大家有一點一點的空間。 (11:45PM)
2003 年 6 月 18 日 (WED) 以後唔會再亂咁發脾氣！
妹妹未發生意外之前，其實係發生左一件事........
每晚他都會打來傾一回兒先會訓覺，但點知有一晚，我見十二點幾他都仲未打來，於是我便打給他！我打去他房中的電話，但沒有人聽，打手提沒有人聽，我開始好心煩，點解咁耐都無人聽。我為有再等一陣再打，差不多一點幾，我又再打去，又無人聽，我開始有少少擔心，我無打去廳中的電話，因為怕嘈醒他的屋企人。
於是等阿等，兩點幾再扎醒！好啦，終於打得通，我細細聲問佢點解打去房又無人聽，打去手提又無人聽。他解釋，"因為去左跑步，太疲倦，唔記得左打比我！" 就係這句說話，我嬲左佢成兩日，唔聽佢電話，就算聽到佢電話，講說話都好悔氣。他有打比我手提，我沒有接聽。上星期六果晚他好晤開心，因為我沒有聽他的解釋，一直都唔聽電話，就算接聽講說話也好悔氣。於是他那晚約左一班朋友去唱K。果晚最後我見十二點幾他都無電話比我，於是我便打比佢，他說:去左同朋友唱K，因為唔開心。跟住我話現在咪打比你囉！仲問佢星期日得唔得閒同我阿爸慶祝父親節一齊吃飯，跟住他就應承左！
第日，夜晚，我地一齊食完泰式自助餐。他同我一齊返屋企。但我一直留意到他的樣話比我知，他有些少唔開心。於是第二日，我不斷SEND MESSAGE 比佢，但他一直無回應。
直到夜晚十二點幾，他都沒有打來，跟著我便打比佢。我承應今次是我的錯，我說對不起，他開始一五一十講出來，佢問點解每次都係咁，你之前唔只一次係咁唔聽電話，如果將來係咁，你叫我點算好呀！你又唔理我，又唔聽我電話。我開始低聲地講，"鬼叫你唔記得我，連女朋友都記得，你話我係咪嬲呀！跟住他開始講真相！"他說；果晚因為去左參加健身，就係太疲倦，所以無打比我。唔話比我知係因為想減肥，想做到有效果先比個驚喜我喎！
唉，真相原來係咁，我話佢好傻，又唔話我知，等我誤會左佢，真比佢激死！他說：這兩日我唔理佢，諗左好多野！佢問自己究竟我適唔適你呢？我問：點解這樣說？他又講，驚比唔到幸福我！我開始喊著講，點解咁講喎，他話自己好亂，唔知點樣好！
我好唔開心喊著咁講；我唔想你好似以前果個咁樣，一樣咁對我。我話，你咁樣講係甚麼意思喎！我不停流眼淚.......當時點幾兩點他想收線，我話，你應承我明天打比我先，我先收線。
我知今次係由我而起，所以攪到佢咁唔開心，亂咁諗野！我曾經應承過他，就算嬲都唔會唔聽你電話，聽你解釋。但今次我依然做唔到，成日唔理佢唔聽佢電話，又講悔氣說話。我今次同他協議左，我以後唔會唔聽你電話，但你亦要應承我要乜野事都要講我知！
現在我哄番佢啦，他終於開心番，好野！
2003 年 6 月 18 日 (WED) 晴天霹靂.....
昨日放工回家後，手提突然響起，那原來是妹妹的朋友打來，他說 "你的妹妹大件事啦"。跟著就話抄車，當時我聽完後，立即呆呆地企定。跟住不停鬧他，我即係鬧佢"你如果唔識載人，就唔好載我阿妹周圍去啦，現在攪到我阿妹咁，我話比佢聽如果妹妹有乜事，第一個唔放過你。我不斷鬧佢，他不斷講，"你妹妹現在好清醒，無事，只不過隻手爆裂左"。我想當時他這樣講係想我鎮靜。跟住，我問她情況點，"他說 :要做手術！" 我當時即刻答，唔係掛，咁嚴重。
講完之後，我同媽咪立即趕過去左上水北區醫院，了解情況。我們去到那兒，很可惜因為SARS的關係，沒有任何探病時間，既不能進入去睇她，她也不可出來。護衛員話只可一個人到那層比D野佢，要上去還要登記名添！這樣子，媽咪為左想了解情況，要求見醫生，不過 要等主診醫生要等個幾鐘先至得閒！這樣我們為有到附近屋村食飯，再過去見醫生。
跟著，食完飯，我們立即趕往去見醫生。媽咪了解完情況後，返回大堂。我問"妹妹怎樣呀！"。醫生話 : 她的"手掙"位置爆裂，需要做手術。不過要等兩日後先可以做！先同她打左石膏，等佢唔好整到隻手，然後同佢做麻醉再做手術。
唉！我聽到都戥佢驚。妹妹，今次教訓真係大呀！我知妹妹係一個比較倔強的人，樣樣做左先算，唔理後果。我都原全唔知佢昨日會坐朋友電單車去街，直至她朋友打電話來先知！我只係知佢昨日話會去街唔返來食飯而巳。
本來開開心心，下星一,二去澳門，跟住第日會去返佛山探親戚，順道停留三日在那兒玩。現在睇怕大家乜心情都無！全部行程取消.........。現在我只希望妹妹快些好番，早日康復！不如你地都同我一齊幫佢祈禱吧。 (11:00PM)
2003 年 6 月 6 日 (FRI) 禮物記
今年生日收左四份禮物：一個是他所送的手提電話，另一樣都是他所送的藍水晶頸鍊；其次有一班朋友所送的捲髮與直髮夾；跟著還有一位朋友送的神怭禮品(Hello
Kitty香瓶座)。所以在此特別鳴謝以上的朋友。
哈哈，今個月是他的生日，在這兒祝福他事業順順利利，步步高昇！我亦巳送了一部MP3機作為他的生日禮物。那天生日還會與他，和我的一班同事一起去大嶼山貝澳渡假。希望他會玩得開心啦。
2003 年 6 月 5 日 (THU) 生日後記
不經不覺，我又大一歲了！時間總是過得那麼快。今年與他第二年一起度過生日。我們那天一起去大嶼山塘福渡假，一起吃早餐，一起去游水.....開心的時間過得好快，就這樣子度過了一個晚上。希望下年又可以一起再與他渡假，可以間中遠離這個煩躁的都市，到一個寧靜的島上，確實令人有一種舒服的感覺。
2003 年 5 月 20 日 (TUE) 朋友生日後記！
我們同朋友慶祝生日那天，本來約左三點一起去吃午市自助餐，不過好衰唔衰，那天賬目出現問題，要等左成三四個鐘先走得開，雖則我幫不到手，但如果走左去，我覺得好似唔負責任咁，所以一邊等一邊就心急如焚。當時，真係好想好想快快地對準條數就走得！
後來，差唔多五點先至出到旺角，她們巳經吃完，我唯有獨自一個食啦！其實真係唔係幾好意思，要壽星女同壽星仔等左咁耐添！
最後，希望她今年可以搵到一份理想的工作啦！ (10:52PM)
2003 年 4 月 22 日 (TUE) 復活節假期！
今個復活節假期，雖然無去旅行，但去左兩日燒烤。哈哈，都算有節目呀！
放假的前一晚去左淺水灣同他的朋友一起燒烤；第二日朝早，一起與他去大嶼山，有些同行的同事還是第一次見。估不到那天，可以一次過玩足三樣野，一就係：踏單車。二就係：打羽毛球。三就係：燒烤。簡直就係一日就滿足三個願望！哈哈，連我自己也估不到一日可以玩齊晒呀。
跟著星期日就約埋他的朋友去左睇"特務戇J"，都算攪笑啦，不過可能太大期望好好笑，所以好睇程度降低左！
這個復活節假期，不經不覺又完結了。而我地從昨晚起，亦開始踏入"拍左年半的階段"，所以昨日也是一個很有意義的一個見證！(1:04PM)
2003 年 4 月 1 日 (TUE) 唉........
今日又聽到一個壞消息，張國榮跳樓自殺生亡。唉，好好一個歌手演員竟然要自殺，真係不敢相信啊！遺書講述他因為受情緒困擾，現在還未知真相，或者可能會係一個迷。
一浪接一浪的不好消息，真令人慨歎。今日我又接到表妹的電話，她說：要作最後決定。那麼我們為有免為其難接受這個決定，就係取消唔去，我們兩人還要蝕左成千蚊，真係正所謂：未去旅行先打十大板！好心痛呀！
(23:13 PM)
2003 年 3 月 31 日 (MON) 好慘呀！
唉，激死我呀！本來一早計劃復活節假期去台灣旅行，但現在可能有變。
一齊來得太突然了，現在都唔知點算好，去既又心驚驚，唔去又蝕錢喎。
你話啦教我點做好啦。真黑仔呀！ (00:42 AM)
2003 年 3 月 29 日 (SAT) 真麻煩！
唔好意思呀！近排好少寫日記添！
最近因為非典型肺炎事件，令到好多市民都人心惶惶！唉，這種病菌，真係危害不少，攪到人人都出唔到街，太可惡啦。你話呀，幾時可以平伏到市民的恐懼呢？香港經濟巳經麻麻地，現在還要傷上加傷了。天呀！唔好再咁樣玩我地班香港人啦。
希望市民都唔好太過憂心，唔係D細菌仲容易入侵呀！只要保持抵抗力足夠，注意個人衛生，無乜必要唔好去一些人煙稠密的地方，記住啦！
(00:19 AM)
2003 年 3 月 17日 (MON) 病病呀！
好慘呀！病左幾日都未好番！每次吞下口水喉嚨總是好痛。如果明天還未好番，我想要睇多一次醫生，希望唔洗啦。
每當病病，心裏往往也掛念他，很想見到他！最近他忙於自己的事業，我都知男士們通常都會以事業為重，因為愛情係唔可以飲水飽囉！有事業，就一定有愛情，這也是一個事實。女仔總希望有一個有才華又痛錫自己的男朋友，但顧事業之餘，最重要的是唔可以忽視女朋友呀！
(11:46 PM)
2003 年 2 月 23 日 (Sun) 做義工
妹妹的朋友介紹她當義工，於是我對她說：我也想加入，可以嗎？那領隊話可以，就得架啦！跟著我就應承左今日幫手當第一次義工。我初時以為食午膳都有人津貼，點知原來要自己支付($30)。不過不緊要啦，今次我係想嘗試做義工，學多一點東西！
這次的任務，就是帶一班(6-12歲)的小朋友去粉嶺蘆薈小天地玩同燒烤。我地有四個組長，一個領隊Miss。有三組負責六個小朋友，我就負責五個小朋友。我所帶領的有兩個六歲，一個七歲，一個八歲半，另外一個九歲！幾個都較細，一個比較大。
一開始我地就乘旅巴去到粉嶺蘆薈小天地，教小朋友學做環保紙！跟著學怎樣耕種、播種的過程。之後燒烤，繼而一齊落水捉金魚，各組捉得鬥多比賽。這次旅程，如果你問我辛唔辛苦？可以話比你地知，係唔可以用辛苦來形容的。我只覺得有新鮮感，係一種挑戰。今日我終於，領悟到原來帶領一班小朋友是不容易的。點解這樣說，因為當其中一個唔聽話走開玩，其她小朋友就一起跟住要去玩。我這個大姐姐當然叫極都無用啦！為有跟著看管她們吧。今次我想最難應付的莫過於一位九歲小女孩，因為她比較容易發脾氣，連讓一位小妹妹坐，也不可以，說著一定要坐那個位。跟住我叫小妹妹坐開一邊，叫她坐下，跟著她話怕小妹妹唔開心，比番佢坐啦！跟著我地幾個無理佢，她跟著死死地氣坐番囉！仲拉埋小妹妹一齊坐添。
今次最深刻的莫過於她！亦是最難應付！我因為經驗唔夠，未識得點樣控制小朋友的情緒。尤其是一些容易發脾氣的小朋友！希望下次有機會，我會做得更好啦！
(10:45 PM)
2003 年 2 月 17日 (Mon) 真有緣呀！
估唔到今日阿妹約我去行騰龍虛，竟然遇到一位好姊妹，真係有緣呀！
而今日表妹約左我明晚出去傾有關於復活節去台灣的旅程！今次約成的話，我想係我第一次自由行。
(11:29 PM)
2003 年 2 月 16 日 (Sun) 情人節後記!
今年的情人節又過去了！他那天帶左我去吃石燒，對我來說都幾有新鮮感，可能因為未試過啦。不過情人節吃石燒的情侶餐，真係要付出，實在幾貴，雖然他請我，但我個人認為那個價錢唔值得！他說：平時去食都要百幾蚊一個餐架！嘩，真係好貴呀。搵錢對他來說並不容易得回來，所以唔希望他花太多的錢，只要一齊吃餐飯就巳足夠了。
記起上一年，他送左一條黃水晶吊咀頸鍊給我，而今年他亦送左一條白水晶加粉水晶的配搭手鍊給我，可能他知我喜歡有關於水晶的物件啦！點解鐘意水晶？可能我媽咪同阿妹成日講水晶啦！攪到連我都喜歡水晶。與他共渡第二年的情人節，亦證明大家經歷左一段的歲月。希望餘下的日子也可與他共渡！
(8:33 PM)
2003 年 1 月 24日 (Thu) 最近的他，好忙呀！
最近星期一至五約他，總是有些少阻礙。因為試過兩三次都是這樣的！有時公司要OT都無辦法，加上這幾晚又要趕工，工作地點還要去到查甸山那麼遠！他一定很累啊。今晚仲做到成十一點幾，真慘耶！他說："這幾晚都要去到那兒開工"！我想他一定做到很疲倦的！(00:10AM)
2003 年 1 月 15 日 (Wed) 轉左新髮型
昨天放假，去左電髮。電完之後，嘩，真係成個人唔同晒！自己都有些少望唔慣。我想望多幾日就慣架啦！
跟著今日返工，有人竟然話唔認得我喎！哈哈"佢講笑咋掛"。可能今次改變都幾大啦！有部份同事都讚我電完髮都幾靚。我當然好開心，因為大部份人都認同這個髮型麻。 (00:15AM)
2003 年 1 月 13 日 (Mon) 好想再次滑雪！
最近媽媽和妹妹去左桂林旅行，聽她說：雖然那兒好凍，但睇到一個奇景，你估下係乜？係落雪呀！據導遊講，那處好少會落大雪的，今次她們真係好運，可以一嘗冰天雪地的真感覺。本來我也有份一齊去旅行，可惜被同事請左假先，沒有得取假！
現在回想起，真係好懷念一班朋友去韓國滑雪的日子。這種日子，不知何時又會有呢？ (11：00PM)
2003 年 1 月 7 日 (Tue) 放鬆D啦，香港人！
今日看過朋友的一段話，令自己有很多回想！朋友曾經說過"你好像沒有甚麼煩腦似的！" 其實我覺得自己都有好多煩腦，不過每次都將這些煩腦放底左 ，沒有講，沒有理會。每次我與朋友一起，就只有聽別人所講，但自己卻從來唔會同朋友講關於自己內心的說話。曾經我都嘗試刻意改變自己，但到最後辛苦的只有自己。
我覺得自己的性格都幾飄忽，就好似無風向的風箏一樣，左搖右擺。有時甚至連自己也捉摸不到自己，就好似關閉在一間黑暗的房一樣！所以我一直努力想逃離這黑房，但每次越想找尋出路，就越會迷失方向！直至到現在，我發現當你越收理自己，人就會越寂寞同唔開心。反而一些放開懷抱的人，人就會變得開心同快樂。可惜自己還未做到暢所欲言的境界，我希望有一日我都能夠分享多一點自己內心世界給你們聽啦。我都知自己有時係比較大意，容易講錯說話，得罪別人都唔知，請各位見諒吧！
有時我都覺得自己好孤單同寂寞，可能係因為自己性格太過收埋自己。將心底的說話，分享給一個知己聽，我想這是最好的解決方法吧！或者這重擔不能全部放下，但起碼至少放輕一點吧！
香港人，放鬆D啦！這句話，我覺得幾有意思架。 (00:30 AM)