2002
自我介紹 談情說愛 Forever Friends 天地 商品介紹 文章分享 談天說地 留言天地 禮物相記 小虎妹篇
2002 年 12 月 15 日 (Sun) 騰龍墟開幕了
| 位於黃大仙廟側的騰龍墟，現正開幕了。它的特色遍佈三百零售及熟食檔，可供市民趁熱鬧一番。我前幾天也到過此處，還買了一個手提電話座給他。點解我會買這個小傢伙呢？因為它夠特別囉！多麼的攤位，我想最具心思與特別的莫過於它了。 |
|
2002 年 10 月 22 日 拍拖一週年！
不經不覺，我與他拍拖都巳經一年。因此昨日(十月廿一日)一起到尖咀吃飯慶祝。我們選擇左一間食鐵板的餐廳，那裏環境都好特別。我們各人選擇左一個餐之後，前面的女廚師就即時表演煮這套餐了！她廚藝幾好，食到我們津津有味！
今次的慶祝雖然平平淡淡便過去了，但與他一起，我巳經覺得滿足了！希望每年也可以與他一起渡過這日子吧。(23:45PM)
2002 年 10 月 2 日 (Wed) 國慶節快樂！
| 昨日一年一度的國慶節，有放煙花慶祝。於是我和他一同去灣仔碼頭看煙花！嘩好靚呀，好有震撼。我覺得好過上一次上山頂睇煙花！近看就好似一個個煙花飄向你面前；遠看就全境一目了然。兩者各有不同，靚與否只是見仁見智。 (7:30PM) |
|
2002 年 9 月 18 日 (Wed) 表哥終於結婚了！
上星期日，與一位十幾年沒有見的表哥吃餐飯。他於銅鑼灣利舞台一間酒家訂左兩圍，這間酒家，其實係俗稱"飯店"，名叫"益新"！他座於廿一樓，我亦未曾到過這兒吃飯！
其實他八月份與一位女仔，巳經在加拿大結左婚！今次返來，順便向香港的親戚朋友宣佈他結婚，繼而約埋食餐飯，當聚一聚！好久沒見的表哥簡直唔同晒，以前的他好文靜，又怕醜；現在的他好主動，又大方得體，對太太又細心！見他對住太太那幸福燦爛的笑容，我們也戥他高興。他們今星期還去長江三峽玩五天，之後廿五號又再返加拿大啦！我想今次一走，不知何時又再見了！下次見，哈哈可能係帶埋佢D仔女返來囉！ (15:40PM)
2002 年 8 月 13 日 (Tue) 小虎妹變左燒豬呀！
上星期日終於好天，於是他妹妹同埋佢男朋友，約埋表弟一齊去"清水灣"海灘游水。一同五人，去麥記買早餐上車食，不過當時巳經十一點幾，其實可以話係吃午餐，哈哈！
我地都算早去，所以都霸到泊車位。真係好耐無感受下陽光氣息，今次真係得償就非所願啦...........因為灑到成隻燒豬咁呀，D皮膚簡直係"尺尺痛"！我係估唔到大家都無太陽油。唔知邊個囉，應承人又唔買，如果佢無時間買就話聲我知麻，唉！攪到大家都無買。初時我巳為他講笑話無買，點知佢真係無買，簡直激死呀！我絕對唔係因為佢買唔買太陽油而覺得激氣，係因為佢應該講聲我知，唔得閒咪等我買囉！等大家唔洗有誤會麻。
都唔知嬲佢好定唔嬲佢好！大家都灑到成隻燒豬咁。不過講真果句，今次真係好開心，我仲大膽游出"浮台"，哈哈，我係用"大水泡"游出去架，當然還有他輔助先到達目的地啦！這次旅程，可算幾好玩，不過要先甜後苦呢？ (01:29 AM)
2002 年 7 月 6 日 (Sat) 世界盃話咁快又完左！
唔經唔覺世界盃話咁快又完左，很回味巴西贏左o既那一刻，實在好精彩呀！初時睇上半場好緊張，因為真係好驚佢又好似上屆咁。好彩他可以屈服以前的經歷，今次贏我想他們一定對這次比賽係充滿堅強的信念──就係一定要贏！除左朗拿度成功之外，整隊球隊都可以話合作得好好。希望他們下屆繼續努力啦！加油呀！ (13:40 pm)
2002 年 6 月 22 日 (Sat) Yeah!Yeah!Yeah! 巴西贏o左!
實在好開心，巴西贏左！昨午大約一時左右出發去到奧海城，等左成個半鐘先開ball。一開場個個球迷都好興奮，大叫大嗌！
那兒大部份都係英格蘭球迷，尤其一班女球迷，為左睇靚仔碧咸個個都好活躍。當英格欄第一球由"奧雲"入左，所有球迷就歡天喜地！上半場踢左好耐，還未有人入球，當失望之際，巴西o既"朗拿甸奴"中路突破，假動作騙過"艾殊利高爾"後橫傳"李華度"，"李華度"以「黃金左腳」妙射入綱追成平手。嘩，當時幾興奮，竟然可以追平，因為英格蘭防守幾強勁，竟然可以攻破喎！
到休息左十五分鐘之後，又另一個高潮，簡直越睇越起勁。下半場，易邊後，朗拿甸奴三十碼主踢自由球，妙射「笠死」企錯位的"施文"，巴西反勝二比一，不過入球功臣"朗拿甸奴"其後被指侵犯"米斯"，判罰紅牌被離場，英格蘭後段再換入"華素爾"及"舒寧咸"，不過仍破關乏術，最終以一比二輸波出局。
嘩，無枉費我曬左一個下午，支時巴西！希望他們繼續努力，不要令球迷失望啦。講開又講，我個人認為唔應該單方面睇一個人，係應該睇整隊球隊，一個人踢得好，唔代表整隊踢得好。不過當中亦要有好球員，唔係點攻破對方龍門呢！
我比較鐘意睇一些進攻型球隊，唔係咁鐘意睇防守球隊！因為死守，會令人覺得好悶！小女子喜歡巴西和其他女仔唔同，睇波唔係睇靚仔。我覺得D女仔只係睇"碧咸"個樣，都唔係睇波，又唔見佢地睇丹麥、西班牙、巴西等球隊比賽，令我有D唔開心，希望D女仔好似我或男仔咁唔係睇靚仔，係睇波就好啦！
在睇波期間，當巴西扳平對方英格蘭之際，有一班男仔巴西球迷即時彈起跳森巴舞，他們開心興奮的表情與動力，簡直表露無為，盡現眼前！(18:45 pm)
2002 年 6 月 18 日 (Tue) 英巴之戰
嘩，簡直係世紀之戰！六月廿一日英格蘭將會對巴西。哈哈，不要誤會，我只係講世界盃，唔係打仗！這場ball，一定好好睇，兩隊都各有實力，今次為左打入四強，他們唔係你死就我亡！究竟那一隊出線呢？今個星期五自有分曉。^0^ 小虎妹實在好緊張，唔知邊隊會出線耶~~ (19:15pm)
2002 年 6 月 7 日 (Fri) 睇世界盃！
小虎妹都幾鐘意睇世界盃架，尤其是巴西。雖然上屆他們輸左，令人好失望，不過我仍然支持巴西隊架！因為他們踢球的功架是我最欣賞的，而整隊球隊都尚算平均。 (19:30 pm)
2002 年 6 月 7 日 (Fri) 又大一歲啦！
小虎妹的生日不經不覺又過去了，話咁快又大一歲啦！之前與朋友一起慶祝，還收到好多不同類型的禮物！小妹在此萬二分感激她們所為我的安排！^o^ (19:15 pm)
2002 年 6 月 3 日 (Mon) 小虎妺生日^o^
昨天本來與朋友一同慶祝，但其中一個有特別事，所以改左明天。因此我與男朋友一起渡過，下午他送了一份禮物給我，還叫我即時拆禮物，於是我便開始拆，原來係一個銀包。接著我們夜晚一起吃元氣壽司，跟著他話返我屋企，好嗎？初時我覺得有點奇怪，不過我話好啦，返屋企吧！回到家都只係九點半左右，咁睇左一回兒電視，十一點他便說著要走。臨走前，我叫他返到家之後打比我。哈哈，手提電話響起了，不過好奇怪，來電顯示竟然係他手提電話no.，因為通常都係屋企no.而不是手提電話no.，於是我便問他，"為何你會用左手提電話打給我？他叫我出lift口睇下就知乜事架啦！我即刻走出去，真係見到佢喎，我見他拿著一大個盒，原來佢返完屋企取禮物再返來同我一起慶祝，當時真係好突然，我以為佢真係返左屋企，點知佢話想比個驚喜我喎！這盒禮物好大，裏面有幾份禮物，他叫我一份一份咁拆，第一份係一盒生日熊朱古力，之前我都送過比佢架，第二份係HELLO KITTY地鐵收音機，之前他買比我架，第三份係梁詠琪演唱會VCD，這份禮物係我之前提及過，而第四份係一個小型的陶瓷FOREVER FRIENDS公仔，係之前他買一隻FOREVER FRIENDS毛公仔時送架，他一併送給我，第五份，他說係一份大獎，要最尾拆，嘻嘻，原來係我鐘意既FOREVER FRIENDS錶，好靚好CUTIE架！
他突然其來的驚喜，真係令我好開心架！這個surprise，實在令我又驚又喜，開心都黎唔切！^o^
2002 年 6 月 1 日 (Sat) 口不對心！
唔知女仔係咪往往都係口不對心，她們每每都說自己男朋友不是，但其實心裏係好愛他。今日有位朋友問我：六月三日那天真係唔會同男朋友出去慶祝生日麼？我答係呀！我知自己心裏係想架！朋友們不段質疑，自己今本係想一齊與他慶祝，只不過扮偉大叫佢溫書，她們問我攪邊科，扭乜計喎.........講真果句，她們係說仲我心底話，我事實真的想一齊慶祝，不過唔知點解會無端端改變主意 (我問他，當日唔出叫他溫書擺了！他初時話唔好既，但後來亦比我說服左，討論結果係六月二日一次過同朋友一齊慶祝)。
2002 年 6 月 1 日 (Sat) 失望！
講開又講，昨晚睇果場世界杯，簡直越睇越火滾。法國對初哥上陣的塞內加爾竟然輸ball，唉，你地話呀........
我本身沒有鐘意邊一隊，不過睇下之餘亦估下邊隊輸贏。我初時就估法國win架，但點知爆冷門！
2002 年 5 月 20 日 (Mon) 心情不佳 >.<
唔知點解每次媽媽唔開心的時候，提及自己工作辛苦，好想唔做，但又要為家庭而工作，沒有辦法要做這份工作。我每次都忍不住喊了出來。其實自己亦好想為這家庭出一份力，但為何自己能力有限。雖然自己收入不多但自己亦盡量給與媽媽，我知道這些金錢係唔能夠滿足到媽媽的需要，不過亦好想盡自己的責任，錢固然重要，關懷亦不能缺少。每當聽到媽媽有埋怨，工作點樣辛苦，我的心總是覺得好難受.........好似"自己甚麼也幫不到她"。(事業，親情，友情，愛情，別叫我分先後次序，這四種對我來說缺少一種也不可以，任何一種都是這麼重要的。) 這可能，正所謂"家家有本難念的經"。每個家庭都有自己的生活背景。將來要建立自己一個家庭，對我來說，我想的確也不容易。
以前未出來工作之前，錢對我來講係無乜所謂，但自從出來工作之後，錢可以話對我來講係重要的。現實生活沒有錢的確難過活，錢賺來不易，但洗錢就好容易。小朋友點解會快樂，可能她們甚麼也不用想，尤其這一代的小孩子要甚麼，也有家人的給與。無論工作是否辛苦，得來的金錢總是有血有汗的，希望作為子女，也要多給與家人一點關懷。唉！今日真係多感慨！好想大喊一場呀！
2002 年 5 月 13 日 (Mon) 朋友生日大過天
其中一位姊妹因為生日那星期要去旅行，所以我們一班朋友預早與她慶祝！不過於慶祝前一晚，發生一件小插曲。哈哈，唔開心既事都係唔好再提。只要她記住唔好再嚇我地咁就得架啦！我想睇一件事往往唔能夠單方面去，而要多角度看清楚一件事。只要將自己代入別人的角色，可能觀點又唔同。
講開"拍拖"既問題。其實講真果句，我真係無日日掛住拍拖架。你估拍拖就可當飯食咩，日日放完工，咪返屋企，幫手做下家務，不過煮飯菜就無，只係負責洗碗！我放左工之後，通常喜歡自己做自己既野，例如聽下歌，上下網，睇下報紙，有時疲倦就訓番一覺。反而好少打比朋友傾電話，可能因此比人既感覺係 ──"緊係又掛住去左拍拖啦"。嘻！嘻！
2002 年 4 月 11 日 (Thu) 太令人失望！
今日看看體育版，點知好失望！係因為利物浦竟然輸ball，比利華古遜贏左晉身四強。真係不敢相信利物浦會遭淘汰！今仗奧雲仔實在太令人失望啦！
2002 年 4 月 1 日 (Mon) 返來啦！
唔經唔覺又去左三日旅行，這三日可謂"又晴又陰"，不過都好過成日陰天囉！
第一天，朝早食完午飯就安排我地去浸溫泉，不過我地就無去，為有影下相，睇下風景，見到兔子同雞仔，好得意好可愛，同佢地影左幾幅相囉。時間太多，所以入左一間餐廳食下野飲下茶。我想最唔好彩的是晚上去"圓明園"睇表演，又要"擔姐"著雨褸，攪到好狼狽，表演本來應該就好震撼，但奈何落雨，大部份節目都取消。所為表演的只有皇帝睇跳舞，炮彈震撼的場面全部沒有！算啦，鬼叫我地唔好彩咩。
第二天，去左"蠔"場，跟住去左"滑草場"，點知又驚唔咁滑落去！可能見到D人一扑一碌，所以唔咁滑落去囉。激死呀！其後去左騎馬添呀，我與他都係第一次騎咋，幾得意，幾有趣！到夜晚就到廣州"行街 ，住"華廈大酒店"，四星級都算OK啦！本來我地話出去買水返酒店飲，順道影下相，點知出到去有位細路女無端端插左兩枝花比我地，佢地話五塊錢一枝，好啦見佢死纏住我地，好啦，幫佢地買啦！點知，唉！又有一個細路仔要我地買喎，激死， 我地話不買啦，佢就由街頭跟到街尾，今次真係好心得濟囉，跟住晒，叫我地點算，我地又唔咁點樣喎，佢又只不過係細路仔，打佢又唔係，唔打佢又唔係，死跟難跟，一路行就一路跟，纏住晒，攪到我地無得影相，無計啦，我見周圍都無細路仔，咪幫佢買一枝囉！好啦，終於平靜，無人跟我地啦。無端端就比左十五塊錢買左三枝玫塊花，跟住咪繼續影相。
第三天，就去左睇"明治雪糕廠"，同埋到"香江野生動物園"玩，這個動物園都算幾大，不過時間始終不足，為有睇左D相睇既動物囉！最值得欣賞係裏面的"北極熊溜冰表演"，幾精采架，我地既團友都有份一齊表演架，嘻嘻！不過我果晚就滲囉，成晚無覺好訓，可能水吐不服，唔知食左乜，由零晨三點幾開始就嘔，嘔下停下，直至四點幾先返上床訓覺！好采第二朝無嘔咋，唔係就醜死怪，不過之後成日就無胃口食野囉！
今次旅程，雖然有好多特別事發生，但與他共渡三天旅行，我覺得係一件開心的事！我的收獲就係........買左一盆植物仔，佢叫"開心果"呀！幾得意，幾靚架！^0^
2002 年 3 月29 日 (Fri) 旅行啦！
昨日又朝做到七點三先放工，好耐都未試過咁疲倦！不過唔緊要，終於等到同他去旅行啦，好開心呀。不知返來香港有多少收獲呢？
2002 年 3 月 23 日 (Sat) 陰天 ^o^
今日星期六不用返工，不過係陰天！陰天真係令人覺得好悶。天氣成日不斷轉變，時晴時陰，時暖時熱，好鬼煩.......唉！攪到好多人都感冒！激死人！
他最近開始要溫書，所以每星期都只維持見一次。為左唔想影響他，為有係咁啦。我不想他為了拍拖而影響自己的成績。如果唔係我會內疚架，哈哈！這個規定係我自己定，可能初時會有些少唔習慣，不過我想會習以為常的。希望他工作同學業都一切順利啦，比心機，加油呀！嘻嘻^o^！
2002 年 3 月 20 日 (Wed) 睇醫生
好慘！今日喉嚨好痛，所以放左工出左去睇醫生！唔知點解放完工之後好疲倦，好想快D返到屋企睡一睡。唉，手腕又痛喎，真係激死！
2002 年 3 月 12 日 (Tue) 新經理，新作風！
今個星期開始轉左經理，舊經理掉左去第二個分行。唉，硬係覺得這個經理無乜親切感，一見佢就巳經感覺麻麻地。不過無計，公司係要咁都無辦法。或者熟落左之後會好些少啦！
2002年 3 月 8 日 (Fri) 好驚喜呀！
昨日本來都諗住放工就返屋企，點知當我踏進地鐵車廂的那一殺那，竟然見到他，我當然覺得好突然，先幾日他話約左朋友去打籃球，但點知又出現左我隔離。原來佢話比個驚喜我喎。他本先有打給我，但飛左去留言，奇怪！原來自己今日轉台，，不過望到仲有Orange顯示，仲以為未幫我轉添，點知巳經轉左啦！所以打與他又唔通，他打給我又唔通，唉，好彩他咁都搵到我咋，咪就等餐死！
跟住一齊去左報團。今次又係去大陸，不過唔同地點唔同人物。今年復活節有旅行去，仲係第一次與他去外地旅遊 ^o^。
2002年 3 月 1 日 (Tue) 放假睇左場戲
今日放假，而媽媽又放假，咁咪去睇戲囉！今日終於睇左"我的野蠻女友"，哈哈，果然真係好鬼.......野蠻喎！如果現實之中有咁既野蠻女朋友，咁就真係戥個男仔慘囉。
嘻嘻，最近想玩的又玩完，想睇的又睇完。不過我想再踏多次單車，好好玩呀！
2002年 2 月 26 日 (Tue) 中國情人節
一年一度的年宵佳節，今日又係中國情人節，戲院一定好多人，而且近日又做推廣期，逢周二、三.......廿五蚊咋，唔怪得知勁多人去睇啦。
2002年 2 月 23 日 (Sat) 行街街買衫
今日放左工出左旺角行街街買靚衫，嘻嘻，未出糧就瘋狂購物！不過無計啦，屋企無乜靚衫麻。
跟住陪同事去花墟買花盆。嘩，D蘭花好靚呀.....其實都好想買番盆放於家中擺設，不過好貴呀！
2002年 2 月 18 日 (Mon) 又返工啦
新年之後，第一日開工。今日雖然好少證，但係好少人返工，得四個人做野，時間過得好慢，又眼訓，真係慘！
2002年 2 月 16 日 (Sat) 去旅行
今日去旅行，好開心呀！^o^
2002年 2 月 15 日 (Fri) 拜年
今晚會去他屋企拜年，有幾個親戚還未見過，有些少緊張添，嘻嘻！
2002年
2 月 14 日 (Thu) 情人節 好浪漫呀!
昨晚同一班表哥表妹一齊去唱K由十一點幾唱到兩點幾，我仲拉埋他一齊去呀，真高興，不過他就好累，因為之前果晚佢又同屋企人打麻雀至零晨三點先訓，擒晚又叫左他出來陪我玩，加上佢又有少少頭痛，攪到佢好累添，嘻嘻，真係唔好意思。不過，佢話比我知好想見多我幾面喎，哈哈！最後，攪到零晨四點先返到屋企訓呀。
今朝一訓就訓到十點鐘紮醒左，跟住就同屋企人飲早茶，下午就同他一起睇戲"嚦咕嚦咕發新年財"，講起這套戲，我覺得無我想像中咁好睇。算啦.....都係想睇華仔既戲咋麻！好啦，你地估下我地點樣渡過一個浪漫的情人節呢？嘻嘻，我咪同佢一齊煮飯仔囉，好喜歡同佢一齊煮飯仔的感覺，幾好架！幾浪漫架！我仲買左一個心形蛋糕仔一齊食。你地又估下我送左乜禮物比佢呀.....係一個銀包，而他就送左一條黃水晶吊咀頸鍊比我，好閃好靚，好開心，開心係因為他付出時間去為我揀選禮物，所以無論什麼我都會咁開心架。今年與他第一年慶祝，我會永遠記住這一年開心的日子。
2002年 2 月 12 日 (Tue) (大年初一) 新年快樂^o^
今日係大年初一，首先同大家拜過年先，新年快樂！有利是逗，好開心呀......同屋企人拜過早年，吃吃飯，沒有地方去添，好悶耶。明日又係拜年，同婆婆一班親戚吃完飯，跟住咪返屋企囉！年年如事，拜拜年，吃吃飯，傾傾計，咁就放左一日假，好快又返工。
哈哈，唔知今年逗左幾多利是呢？
2002年 2 月 10 日 (Sun) 放假大過天
新的一年又到，有甚麼願望呢？我就希望全世界順順景景，經濟一帆風順！世界和平！
明天是一個團年的節日，家家慶團圓，非常高興！而我又開始放假，好開心呀。今年未新年就收到一份禮物，係溫暖牌(Super Warm)。好溫暖架！
2002年 2 月 8 日 (Tue) 工作繁忙
今天放工返屋企，好累呀！好想快D放假，今日有六百證，實在好勁。之前平時咪三百左右，唉，做死人咩！好啦，返埋明天就開始放假，太好了。一連放九日，休息下都好！新年，拜拜年，逗逗利是，年年如是，真係有些少悶呀。
2002年1月26日 (Sat) 姊妹生日大過天
哈哈，好久沒有在這兒寫寫日記！有無掛住我呢？唔經唔覺又過一年啦。今年二零零二年第一次在這兒同大家見面，首先同大家講聲新年快樂！
昨晚，同一位好姊妹慶祝，見她好開心呀！原來開心的並不只有主角，同她慶祝的也同樣有著開心的感覺。見她拆禮物那份開心的情景，我也同樣戥她高興。
