Forum

Action
Links
Arşiv
 
Land

THE TURKISH ARMY OFFICER AND GOVERNER ARE NOT ABOVE THE LAW


Dersim carte

JİARA PAÇIKINE

Dersim Forum

Auteur - yazari: Tornê Amık Gêwere, Usiv Tarih, gün ve saat : 08. Nisan 2005 00:25:04:

Haq çı dano xêr bıdo
Lesa mı biye gıran esmo hewn de
Hardo dewres bın de nala
Ro ame xağunê mı
Ez oroşiyune ra

*
Vaze xêr bo
Esmu mı hewnê di
Asmen mı sero bi hira
Hewrunê awru ho davê we
Theyr-thurê na dina u a dina
Dormê mı guret
Zonê mı de zon da

*
Vaze xêr bo
Zonê mı beno gıra
Mezgê mı beno hope
Goni zerrebele ra oncina ra
Jiara Paçıkıne diye mı
Gıraniya hewnu vere
Zarrê mı bi qeyim
Awrêsu verda vergu dıma

*
Hewn hewno
Biyene ra nêyeno hurê
Bê hewnu ki nêoncina na dina
Ez qadaê hewnu bıceri

*
Hewn de mezgê isoni zon dano
Pêro zonu zoneno
Hewn de zon jil dano
Her hêkmete ki vano
Çêver beno ra peê çêveri de

*
Ez hurendiya ho dero
Jiara Paçıkıne hurendiya ho de
A uza araq dana, ez naza
A uza bereqina, ez naza
Dina bınê hewni dera

*
Esmu mı hewnê di
Vaze ke xêr bo
Astarey rışiay hurendiya hora
Hozor pıreni de reng da na dina
Bulısk da, bereqia ra
Nişt paçunê khanu ra
Nişt paçu ra
Paçi nişt destu ra
Lau ra pêlekhu ra
Pırenu thuruku ra

*
Sımara sa vaji nêzonon
Hewno nianen nêamo diyene
Hardê ho gıran vi
Asmenê ho gıran
Tu vana ro ont gula mıra
Sewda yena
Hetê ra gıra gıra
Bınê çewres hewnu ra sewda yena
Fek giredao
Venge ho sono zarrê hora
Heni honık
Sewda muleçıkuna
Barkerdene yena ra mı viri
Qese ke muleçıku ra bi ve ra
Eve lerze
Jê kelê tencıki
Qaxi yene ra mı viri
Qaxê sou, qaxê muriyu, qaxê sokeku
Lauka muleçıku
Ana isoni viri
Zelemela domonunê soykheku
Zelemele
Heni düra düri
Dana vatene sıngu, koreku
Na lerza muleçıku veng dana phepugu
Bervisê dergusu
Barkerdene ana ra mı viri
Jü ki paçıku
Paçunê khanu
Gılê Jiara Paçıkıne de
Paçunê bê wayiru

*
Bervisê verg u miye koti vi têwerte
Riyê ey de hêştiriyê aê
Riyê aê de hêştiriyê ey
Hêgaê nêmezeti ca verday
Ax u vaxê dara mojêna vêsaiye de oreşiyay...
Oreşiyaene ra qefeliay
Dı gay
Dı gaê çarebeşi
Vıle de nire, peniye ra hengaji
Bırro, tırro, vıroji
Feteliyay
Tiji, asme gos nêda feteliyay
Feteliyaene ra qefeliyay
Vıle de guna hêgay
Guna hegaê nêmezeti
Dina ra herediyay
Bervisê miye u vergi de
Yinu ki ca guret, oreşiyay
Hay hay morro polat hay hay
Qe hewn de vê
Hurd thirakê mı thereqiyay
Muroji girede weşiya mı
Verva na kay
Hay hay morro polat hay hay!

*
Hewno, hewno, hewno, meterse
Gao de kamıl naleno bınê hardi de
Xori ra jê vengê astaru yeno vengê ho
Hurendi bêli niya
Pay no cı, vêrdê ra nêzonoğu
Hay hay moro polat hay hay!
Jiar u diari pers kenê namunê hu
Cüav nino caê ra
Cüav nino caê ra
Cüav bıdo, qul dano
Qul çino caê ra
Jiar u diari namunê ho pers kenê
Heni eskera feteline hetera herepıski
Bınê hardi de hewnê ho nino
Bê tersu nêşikina bıfeteliyo lüe
Zarreveri kuna
Nalena, nalena, nalena
Hay hay morro polat hay hay!

*
Nu hewno
Nata dota nêçerexnino
Heni zarreqeyim
Heni koka huske sero pelgo khewe
Jiara Paçıkıne
Nişte ro hurendiya ho de
Dı leê ho jê dı boji
Serê dı qilu de nay ve ro
Kerd çot vılê ho
Berve vınete jê domonu
Berve vınete
Araq da şêşt hozor pelgu
Berve vınete
Gılê azunê ho de şêşt hozor lay bervay
Berve vınete
Vıle de guna çewres azu
Çewres azune bêmınetu
Ni meştiye ke rişiyay şi
Zayi bi wertê jilune bê bınu
Yinu sere berve
Vıle de murode domonunê soyi
Tholunê husku ra rişiyay
Hêştiriyê bêmurodu
Hêştiriyê gaunê hengaji
Hêştiriyê miy u vergu
Dare lerze
Tewraniye gurete
Murojiye girede
Heni ho ho de
Heni bınê pakay de
Verva tija peroji de
Vore
Hewnê bınê hardi
Onti serê hardi
Çhemunê na dina u a dina
Ser de şi
Qulo ke 40 hozor serra aê ser ro bervo
Honde yinu berve Jiare
Çımi bılakiyay ra,
Çımê quli ´ve theyr u thuri
Çımê kêmer u kuçu
Ez heni xori hewn deru
Vorekunê belekunê soykkhêku
Damis nêda
Eve hozor dıdonunê thuzu
Xıray
Loay bêvengena mıra
Ciranenê!
Ciranê zarrê jü kozik
Mı esmu hewnê di
Hasarê ho vê
Thari çêverê sıma mecero
Honde ke ez hewn dero
Mı dest de niyo
Vinon oncia hewnunê nianenu


Tornê Amık Gêwere, Usiv
Çhımê: WARE, Pêseroka Zon u Kulturê ma: Dımıli-Kırmanc-Zaza


 

 


 

 

Cevaplar:
 

Dersim Forum
 
 

Hosted by www.Geocities.ws

1