'A livella

Ogn'anno, il due novembre c'è l'usanza
per i defunti andare al Cimitero.
Ognuno ll'adda fa' chesta crianza;
ognuno adda tenè chistu pensiero.

ogn'anno, puntualmente, in questo giorno,
di questa triste e mesta ricorrenza, anch'io ci vado, e con dei fiori adorno
il loculo marmoreo 'e zi' Vicenza

St'anno m'è capitata 'n 'avventura...
dopo di aver compiuto il triste omaggio
(Madonna!), si ce penzo, che paura!
ma po' facette un'anema e curaggio.

'O fatto è chisto, statemi a sentire:
s'avvicenava ll'ora d' 'a chiusura:
io, tomo tomo, stavo per uscire
buttando un occhio a qualche sepoltura.

<<QUI DORME IN PACE IL NOBILE MARCHESE
SIGNORE DI ROVIGO E DI BELLUNO
ARDIMENTOSO EROE DI MILLE IMPRESE
MORTO L'11 MAGGIO DEL '31>>.

'O stemma cu 'a curona 'ncoppa a tutto...
...sotto 'na croce fatte 'e lampadine;
tre mazze 'e rose cu 'na lista 'e lutto:
cannele, cannelotte e sei lumine.

Proprio azzeccata 'a tomba ' e stu signore
nce steva 'n'ata tomba piccerella,
abbandunata, senza manco un fiore;
pe' segno, sulamente 'na crucella.

E ncoppa 'a croce appena se liggeva:
<<ESPOSITO GENNARO NETTURBINO>>
Guardannola, che ppena me faceva
stu muorto senza manco nu lumino!

Questa è la vita! 'N capo a me penzavo...
chi ha avuto tanto e chi nun ave niente!
Stu povero maronna s'aspettava
ca pure all'atu munno era pezzente?

Mentre fantasticavo stu penziero,
s'era ggià fatta quase mezanotte,
e i' rummanette 'nchiuso priggiuniero,
muoro 'e paura... nnanze e' cannelotte.

Tutto a 'nu tratto, che veco 'a luntano?
Ddoje ombre avvicenarse ' a parte mia ...
Penzaje: stu fatto a me mme pare strano...
Stongo scetato... dormo, o è fantasia?

Ate che fantasia; era 'o Marchese:
c' 'o tubbo, a caramella e c' 'o pastrano;
chill'alto appriesso a isso un brutto arnese:
tutto fetente e cu 'na scopa mmano.

E chillo certamente è don Gennaro ...
'o muoro puveriello... 'o scupatore.
'Int' a stu fatto i' nun ce veco chiaro:
so' muorte e se retireno a chest'ora?

Putevano sta' 'a me quase 'nu palmo,
quando 'o Marchese se fermaje 'e botto,
s'avota e, tomo tomo... calmo calmo,
dicette a don Gennaro <<Giovanotto!

Da voi vorrei saper, vile carogna,
con quale ardire e come avete osato
di farvi seppellir, per mia vergogna,
accanto a me che sono un blasonato?!

La casta è casta e va, si, rispettata,
ma voi perdeste il senso e la misura;
la vostra salma andava, si, inumata;
ma seppellita nella spazzatura!

Ancora oltre sopportar non posso
la vostra vicinanza puzzolente.
Fa d'uopo, quindi, che cerchiate un fosso
tra i vostri pari, tra la vostra gente>>.

<<Signor Marchese, nun è colpa mia,
i'nun v'avesse fatto chistu tuorto;
mia moglie è stata a ffa' sta fessaria,
i' che putevo fa' si ero muorto?

Si fosse vivo ve farrie cuntento,
pigliasse 'a casciulella cu' 'e qquatt'osse,
e proprio mo, obbj' ...'nd'a stu mumento
mme ne trasesse dinto a n'ata fossa>>.

<<E cosa aspetti, oh turpe malcreato,
che l'ira mia raggiunga l'eccedenza?
Se io non fossi stato un titolato
avrei già dato piglio alla violenza!>>

<<Famme vedè... piglia sta violenza...
'A verità, Marchè', mme so' scucciato
'e te sentì; e si perdo 'a pacienza,
mme scordo ca so' muorto e so' mazzate!...

Ma chi te cride d'essere... nu ddio?
Ccà dinto, 'o vvuò capì , ca simmo eguale?
...Muorto si' tu e muorto so' pur' io;
ognuno comme a 'n'ato è tale e qquale >>.

<<<Lurido porco! ... Come ti permetti
paragonarti a me ch'ebbi natali
illustri, nobilissimi e perfetti,
da fare invidia a Principi Reali? >>

<< Tu qua' Natale... Pasca e Ppifania !!!
T ' 'o vvuo' mettere 'ncapo .... ' int ' a cervella
che staje malato ancora 'e fantasia?
'A morte 'o ssaje ched' è? ... è na livella.

'Nu rre, 'nu maggistrato, nu' grand'ommo,
trasenno stu canciello ha fatt' 'o punto:
c'ha perzo tutto, 'a vita e pure 'o nomme:
tu nun t'hè fatto ancora chistu cunto?

Perciò, stamme a ssentì ... nun fa' 'o restivo,
suppuorteme vicino ... che te 'mporta?
Sti ppagliacciate 'e ffanno sulo 'e vive:
nuje simmo serie ... appartenimmo à morte! >>

Ll' ammore

Ll' ammore è comme fosse nu malanno
ca, all' intrasatta, schioppa dint' 'o core
senza n'avvertimento, senza affanno,
e te pò ffà murì senza dulore.

Felicità

Felicità !
Vurrian sapè ched' è chesta parola,
vurria sapè che vvò significà.
Sarrà gnuranza 'a mia, mancanza 'e scola,
ma chi ll'ha ntiso maje annummenà.

'A vita

'A vita è bella, si, è stato un dono,
un dono che ti ha fatto la natura.
Ma quanno po' sta vita è 'na sciagura,
vuie mm' 'o chiammate dono Chisto ccà?

E nun parlo pe' me ca, stuorto o muorto,
riesco a mm'abbuscà 'na mille lire.
Tengo ' a salute, e, non faccio per dire,
songo uno 'e chille ca se fire 'e fa'.

Ma quante n'aggio visto 'e disgraziate:
cecate, ciunche, scieme, sordomute.
Gente ca nun ha visto e maie avuto
'nu poco 'e bbene 'a chesta umanità.

Guerre, miseria, famma, malatie,
crestiane addeventate pelle e ossa
e tanta giuventù c' 'o culo 'a fossa.
Chisto nun è 'nu dono, è 'nfamia.

'A speranza

Ogne semmana faccio 'na schedina:
mm' 'a levo 'a vocca chella ciento lire,
e corro quanno è 'o sabbato a mmatina
'o totocalcio pe mm' 'a ji ghiucà

Cuccato quanno è 'a notte, dinto 'o lietto,
faccio castielle 'e n'aria a ceentenare;
piglio 'a schedina 'adinto 'aculunnetta,
'avoto, 'agiro, e mm' 'a torn' 'a stipà.

Io campo bbuono tutta 'na semmana,
sultanto 'o llunerì stongo abbacchiato,
ma 'o sabbato cu 'a ciento lire mmano
io torno n'ata vota a gghi' a ghiucà.

Nun piglio niente, 'o ssaccio ... e che mme mporta?
Io campo sulamente cu ' a speranza.
Cu chi mm'aggia piglià si chesta è 'a sciorta,
chisto è 'o destino mio... che nce aggia fa' ?

'A quanno aggio truvato stu sistema
io songomilionario tutto ll'anno.
'A ggente mme po' ddi': Ma tu si' scemo?
Ma allora tu nun ghiuoche pe' piglià?

Si avesse già pigliato 'e meliune
a st'ora 'e mo starrie già disperato.
Invece io sto cu 'a capa dinto 'a luna,
tengo sempre 'a speranza d' 'e ppiglià.