Dipa Ning Alti
(Meangu King "Mataram A Laram"
at "Sinagiwang
Langib")
dipa ning alti inyang aku
pinilit
mung
mamanikan
bang kanita
ipakit
kekang
mariposa
at king kakung gagad
siklu ke ing timba menamalid agad
libutad
ning albug, karimlan at uran
pekikwanan kung mukyat king kekang eran
kabusni ning pasbul ikwa kung mebigla
kekang mariposa kambubulag ya p'la!
dipa ning alti kanitang likwan mu
kung
bigla ampon mebating ala mang nanung
pamun. meliswas meng likasan ing sale
ning lugud at kekang pekilibe bale
ining atap pinaud sasa king yerung
bubungan na bandang tawli kinatmung
kalawang uli na ding benging likuban
gagalgal la dimla pagkeran ulunan.
dipa ning alti kanitang kalat-salat
lang mangapkap manyaliksik mung gamat
pekipaten ing mabasang mimulagat
sinagiwang langib ning mipaldan sugat
at kinayud meng makutkut ing makiput
balugang lunggang malalam at malumut
karin selikut kalame ubing pagkaymut
na munang mesarul kakambal ing takut.
|