|
”BUNGA SASA"
ing pamagat ning
libretang sinulat ku pauli na ning aku anak kung mibait Sasmuan
(Sasa-muan) na dati mas balu o kilala ya king awus a Sexmoan.
Inyang malati
ku, maski nukarin manakit kung sasa. King pampang da ring ilug. King
gilid da ring pilapil. King kilub da ring playsdan. Karing sasa,
maglungga la ring ema lalu na ring malutung matangal
ampo ring mangaragul a bulik. Karing sasa,
sasalilung la reng miyayaliwang ayup antimo reng uwis, tika, maria
kapra, kanugtug, bako bengi, tikling, kanisig,
talamuri, pasdal, pasawa, pipit, denas, baka-baka, sibad, bulan dagat,
pariuk-pariuk, tarat, tankiring, peskarul, kandungango
at dumara.
Karing sasa, marakal a
talangka,
damuku, gurumeti, lukban,
parus-parus at tugak. Atin
mu namang barak, timbambarak, dagis malutu, kamamalu, kanunugak,
palaspas at bitin. Atin mu namang tutubung
balanggut, tike, dalwari, lagulu, water lily at saka palapat ampong
bako. Nung ring sasa sangtuaryu la
karing asan danum ampong ayup
santungan na noman ning tau ring sasa king aldoldo pangabiyayan.
Liban kayni, marakal ku abalung
miyayaliwang klaseng pamanyakap asan, antimo reng patukba, paluwe,
paduwas, kitang, pintul, panti, sakag, salap, bukatut, dala, salakab,
pasabal, baklad, galadgad, kubkub, bunbun, biyakus, iskrin. Kareni makakwa
o mararakap la reng bulig, bundaki, biya (biyang puti, bakuling, kuwayan, bangenge)
palus, igat, talunasan, kanduli, itu, tilapia, ema, alimasad, talangka,
bangus, paro (buntukin, alamang, dapil, suwai, sugpu, ulang,
salamantorak), dulum, likauk, suluwi, pingo, samaral, liwalu, sapsap, badbad,
karpa, karag, ampo na reng gurami, balulungi, malibasan at kalibukab.
Ibalik ku karing sasa,
aku medagul ku libutad
ning kabiyayan manibat karela.
King gulut bale, sasa lang mangatas ampon mangaragul. Mapilan karing
panagdag bye manibat king sasa ilapin ding makatuki: ing mayumung tuba
king tukil, ing aslam king tapayan, ing tulud a banus suman, ing
pinaud a panatap bubungan, ing tingting a pamalis, ing palapang
panangab, ing
manyaman a
bunga sasang linutu king arnibal
ating mabanglung bulung pandan
at ing bunut
butakal
a panisis
dalig, eran ampon kuran.
 Ing bye ku minasa at mebiasa ya libutad at palibut ning amanung sasa.
Aku ing anak Sasa-muan. Aku ing Bunga Sasa.
Tony Mercado Peña
nombresin
|
