Di hevpeyivînekê di hejmara nû ya kovara NIVÎS de helbestvan Ehmed Huseynî diyar dike ku ev nêzî du salan e ku wî dawî li nivîsîna helbestan aniye.
"[M]in beriya du salan di Dastanê [Dastana Şêx Ehmedê Huseynî - helbestek Huseynî ye /Mehname] de dabû xuyanîkirin ku ez êdî nema helbestê dinivîsînim", Ehmed Huseynî diyar dike.
Lê Huseynî mixabiniya xwe tîne ziman ku ev peyam a "di wê helbestê de [ya] çend raz û peywendiyên nehênî" heyî negihaye xwendevanan. Lê "sed heyf û mixabin ku ji bilî mirovekî yan jî xwendevanekî [ti kesî] ev daxuyanî wernegirt", Huseynî dibêje.
Dixwiye ku Ehmed Huseynî naxwaze zêde li ser biryara xwe gengeşeyê bike. "Bi rastî ... hîç gêwlê min û peyvê nîne. Ez bi zorê dipeyivim, xwezka te [hevpeyivîn] bihişta careke din", ew radigihîne.
Huseynî di heman kurtehevpeyivînê de dîsan helwesta xwe ya reşbînane hemberî berhemên wêjeyî yên kurdî tîne ziman. Lê mixabin ti pêşniyazên konkret û berdest arasteyî me nake.
