Mesela Hesê Budelay u Miri
M. Tornêğeyali
Heso Budela ve Miri ra
Heso Budela ya ki Heso Qardas, Lolızo, hetê Pulêmeriye rao. Heqa
Miri de qesey kerdo, cı ra qesey vatê . Ni qesey sonê, resenê gosê
Miri.
Rozê, Mire Hesê Budelay dewe de pêy cêno. Vano, “lazê kutıki, to
çıko heqa mı de qesey kena? To zanena, mı heqa to de qerarê merdene
(darde kerdene) veto?”
Heso Qardas vano: “Ağa, Hes budelao, ravêr têpa qesey keno. Hama to
de qe adalet çino? Coru ceza nianêne bena?”
Mire, tenê fikirino, vano, “mırê gaê biya to efkeri.” Heso Budala
vano: “Ağa, to de qe meremet çino? Hes feqıro, koti ra gay bıvino?
Hama wad bo khe, torê kavırê biyari!”
Mire vano: “Peki! Key ana?” Heso Budela vano, “wertê ses asmi de
anu.”
Roji vêrenê ra. Heso Budela, khaviri berdene, keno xo virri ra.
Rozê, yeno ra virri. Cêniya xora vano, “khavıri tever ke, bicêri,
şêrri.”
Heso Budela khavıri cêno, sono. Eke kuno nejdiyê dewe, zırçeno,
qırreno, vano: “Vozdê, dano sımare?” Xızmetkari, vozenê, sonê,
xevere danê Miri.
Vanê: “Heso Budela khavırê têy ro, hao dot ra yeno.” Mire vano:
“Şêrê xo wedarê, Hesê Budelay khe, khavır kerd gore, sıma bıtırê,
berê, wedarê.”
Heso Budela, khavıri erzono gore, sono lewê Miri, vano:
“Ağa mı khavırê to ard.”
Mirê vano: “Lazê kutıki, ses asmi vêrdi ra, xona ame ra to
virri.”
Heso Budela vano: “Ağa, Hes feqıro, mı xundê di.”
Mire, xızmetkaranê xora vano: “Ero, ala şêrê, qaytê khavıri kerê,
seneno?” Xızmetkari sonê, pêyser yenê, vanê: “Ağa khavır, mavır gore
de çino.” Mirê, hêrs beno, zırçeno, vano: “Ero, lazê kutıki, to mı
qan kena, khavır kuyo?”
Heso Budela:
”Ağa, fısqi ağme meke!
Khavırê mı, vorekê miyo,
Asma payıza werti de biyo.
Mı khe na diyar de ard,
Der u cirananê to, pêrune diyo,
Gora tora khe tıriyo,
Qe thalasê mı de niyo” vano, wurzeno ra sono.
Çıme: Mıstafaê Keşki
Nustoğ u qeydkerdoğ: M. Tornêğeyali
Tarıx u ca: Amnan 2002, Miandonıke/Mazra Sılemanu /Pulemoriye
