Auteur - yazari: Hawar Tornêcengi Tarih, gün ve saat : 24. Aralik
2005 02:07:01:
ŞEVDİNO
Saê mı, Şevdino, şêrê mı Şevdino[1]
Saê mı ,mı va meso ko ra
Vake, ”Bao ez son, sandıqa dewlete ra marê ayliğ vecino”
”Bıko aylığê hukmati fincana ağuyo nêsımino”
Yêre (davadavê) varasaniyo
Filintê (tifangê) şêrê mı cêriyo, kıle dano[2]
Bao era mı ver mekuye
Lazê Welê Khali[3] peyê kemere de merediyo ra
Mı ver ra niyo, mı ser rao
Cêniya Welê Khali vana ke, “Kêlê gêrmi girino
duman peyê bonê ma dero, no ke esto, dumanê qafika mino.”
Ca:Dêsmu
Çıme:Khan
Vatoğe:Elifa Usdami
Areker.Lazê Elifa Usdami
Nustoğ:Hazar Ali
[1] Hewa Şevdini ya, ez guma tırki de “Şemdinli” vajino. Tertelê
Urişi de sarrê Dersimi çıtur xover do, na lawıke de rındek yeno ra
zon. Na Ceng de Dersim ra 7-8 Mordemê cıra-ameyi şêhid biyê. Ninu ra
ju Sa Heydero. O ve xo Sayir hewl biyo, Lawıka „Erê Canê Canê“ ra
naskeme. Vatene ra gore ki zamaê Seyqaji biyo, hama az cıra
çinebiyo, çı hêf ke dina xo zaf rew vurna. Waxt ke ame, lawıkunê dey
ki keme eskera. O bin ki Xelil Bego, Hewa Xelil begi ey sero vajina.
Cêr mı 2 Varyanti arşiv ra kerdi ita ke, tı tey niadê, hala na
lawıke kami u çınay sero vajiya bıvênê. Na lawıka Şevdini sero nustê
de mıno derg esto, hama hem hona nêmezeto, hem ki ita caê xo niyo.
Mı wastêne ke rozê Formumê de maê Lawık u Sanıku zovina bo ke, maê
ke na gurey sero alaqadarime bêrime ju ca, u sero bıfikirime.
[2] beno ke ita de “kıle dano” nê, “kıle nêdano” bo.
[3] Weliyê Khali aşira Lolunê dewa Dağbegi rao. Eve çhêrên u
khamoriya xo mordemo de nasbiyaiyo. Vanê; 7 lazê xo eve qersune amê
kistene. Ju laze xo ki hervê Urişi de Şevdin de amo kistene. Ju lazê
xo ki Qewğa Lolu u Bolu de, ju ki Bolebanu ra çêneke remna, peyra
nove pa, gıno cı, kişiyo. Lawıki sero vajinê, jê „Lawıka Usıvi, Hewa
Dağbegi“.
Hawar Tornêcengi, 24.11.2005, sate 02.02 de
ŞÊVDIN (Lawıka Sa-Heyderi -varyant-1)
Saê mı Şêvdıno, bıra bıra Şêvdıno
Sodıro tiji zereq do, bıra tıfong erjino
Pêrodê ma pêrodime
Namusanê Cuamorduno, namusanê cuamorduno
Bıra, urzê usılê dina ra pêrodê ma pêrodime
Urıs zofo, qersuna mın u tora nêqedino
Bıraê gori, vanê xevere ama Dursın kişiyo
Sa-Heyder dırvetıno, Sa-Heyder dırvetıno,
Vano, Dursın vano çor kılamu ma ser vaze
Bıra namê u vengê ma düna ra bırino
Bıra wey tıra xover mekuye, tora têpia estê dı bırayi
Mıra têpia az çiniyo, mıra têpia az çiniyo.
Usılê düna ra pêrodê ma pêrodime
Sandıqa dewlete ra milonê aylığ vêjino
Bıra eve aylığê dewlete sa mebe
Zeyiro nêwerino, fincanê ağuyo nêsımino
İsmayil Komser Efendiyo dano wendene sandıqa dewlete sero
Başte Sa-Heyder wanino, başte Sa-Heyder wanino.
***
Şêvdino, bıra bıra Şêvdino
Mustefa Beg qoriyê Hêrdifi werte de durva naro
Durva ra fikirino, durva ra fikirino
Xıremalo Sao Qero çhek esto xo dest
Mevzunê kiafiri ra fetêlino, dormê mevzunê kiafiri de xo tadano
Torê Saê Qerê mı ke na tore bo
Kokê ordiyê kiafiri ano, kokê ordiyê kiafiri ano
Heq ke bojiyê Saê Qerê mı bijêro
Pılemoriye kiafiri nêdano, Pılemoriye kiafiri nêdano
Vano Pılemoriye de pers kenê,
Cephê Arêzano, cephê Arêzano
Cısnê çê Mıstefaê Heseni,
Bıra cısnê şêrano, bıra cısnê şêrano
Koti ke nişt ro, ya namus cêno,
Ya ki sarê xo dano, ya ki sarê xo dano
Oxe ra Mursao, destê Meydanu ra qama onta we
Voz do mevjiyê kiafıri, tede “hala hala!” vano.
Pane pane pane
Sayirê hometa Kırmanciye pane
Vas vejiyo boy ve boyi
Çiçegê koyi sane, çiçegê koyi sane
Sayirê mı ko qayilo,
Mırdi pıra bıwane, mırdi pıra bıwane
Êlçi bırusne Setero vêsae
Maa mı kokıma Sare, maa mı kokıma Sare
Nêvındo bêro weşiya mıde vazo
Çor kılami şin u şüare, çor kılami şin u şüare
Vaze bıko riyê na düna de çetına
Aci u tharva cigera hare, aci u tharva cigera hare
Meyitê Dursın u Sa-Heyderi ra ardo
Ondêro Hêrdif de bınê şiya viale
Vana cigerê mı wertê dost u dısmenio
Usılê düna ra bınale, usılê düna ra bınale
Qersuna Sa-Heyderê mı xırav gına cı;
Golımi serde lifê sale, golımi serde lifê sale
Vano khılê pê olımê Heqi kês sa nêbeno,
Kiafır koto qeza, qeza kerda thıp u thale, qeza kerda thıp u thale.
***
Sa-Heyderê mı Şêvdıno,
Ondêr ve hêga, Saê mı hêga
Khılê kınconê mı bışuye, destê Heqi
Sodır some marava, sodır some marava
Ma u piê xuyo kokım mı eşto zere
Sero çêver do ca, sero çêver do ca
Khılê meberve, qenterê xo ma besto tê,
Dorği some Kêrbela, dorği some Kêrbela.
***
Saê mı Şêvdıno
Ax de bıra kasê suri, ax de bıra kasê suri
Khılê kınconê mı bışuye destê Heqi
Some marava kiafiri, some marava kiafiri
Dame pêro - pêro nêdame; kiafiro
Hudut ra nêfime duri, hudut ra nêfime duri
Khılê hao ke na serru, na zaman de kuno qewğa
Kuno kıla adıri, dorği kuno kıla adıri
Heqa na deqa rê
Coru welım nêame ra ma viri, welım nêame ra ma viri
***
Saê mı Şêvdıno
Ondêr cade sono ko ra, cade sono ko ra
Sa-Heyder qedrê cênciye bızone, düna de tı zu laza
Merdena zu lazi xêle zora, merdêna zu lazi xêle zora
Zovi cuamordi tıma mırenê
Tora ewlad çino, uzağkora, tora ewlad çino tı uzağkora.
Ondêr Şêvdıno
Saê mı sera cerde, Saê mı sera cerde
Êlçi bırusne Setero vêsae
Sa-Heyderê mı dırvetıno golımi serde, Sa-Heyder dırvetıno golımi
serde
Vano Heq kenê meyitê Dursıni hêfo
Wertê Mewrani de cameverde, wertê Mewrani de cameverde.
--------------------------------------------------------------------------------
Vatoğ: Lazê Hesenê Aliyê Hemedi
Arêker: Hawar Tornêcengi
--------------------------------------------------------------------------------
SÊVDIN-3 (Hewa SA HEYDER`I)
Sêvdino Sevdino, Saê mı Sevdino
Vengê top u mitrolzu sera nêvinino
Sodiro tij zerreq do, tufong erjino
Daê qırr keme - qırr nêkeme, zafo nêqedino
Daê hên ke peyra yêno, seke sakil daru ra rışino,
Miri durda gureta, pusla ra niadano
Vano: Khalo Sipe ke bijero bojiyê Saê Qeri
Sao Qer kokê Urişi ano.
Saê mı ke wes bımano, Pulêmuriye Urişi nêdano,
Daê kafiri qırr keme - qırr nêkeme, zafo nêqedino.
Sevdino Sevdino, Saê mı dale
Dursin kişiyo, Saê mı dırvetino, ardo şiya viyale.
Vano; dormê ma dısmeno, qeda usıl bınale
Qersuna Saê mı verde gına cı, peyde ama lifê sale,
Sey Qaji vano: Heyranê zamayê xo bine
Dızmunê vili, asırmunê serê sale
Qersuna Sa Heyderê mı verde gına cı, peyde ama lifê sale
Daê ma dame pêro, wetanê xode...
Pane pane, ma panime
Dewlete de sano, Kirmanciye de namuso
Sa Heyderê mı usıl bınale, dormê ma dısmeno wuzo.
.......
Yimiskar: Seyqaji
Vatoğ: Bedri Bava
Arêker: Hawar Tornêcengi