DIRBETINÊ DAYÊ
KOYO BERZ
Dayê, zeri tenıkê, lê bêkesa mı dayê.
Zana fına Dejal har biyo lê dırbetınê.
O yo diyardê kemeri ra herşan keno lê.
Wazeno fına goniya ma bırıjno sêkürê.
Bureno, geyreno gani, nay weş bızanê.
Cordı kemerdê ma serra jewser war beno.
Warê bawkalandê ma talan u wêran keno.
Hele dayê bê zeri u zere ra vacı qısanê xo.
Hetta na rocı to qe çıçi diyo, çıçi nêdiyo.
Pêpey dı ju bı ju rêz kı vacı inan ma rê lo.
Kemeri serra Taqi corra veracêr beno.
Bı herşan kerdena merg u ecel varneno.
Hele hesê xo bıkı u vacı qe no do sebo.
Semedê çıçi Dejal ma dı dışmeney keno.
Qe nêzana no dejal ma ra çıçi wazeno.
Dayê, zeri veşateyê lê kokıma mı dayê.
Emrê to qediya bı bermi u zahmeteya lê.
Naşê to herı bı lê derdınê dı no wardı lê.
Bı zahmeteya to pırr kerd emrê xo sêkürê.
De bê, de bê vacı qe do wına sebo rebenê.
Sınıxın, bermiyın, bêhes u bêveng dayê.
Ewro xeribey ra veydana to başnawı lê.
Qe sebeno, fına werzı xoser zeri külınê.
Bê u bıvinı nê halê ma çım bermiyınê.
Qe ma kewtê kamcin hallan bızanı dayê.
Dayê, zeri veşatê, bêkêf u cefakara mı lê.
O derd u barê to zahf gıran bı zeri külınê
Bê, de bê vacı seni to hewada o barê xo lê.
Nêzana bı çı babeta to xover da zaniyê.
Ma a zeriya to polat ra bi, ma rê vacı lê.
Dayê, zeri veşatê bêwar u bêwahêra mı lê.
Bêqeder u bêsıhudê wa çımê feleki koribê.
Fahm nêkena çırê zalım u xedar bı hendayê.
Bê zeriya xo akı qısey bıkı u vacı lê kokımê.
Hetta ewro qe çı nêweşi to sere ra ravêrdi lê…
Didim 13-09-2005.
