|
Hari Kiamat
pun sudah sampai. Tapi untuk masuk syurga semua urang mesti ikut satu
temuduga. Kalau yang lulus maka dapatlah masuk dan tingu itu surga. Kalau
inda, masuk nerakalah dia.
Tibalah giliran satu urang muda ini. Dia mimang bagus sama dia inda rock.
Dia punya rambut pendek bukan macam rambut kumpulan-kumpulan penyanyi rock
di Malaysia ini. Jadi diapun sampailah di gate untuk masuk surga. Di gate
inilah Tuhan dan Malaikat-malaikat kasi interbiu orang-orang di dunia ini.
Masa temuduga ini Tuhan pun tanya itu urang muda. Dia bilang "kau tulung
orangkah masa di dunia?" Bilang si urang muda "ui..adabah. Banyak kali
sudah aku tulung urang. Baru aku ini bukan samsing. Kau tingulah rambut
aku, pindik. Lagipun aku selalu pigi sembayang". "Betulkah itu" bilang si
Tuhan main-main. "Betul bah" bilang si urang muda lagi. Kemudian bilang si
Tuhan "Oklah aku percaya yang kau cakap. Nah! ambillah ini basikal. Sana
itu surga, lebih kurang 50 km dari sini. Baik-baik kau jalah ah..".
Si urang muda pun rasa telampau gembira sebab dia lulus ujian sama
cita-cita dia mau masuk surga sudah tecapai. Dia pun naiklah itu basikal
pigi di surga. Baru 10 km dia bejalan limpas satu urang gonrong naik motor
Harley Davidson yang besar, 500 cc. Rambutnya panjang macam penyanyi
kumpulan rock. "Hui, siapa ini? Begini rock pun bulih masuk surga? Naik
motor besar lagi itu!" pikir si urang muda.
Si urang muda ini inda puas hati. Dia begitu alim tapi naik basikal saja
pigi surga. Si rock pula naik Harley. Si urang muda ini pun balik di gate
tempat dia temuduga. Sampai saja di sana di terus tanya itu penemuduga. "Aku
mau buat aduan ini" dia bilang. "Kenapa, pencutkah tayar basikalmu" tanya
si penemuduga. "Bukan pencut, aku inda puas hati. Aku begini alim, rambut
pindik, naik basikal saja pigi surga. Tadi aku limpas pigi sini pun banyak
yang rupa alim, yang pindik-pindk rambut naik basikal juga. Tapi ada satu
urang rock yang temuduga lepas aku rambutnya panjang, dia pula naik Harley
Davidson!" marah si urang muda. "Syhht.. pelan-pelan becakap..Nanti dia
dengar, habis kau di buang balik di dunia. Itu bukan urang rock. Itu
Jesus. Dia buat spot check sini!" |