ERBAGE – BAGE ORAT TUTUR IDUR SUKU KARO

 

Perkade – kaden ibas Kalak Karo 3 (telu) bagin dilina:

a.                   Perkade – kaden arah keturunen (terombo)

b.                  Perkade – kaden arah perjabun (emas pedemuken)

c.                   Perkade – kaden arah orat tutur/sejarah

Perkaden – kaden arah keturunen, ema arah merga, bapa, nini, nini bapa, anak, kempu, ras seterusna. Perkade – kaden si bage ngikuti garis ku das, ku teruh bage pe ku kawes, ku kemuhen jadi keturunen

 Contohna :

Kalimbubu dekah ku anak beru dekah nari kin.

Umpamana arah nini nari ia enggo kalimbubu janah arah nini nari kia ka ia enggo anak beru, seh ku keturunen/sinursurna.

Perkade – kaden arah perjabun (emas pedemuken), ertina arah perjabun maka enggo jadi kalimbubu tah jadi anak beru.

 

Contohnya:

Lit sekalak dilaki si ngempoi turangta, si empo la kalak Karo, tapi arah ia empo ndai maka ia enggo jadi anak beru, tah sebalikna si jadi enggo jadi kalimbubu Anem gia la kalak Karo diberu si i empoi, adi ku bapa ndehara e tentu enggo jadi mama, janah enggo jadi kalimbubu. Adi turang terserah man kalak si la kalak Karo tentu ia enggo jadi anak berunta, ras kerina sembuyakna enggo jadi golongen anak beru, ertina seri ras anak bibi turang bapa.

 

1.       Perkade – kaden arah orat tutur

Garis sinursur/keturunen ibas kalak Karo enggo i tentuken nini (moyang) Karo ndube, emekap : arah sinursur bapa jadi Merga ras Beru, janah arah sinursur nande jadi bebere parental dan bilateral. Anak si dilaki si igelari nerusken keturunen bapana. Emaka adi langa lit anak di laki ibas sada jabu megati i gejap langa kuh jabu, anemna gia enggo lit anak diberu.

Lit jadi arah erkiteken sejarah enggo jadi senina, bagi i zaman si adi. Lit i pulahi Merga Karo – karo Setepu sekalak si ibayangken sekitar Singalor Lau. Kenca ia pulah jadi Merga Sebayang erbulawan me sitepu ndai ras Sebayang jadi Senina Sejandi, lanai sibuaten (la si empon)

 

Cataten :

Ibas adat Karo keputusen Sangkep Si Telu me jadi pengerakut si arus igejapken si ntugehna ras si meganjanga. Sebab keputusen si bage me si mbelina tah si meganjangna ibas adat Karo si ngakui erpemerintahen kekeluargaan.

 

Contohna :

-          Kerna umur pe, mbelin pengaruhna nentuken orat tutur, tapi e labo nentuken ganjang terukna orat tutur sebab la lit ka nge kecualina. Adi tuaan pe sekalak jelma tapi adi orat er – nini kin arus i bibiken, janah adi erbapa kin arus           i bapaken, bage pe ku erkaka.

-          Lit sekalak, tuaan ia, tapi erkiteken i buatna turang sekalak si ngudaan asa kaka singuda – ngiuda ndai, maka rah orat tutur si tuaan ndai enggo arus erkaka tua man kaka ndeharana ndai.

Si bage enggo jadi aturen adat si arus ilakoken ibas kalak Karo, Sebab, e enggo, jadi pengiket perkade – kaden ras arah orat tutur. Bas perkade – kaden enda lit dua istileh :

 

1.      Kadendu ia?

2.      Erkai kam man bana?

 

1.       Kadendu ia?

Banci erkalimbubu, banci er anak beru, banci ersenina, banci erpuang kalimbubu, banci er anak beru menteri ras si debanna. Tapi si enda golongen ngenca, langa dat erkai kin orat man sekalak – sekalak.

 

2.       Erkai kam man bana?

Jenda enggo tertuju man sada – sada kalak tujuan tertentu. I jenda ijelasken   ia dilaki entah diberu, sintua, si entengah tah pe si nguda.

Ku das = bapa, nini, bapa nini, nini – nini, ikataken pe bapa nini, ente, entah, ompung.

Tengah = senina, silih, turang

Ku teruh = anak, kempu, anak kempu, kempu – kempu

Kadendu ia, tentu enggo lit golongen kerna perkade – kaden ku sekalak – sekalak, tapi golongen secara umum, umpamana: Kalimbubu, anak beru, senina, puang kalimbubu, anak beru menteri, si pemereh, si paribanen, si pengalon, si gametten, teman meriah, tah anak kuta ras sidebanna. Tapi si enda labo dengan tertuju man sekalak – sekalak.

Kadendu ia? Jawabna pemena : puang kalimbubungku, si enda ertina golongen kalimbubu.

Kadendu ia? Jawabna : anak beru minteringku, si enda ertina golongen anak beru.

 

 

Ibas benana dua golongen ngenca pertuturen:

1.      Golongen Kalimbubu, eme pihak si nereh, si mere beru.

2.      Golongen anak beru, eme pihak si empo, si ngalo beru.

 

Adi kerja – kerja mengket rumah, sukut si sada ngenca, bage pe kerja simate – mate, tah kerja ngampeken tulan – tulan, sada ngenca sukutna.

Ibas golongen si dua ndai eme kap golongen anak beru tah golongen kalimbubu, i angkat sada, emekap golongen senina, gelah cukup sangkep.

Maka ibas kerja – kerja nereh empo arus lit sukutna dua, sukut eme si itamaken, si ngerana kenca ; emekap anak beru, senina ras keputusen ibas kalimbubu nari. 

 

2.       Perkade – kaden Arah Keturunen (terombo)

1.       Meherga  si jadi  Merga eme pengelompoken kalak Karo rikutken garis keturunen tertentu. Bagi si enggo ijelasken perlebe, emekap sekalak jelma ikataken kalak/suku Karo adi lit Mergana (dilaki). Tah pe Beru (diberu) bage pe Bere – bere, janah nggit ndalanken adat – istiadat Karo si la ertentangen ras kinitekenna (si gundari) sekalak – sekalak.

Nginget tiap – tiap kalak Karo lit Merga/Beru ras Bere – bere, adi jumpa ketadingen emekap ertutur. Emekap si oraten asal, Merga/Beru, Bere – bere ras sidebanna, pasti lit hubungen perkade – kadenna, misalnya : ersenina, ermama/mami, erbibi/bengkila, erbapa/nande, erturang/rimpak, tah pe sidebanna.

Jadi gelah jelas uga kin ertutur e, tiap – tiap kalak Karo harus ngeteh 5 (lima) pokok/induk merga e, emekap :

1.      Karo (karo – karo)

2.      Ginting

3.      Sembiring

4.      Perangin – angin

5.      Tarigan

Tep – tep cabang keturunen enda lit ka terpuk – terpukna. Kerina anak si dilaki lit mergana ras kerina anak si diberu lit beruna rikutken salah sada ibas merga si lima enda ndai.

 

2.       Tutur eme ngataken ntah netapken hubungen kekerabatenna (perkade – kaden) ibas kalak Karo. Lit 3 (telu) batang belin tutur sini ikataken “SANGKEP SI TELU” idur aku nari emekap:

1.      Senina

2.      Kalimbubu

3.      Anak beru

Tep – tep “Aku” lit seninana, kalimbubuna, ras anak beruna. Teluna unsur – unsur kekrabaten la terpisahken nandangi “Aku” sebab iketen perkade – kaden ras fungsional. Teluna unsur enda si runggu ibas ngoratken kerina “Aku” ibas keriahen ras kepiceten. Emaka teluna unsur enda igelari sangkep si telu entah rakut si telu. La sada perangkat si lengkap entah sangkep nandangi “Aku” si ngerakut geluh “Aku” gelah jadi nteguh, paguh ras me gegeh (utuh)

Emaka situhuna kalak Karo enda merupakan sada keluarga besar nge, sebab adi sioraten kenca kalak Karo ras sekalak kalak Karo sideban (si lenga sitandan), pasti kari dat hubungen perkade – kaden, entah kin kari : biak senina, tah pe biak kalimbubu, tah pe biak anak beru (enda me ikataken sangkep si telu = tiga ikatan) ibas kalak Karo. Maka dat rakutna e (hubungen perkade – kaden), tentu ertutur me ia duana:

a.      Kal kin mergandu/beru kai kin kam?

b.      Bebere kai kam (= beru kai nandenta)

c.      Kempu kai kam (bebere kai nandenta)?

d.      Kai binuangndu (= bebere kai bapanta)?

e.      Kai kampahndu (= bebere kai nini bulang si mupus bapanta)?

f.        Kai solerndu (= Kempu kai nandenta)?

Alu sioraten/ertutur bage, maka mis dat hubungen perkade – kaden, ntah kin ia ersenina, kalimbubu, ntah pe er anak beru.

 

3.       gelah banci ierti kuga hubungen “Aku” nandangi sideban, emaka lit istilah – istilah buena lit 8 sebuten, eme kap sini ikataken “ORAT SI WALUH”ibas Sukut nari emekap:

1)     Sembuyak

2)     Senina

3)     Senina sipemeren

4)     Senina si paribanen

5)     Anak beru

6)     Anak beru menteri (minteri)

7)     Kalimbubu

8)     Puang Kalimbubu

 

1.       SENINA, ertina SADA NININA,

a.      Si seh ku sukut.

1)      Sembuyak/turang

Eme seri ras terpuk merga “Aku” umpamana Ginting Suku Ras Ginting Suka, Karo – karo Sitepu ras Karo – karo Sitepu.

 

2)      Gamet/Senina ku ranan

Ibas si sada cabang merga nari tapi la seri terpukna, umpamana Tarigan Tua ras Tarigan Sibero, Sembiring, Brahmana ras Sembiring Meliala, ras sidebanna

 

b.      Si erkelang ku “Aku”

1)      Si pemeren

Eme adi nande “Aku” senina ras nandena, entah pe bali bebere      kami.

2)      Si paribanen

Eme adi ndehara “Aku” senina ntah sembuyak ras ndeharana.

3)      Si pengalon

“Aku” ras ia senina erkiteken anakna pe kepar tersereh man kalak si sembuyak. Duana ersenina erkiteken nggo ersada anak beruna perban anak tersereh.

4)      Si sedalanen

Senina erkiteken impal “Aku” lempoina, ntah pe ia nggo jadi kelamama “Aku”

 

2.       ANAK BERU

a.      Anak beru seh ku suku, emekap:

1)      Anak beru iangkip/anak beru iampu.

Eme adi anak “Aku” tersereh man sekalak si biak impalna. Adi la man si biak impalna, igelari si empo e anak beru i perdemui.

 

 

2)      Anak beru dareh/anak beru jabu/anak beru ipupus.

Eme anak dilaki si ni pupus anak si diberu “Aku” entah anak turang “Aku” banci ka kempu “Aku” entah bebere “Aku”

3)      Anak beru cekuh baka tutup.

Eme kap si enggo dua kali erturut – turut ngempoi ibas diri “Aku” nari umpamana adik anak beru dareh i empoina anak “Aku”. Anak beru cekuh baka me si banci muka tutup baka ingan kalimbubu nimpan barang – barang si Meherga. La me si ertanggung jawab ibas perlingeten kerja

4)      Anak beru tua.

Terbagi 3 (telu) terpuk eme:

a)     Anak beru tua jabu

Eme anak beru mulai ibas nini bulang “Aku” nari seh ku tertuan. Anak beru tua enda me si njemak ranaan ibas kerina runggun adat ibas jabu kalimbu.

b)     Anak beru tua kesain

Eme sada cabang Merga si nggo itetapken jadi anak beru tua ibas kesain ras kesusutenna me nai asum manteki kesain.

c)      Anak beru kuta/anak beru si ngian rudang

 

b.      Anak beru erkelang ku sukut :

1)      Anak beru si pemeren.

Eme anak beru senina si pemeren ibas “Aku” nari, dalanna “Aku” eranak beru man bana sebab ia anak beru senina si pemerenna.

2)      Anak beru minteri, asalna ibas kata pinter nari

La emekap anak beru ibas anak beru “Aku” nari. Ibas runggun ia mereken kata pinter si genduk denga

3)      Anak beru si ngukuri

Eme anak beru ibas anak beru minteri nari

 

3.       K A L I M B U B U

Eme sirnereken ndehara (anak dara) man “Aku” ngikuti garis ku das, ku samping ras ku teruh. Kalimbubu i percayai kalak Karo sumber tuah eme igelari : ia Dibata ni idah, entah si mupus ta kal piher, si pemeteh pate geluh

a.      Kalimbubu si iperdemui

Igelari pe kalimbubu si erkimbang, entah pe simbaba ose eme kap bapa ndehara ntah turang ndehara “Aku” igelari simbaba ose. Sebab ia simbaba ose man anak beruna asum anak beruna erban lakon nurun – nurun, lakon kepaten cawir metua, ntah pe erpangir ku lau.

b.      Kalimbubu si mada dareh

Eme kap bapa entah turang nande “Aku”. Ibas kerja – kerja kalak Karo kalimbubu enda salih gelarna sue ras bentuk lakon, emekap:

1)      Kalimbubu si ngalo ulu mas

Emekap ibas lakon perjabun beberena si di laki asum e ia ngalo ulu mas.

2)      Kalimbubu si ngalo bere – bere

Emekap asum perjabun beberena si diberu asum e ia ngalo bebere

3)      Kalimbubu si ngalo maneh – maneh.

Adi beberena si dilaki entah turangna mate janah nggo cawir metua, lanai lit anakna si langa erjabu, maka kedudukenna ; ia me kap si ngalo maneh – maneh. Adi beberena si dilaki mate ialokenna bajuna tambah batuna. Adi diberu si mate ialokenna uis teba tambah batuna

4)      Kalimbubu si ngalo sapu – sapu iluh

Adi beberena si dilaki mate entah turangna si mate tapi anak – anak si mate langa kerina erjabu, maka ia ngaloken sapu – sapu iluh

 

c.      Kalimbubu bapa (binuang)

Kalimbubu bapa eme si mada dareh bapa. La jadi kalimbubu binuang man “Aku”. Kalimbubu binuang enda berubah peran ibas kerja – kerja tertentu:

1)      Kalimbubu si majek daliken.

Ibas kerja mengket rumah “Aku” i gelari ia kalimbubu si majek daliken

2)      Kalimbubu si ngalo perkempun

Asum anak “Aku” tersereh maka kalimbubu bapa “Aku” jadi kalimbubu si ngalo perkempun. Lit versi si nggelarissa kalimbubu si ngalo peminin (kenjulu : puang kalimbubu arah nande)

 d.      Kalimbubu bena – bena.

Eme kalimbubu si mada dareh nini “Aku”

 

e.      Kalimbubu tua

Lit 3 (telu) erbage:

1)      Kalimbubu tua jabu

Emekap adi ia nggo erindih – indih jadi kalimbubu muli ibas nini empung nari.

2)      Kalimbubu tua kesain.

Eme keturunen kalimbubu si nai asum manteki kesain ijadiken kalimbubu.

3)      Kalimbubu kuta.

Kalimbubu e si nuanken lulang asum manteki kuta, emaka igelari ka pe ia kalimbubu si majekken lulang.

 

f.       Kalimbubu er kelang ku sukut.

1)      Puang kalimbubu

Emekap kalimbubu ibas kalimbubu “Aku” nari. Adi “Aku” nereh maka puang kalimbubu si ngalo peminiin (lit versi si ngataken kenca si ngalo perkempun)

2)      Kalimbubu si ngalo morah – morah.

Lit versi si ngatakenca, maka adi anak beruna mate ntah dilaki tah sa diberu maka ia si ngalo morah - morah

3)      Puang ni puang.

Emekap kalimbubu ni puang kalimbubu

4)      Kalimbubu erkiteken si pemeren.

Emekap se ina si pemeren mama “Aku”

 

3. NANGKUHKEN MERGA

Adi sekalak dilaki si la kalak Karo erjabu atena nandangi sada beru kalak Karo, janah iban lakon/kerja adatna, maka si dilaki enda itangkuhken lebe mergana, gelah lit sukut/sembuyak si empo

Adi enggo setuju si empo bage peorangtuana, maka orangtua si nereh iteruh – teruhina lebe anak beruna (banci anak beru dereh, banci anak beru cekoh baka entah pe anak beru tua, si apai si akapna si merandalna janah setuju ka anak beruna e jadi orangtua si empo)

Adi enggo sue arih orangtua si nereh ras anak beruna, maka isuruhna si empo ndai ras orangtuana ibas sada wari si enggo itentuken ndahi anak beruna e (calon orangtua angkat) lako maba nakan tasak, ras uis baju man “bapa angkatna” = kampuh man “ nande angkat” si empo. Anak beru calon bapak angkat ndai nimai i rumah rikut pe kalimbubuna si erkimbang + anak beruna. Kenca elah man, iban me ranan, ija mindo me orangtua si empo maka min si empo enda banci ras – ras ia duana ngana kenca. Adi enggo erpengue orangtua angkatna maka, ibereken si empo uis orangtua angkatna ndai, jenari maka sah me merga si empo merga angkatna ndai. Janah beru si ibaba “nande angkatna” eme bebere si empo.

Alu bage maka tumpung kerja nereh empo, bapa angkatna jadi sukut si empo rikut ras sembuyakna + kalimbubu + anak beruna. Orangtua kandungna jadi si mupus ngenca, bapa angkatna ndai jadi si pempo kenca.

4.       NANGKUHKEN BERU

Adi sekalak diberu (la kalak Karo) erjabu atena ras sekalak dilaki kalak Karo, janah ibahan kerja adatna maka terpaksa lebe itangkuhken beruna, gelah lit si nereh kenca.

Adi enggo setuju si sereh ras orangtuana, maka iteruh – teruhi orangtua si empo me lebe kalimbubuna (banci kalimbubu si erkimbang, banci kalimbubu dareh ntah pe kalimbubu bena – bena/kalimbubu tua) si jadi “orangtua angkat” na.

Adi enggo setuju kalimbubuna maka itentuken me wari, jenari reh me si sereh ras orangtuana ku rumah kalimbubu ndai (calon orantua angkat), maba nakan tasak ras bengkau, baju bapa angkat ras kampuh nande angkatna. Kalimbubu enda nimai i rumah rikut kalimbubu + puang kalimbubu + anak beruna.

Kenca elah manb, iban me ranan, ija mindo me orangtua si sereh man calon bapa angkatna ndai, gelah ras – ras ia duana nganakken si sereh. Adi enggo erpengue cakap bapa rasnande angkatna, maka si sereh, eme merga bapa angkatna, maka si sereh, eme merga bapa angkatna ras beberena eme beru nandena, ras perkempunna eme merga bebere nande angkatna. Jenari maka ibereken si sereh ndai me baju bapa angkatna bage pe kampuh nande angkatna.

Tupung wari kerja nereh empo maka bapa angkatna enda ndai me jadi sukut si sereh ras sembuyakna kerina. Orangtua kandungen jadi si mupus janah orangtua angkatna jadi si nereh.

 

5.       TUTUR

Ncidahken hubungen perkade – kaden ibas kalak Karo maka tutur sini palasna merga ras bebere si ni baba sekalak – kalak, maka dat me tingketen keturunen:

1)     erbapa

2)     Ernande

3)     Erbengkila

4)     Erbibi

5)     Ermama

6)     Ermami

7)     Ersenina

8)     Erturang

9)     Erimpal

10) Ersilih

11) Erbebere

12) Eranak

13) Erkempu

14) Erente

15) Erentah

16) Erturangka

17) Eragi

18) Erkaka

19) Erpermen

20) Ernini bulang

21) Ernini tudung

22) Erempung

23) Erberu

Bage me biak – biak umumna kalak Karo, aminna ija pe ia ringan tah erdahin, tapi labo lit ukurna nokohi kalak sideban janah labo lit ukurna megombang ku kalak

 

6.       Nentuken Perkade – kaden Arah Orat Ertutur

-         Mbue pengarang tah penuli Barat, Asia tah bangsa Indonesia sendiri si ngatakenca maka mbelin pengaruh Hindu ibas pergeluh kalak Karo, tapi pengaruh Kasta Hindu, labo lit teridah ibas masyarakat Karo, sebab pe gancih nge jadi SUKUT, ANAK BERU tah KALIMBUBU, sebab ibas adat Karo labo lit jelma i peserap inganna ku duru, tapi kerina nge radu i tengah

-         Bage pe kerna perkundul kalimbubu, usur i gelari DIBATAS SI IDAH, labo lit inganna pe lain – lain ras sukut. Saja ngenca sebage kehamaten ia itama arah kemuhen sukut janah i kemuhen ka puang kalimbubu. Sebab ibas sada dampar kalimbubu tah puang kalimbubu ndai pe banci ka ibas dampar si deban jadi senina tah jadi anak beru

-         Bage me si ikataken, suku Karo nge si enggo ngasup majekken bentuk masyarakat si erpemerintahen secara kekeluargaan, si fungsi – fungsina menam seri ras ibas masyarakat PATRIARKHAT, bagi si enggo isi ngetken arah lebe si benihna turah arah kesusuren nini (moyang) Karo si njadiken merga si lima rah anakna si Meherga si ijadiken merga. Jenari reh belangna ka njadiken orat si waluh…..si jadi fungsi – fungsi kegeluhen tiap wari, minggu, bulan, tahun seh mulih ka ku asal.

-         Ibas sukut nari me dalinna maka lit kalimbubu, janah arah kalimbubu nari ka me dalinna maka dat puang kalimbubu, Ibas sukut nari me dalinna maka lit senina si pemeren, si paribanen ras sepengalon. Janah arah sukut nari ka nge maka lit anak beru, anak beru minteri bage pe seh ku anak beru si ngukuri.

Ibas percakapen tep – tep wari, si enda ndai kerina banci ipegendeki alu sangkep si telu = rakut si telu, tapi labo ngikuti tutur Toba “Dalihan Na Tolu” sebab dapur Karo si 5 (lima) daliken nge ibas sada dapur, jabu si empat tah si waluh jabu (rumah Karo la tonggal)

 

Cara Ertutur Ibas Suku Karo

Ibas kalak Karo biasa lit bagi sada kuan – kuan, nina : “ADI LABO BELUH ERTUTUR, TENTU LABO IA SIAT KU JAPA PE”. Gelah banci si petandeken dirinta ku kalak sesama Karo, janah kalak pe perlu si tandai, dalinna emekap arah ertutur. Emaka ertutur seh kal perluna ibas kalak Karo.

Katawari pe adi lit dua kalak, kalak Karo jumpa, adi langa si betehen orat tutur si pemena lebe ilakoken emekap : ertutur, sebab arah penturken nge maka dat orat perkade – kaden sue ras aturen adat Karo. Si orati lebe merga jenari bebere, janah adi la dat orat tutur arah merga ras bebere, banci iorati pe seh ku binuangna ras solerna. Emaka adi la dat orat tutur si pasti, ikataken ; nimai dat ganjang terukna, tah pedauh – perdeherna perkade – kaden ibahan me lebe enimpal. Sebab adi orat tutur ibas suku Karo, usur lit pe gancih, umpama sekali enda si a jabu kalimbubu, tapi ibas kerja/pesta adat sideban banci nge ia jadi anak beru ka.

 

Cara ertutur ibas kalak/suku Karo lit 3 erbage :

1.       Ibas sada paksa jumpa si Atan ras Benana (contohna), reh nina si Antan : “Mejuah – juah, kuakap kita langa bo pernah si tandan ari? Erkai nge ndia tuturta? “, nina.

Ijawab si Benana : “Payo, kuakap pe bagi katandu e nge. Apai/kai dage mergandu? “, nina, Nina si Antan : “Aku Tarigan, beberena bere Karo Reh nina si benana : “Adi bage kai nge ndia si bahan tuturta ari? Kam apai kin mergandu ras beberena”? “Mergangku Ginting, bebere Tarigan aku, “nina si Benana. Emaka reh nina si antan : “Adi bage, si mehulina ersilih me lebe sibahan ope dat ganjang terukna, emaka inget – inget kam, gelarku si Antan, permendu ndai si Maria gelarna, kutanta i Sukanalu, sebab la kap tandan perdalin, adi kempak ah kam, reh kam ku rumah, rumahta i kesain rumah suku”.

Ibas pertuturen si das enda ndai, arah merga ras bebere si dua kalak enda ndai minter dat orat perkade – kaden, emekap : ersilih.

Lit ka deba adi i orati merga Karo – Karo beberena Sembiring. Jadi ibas bagenda rupana erbahan orat tutur biasana/lit i singetkenna sada jelma si i tandaina ibas sada ingan/kuta temanna ertutur e.

 

2.       Nina si Pengarapen (misalna) : “Kuakap kita langa bo sitandan ari? “Reh nina si Tampe (misalna) : “Langa bo kuakap kita ngerana pe. E gia, kai kin mergandu? Nina Pengarapen : “Aku Ginting mergangku, beberena Tarigan. Dage erkai me orat tuturta? “Ijawab si tampe, nina : “Mergangku Karo – Karo, bebere Sembiring. Adi arah merganta ras beberenta e duana langa lit orat tuturta, emaka …. Kai….dage binuangna (bebere bapanta)? “Perangin – angin, sebab binuang (bebere bapa) pe Perangin – angin ka nge “Dage ersenina me lebe sibahan ari?” nina duana. Jenari sijbapen ka ia duana : “Senina me lebe sibahan nimai dat orat terdeheren.”

Ertutur banci ilakoken antar si dilaki ras dilaki, entah antar diberu ras diberu, bage pe banci ka nge ku … sekalak dilaki ku sekalak diberu. Sebab arah pertuturen e dalin maka kerina kalak Karo enggo dat perkade – kaden.

Emaka adi jumpa ras ise gia. Tah langa si betehen orat tutur tah langa si tandan, arus ertutur lebe. Perkade – kaden ibas sukur Karo, labo arah litna pertuturen saja. Tapi lit ka nge sitandan erkiteken sada kuta. Arah sekolah ras sidebanna. Tuhu langa si oraten tutur tapi enggo jadi kade – kade. Bage gia adi sesama suku Karo, terusken ka gelah ngorati orat tutur, gelah reh mantapna perdauh/perdeher perkade – kaden.

 

3.       – Adi sapih – sapih kalak Karo jumpa, tapi langa si betehen orat tutur, gelah si etehen orat tutur, ertuturlah lebe. Terlebih – lebih man anak perana ras singuda – nguda adi langa si tandan, seh kal perluna si oraten tutur lebe, maka i mulai ngerana – ngerana gelah enggo i eteh lebe orat tutur pekepar

-    Entah kuja gia kari ranan e sehna, adi enggo leben si betehen orat tutur tah biak erturang tah biak erimpal, ope leben ieteh maka adi erturang lanai lit ranan kanak – kanak/jagar – jagar. Sebab adi dat maka temanta ngerana e si ndeherta kin, tentu enggo ka ieteh njaga ranan.

-    Gelah ola kari enggo leben si ngenan ate, tapi adi arah orat labo dorek erkiteken erturang umpamana. Tah erturang impal kin, tentu sama – sama kecewa. Emaka perlu kal si oraten tutur lebe. Cara ertutur pe me lala nge erbagena, tapi tujuanna sada nge, emekap : gelah enggo si betehen orat tutur. Sebab adi sesama kalak Karo, anem ijapa pe ia eringan tah erdahin, adi ioratilah lit denga nge kerina pertalin, perkade – kaden. Emaka perlu kal adi jumpa kenca, leben si oraten tutur.

 

 

 

Si perlu lebe iorati emekap :

Adi sekalak anak perana jumpa ras sekalak si nguda – nguda langa si etehen orat tutur, maka arus ertutur lebe. Carana pe, si anak perana nge lebe nungkun/ngorati si nguda – nguda e, ertina si berinisiatif menurut adat Karo,si dilaki nge. Nina : “O turang….ma banci nge kita ertutur? (si oraten tutur)

 

Si perlu lebe iorati emekap :

Adi man si diberu :

a.      Beru kai dage kam? Ertina Merga Bapa

b.      Beberena? Ertina Beru Nande.

 

Adi man si dilaki :

a.      Apai dage mergandu?

b.      Kai bere – berena?

 

Adi kenca ieteh merga ras bebere pekepar pe, langa bo dat perkade – kaden si ndeher, emaka iorati :

a.      Kai binuangna (bebere bapa)

b.      Kai solerna (bebere nande)

Sebab biasana arah pertuturen si dua tingkat e lagia enggo me dat orat tutur, emekap tah : rimpa, ersenina arah bebere bapa, tah adi arah nande ersenina seemeren nande. Emaka perluna maka adi langa si tandan, tah langa pernah sioraten ertutur me lebe dalin si tandan.

 

 

 

2.   Contoh sideban umpamana :

Sekalak anak perana jumpa ras sekalak singuda – nguda, perbahan langa si tandan, anak perana nge lebe nungkun. Nina : “O turang….ma banci kita si oraten tutur? “Jenari ijawab si nguda – nguda ndai : “Banci”, nina, emaka iterusken percakapen ndai :

(A = Anak perana, S = Singuda – nguda)

A : Beru apai dage kam ?

S : Aku beru Karo

A : Bere – Berena?

S : Bebere Sembiring

A : Adi bage erkai dage orat tuturta?

S : Kai kin mergandu?

A : Mergandu Ginting

S : Bere – berena?

A : Bere – bere Karo

S : Adi bage erkai dage orat tuturta?

A : Adi la kam me hangke rimpal kuakap kita

S : Ngkai maka me hangke adi bage kin seharusna.

A : Piga kam sembuyak?

S : Telu, pe – empatken ras kam

A : piga kam impal kami si diberu?

S : Sada aku ngenca

A : sintua, si ntengah, tah singuda kam?

S : Aku sintua

A : Kuh denga kin orangtuanta?

S : Kuh nge orantuanta, tapi mesera – mesera kal

A : Ija kin ingan orangtuanta?

S : I Kabanjahe Jl. Kapten Bangsi Sembiring, reh kam

A : Lak !….kuga pe reh nge aku, adi enggo lit katandu mehuli bagenda

S : Kam kaka piga kam sembuyak?

A : Enterem kal agi, lima aku sembuyak pe – enemken ras kam.

S : Kam sintua, sisntengah, tah si nguda?

A : Aku singuda, emaka erkaka nguda kam man bangku.

S : Ue kaka nguda……..

 

Bage me cara ertutur idur kalak/suku Karo adi kin perjumpan si la iarap tah ikataken jumpa i tengah dalin, tah idas motor/kereta api tah i datas kapal tah i Bandar Udara, ras tah ijaga ia pe adi lit perjumpan.

 

PANTUN IBAS ANAK SI NGUDA

 

1.       Cike paku langgendu.

Tangke lenga mbulak kujaba

Mejile kap aku atendu.

Jilen denga rupa kubaba

 

2.       Meganjang tuhu deleng Sibayak

Ngincuah dalan ku Pancurbatu

Man bandu aku labo terayak

Megi sorandu persatan bat

 

3.       Isuan jaba itepi ju mandu.

Tuhu medalit dalan ku Kaban

Natap rupandu megi sorandu

La kuakap lit dalanku atan

 

4.       Merembo nina si urat tuba,

Batan gula tuhu er – rirang

Adi enggo me kita jumpa

Ola nai min kita sirang

 

5.       Nangkeng – nagken ku rumah liang

Ngincuah nina dalan ku Penen.

Adi sempat me kita sirang

Lanai ku eteh sinan tendengen

 

6.       Jabi – jabi iteruh mandiket

Tabah buluh cinepen kutiki

La erngadi – nadi kena kuinget

Adi tunduh ke ibas nipi