MENAKEN ERBAHAN RUMAH ADAT KARO

1.       PERSIKAPEN

Ope denga erbahan rumah adat Karo, maka ibahan lebe runggun si mada rumah, sangkep nggeluh (sangkep si telu). Kenca arihna enggo sue maka idarami tapak rumah. Kenca dat ingan pertapaken, emaka idahi me pengulu. Adi pengulu pe labo keberaten, emaka itentukan wari pesai ras ngumbung pertapaken e. warina isungkun guru si meteh wari telu puluh.

Ibas wari si enggo itentuken, berkat me kerina ku ingan pertapaken, bang e pe ikut pengulu, guru si meteh gerek-gerekken, guru si beluh erbahan tambar, pande namura ras si erjabaten. Kenca taneh pertapaken ipensai ibahan me batasna. Itengah-tengah pertapaken ikoko taneh alu lambe sibelangna 2 x 2 m. enda me si igelari ngumbung. I tengah taneh si ikoko lambe ikuruk lubang “muat berita ras tinggel-tinggel”. Bagesna sada esta. Lubang e i si alu besi mersi, 3 belo cawir, jenari isemburi alu beras si empat merga (beras si pepulung ibas kalimbubu si empat merga nari) ras i pirpiri alu lau si malem – malem. I kimbangken amak mbentar i deher lubang ingan ninggelken sore ibas lubang e nari. Si ninggelkensa eme guru (dukun) silit sungkun beritana. Kenca ibanna mang – mangna. Tah sudipna emaka i mulai me itinggelken sora kali si lit ibas lubang e. Uruten si ninggel kenca: suku, anak beru ras kalimbubu. Adi sora terbegi ngateken pertapaken e sekula serasi emaka ibuat me taneh ibas lubang e nari 3 mpukul rikut ras belo cawir ndube. Besi mersik tetap tading ibas lubang jadi pengian ipernipiken pande. Dekahna ipernipiken 4 berngi, la banci lebih tah kurang. Adi pertapaken rumah e sekuta serasi, labolit si emipi gulut, emaka ipeberkat me pande ku kerangen.

2.      PERKAKAS SI IPAKE ERBAHAN RUMAH ADAT KARO. *).

Ergbage-bage perkakas erbahan rumh adat Karo si la make paku ras la make kawat, janah labo lit make besi, tapi tahan nge ratusen tahun.

3.      NABAH KAYU KU KERANGEN

Isungkun lebe guru si meteh wari, ndingan katikana, janah man pande kataken gelah ersikap-sikap. Ibas wari salang sai si ikataken guru perkatika. Berkat me kalak si erbahan rumah ku kerangen alu iarakken pande, pengulu guru si meteh wari ras si meteh tambar sekala singuda-nguda sikuh denga nande – bapana lit ka deba kuta ibas berkat si pemena kuh sangkep nggeluh kerangen.

Nabah kayu si pemena lit acara khusus emekap kerina si bas rumah ikut ku kerangen, ibaba amak mbentar, ibaba kampil bage pe cimpa buka siang. Cimpa buka siang emekap cimpa matah si pulungenna: beras + gula + tuala + sira lada sitik. Seh i kerangen idarami kayu nderasi, maksudna gelah sekula serasi kerina siba rumah majekken rumah ras serasi pe pagi ngianisa, bage pe gelah ola lit, abat-abat si ndongkeli. Kenca dat kayu nderasi ndai, maka guru pesai kelewet kayu e, janah i cibalkenna belo cawir si enggo itabasi. Tabasna “o beraspati ni taneh kutabah me kayu enda erbahan rumah, inganku cawir metua, “Seterusna guru ngamburi beras meciho kelewet kayu nderasi. Emaka pande nabah kayu seh emekapna mistak. Empak enda me ioge guru. Ibas permbulak kayu enda mengeteh pembangunen rumah adat e erdalan ibas mehuli tah lang. Adi mbulakna nduah ibas batangna nari. Bekas pemotongna la mejabut maka rumah e pedas dung janah la lit alang – alangen.

Jadi uruten ku kerangen emekap: (1) ngempak + ndarami kayu, (2) pepagina ilanjutken nabah kayu si men tabahe, (3) enggo kenca dung nabah kayu kerina asa siperluna, maka i lanjutken ngerintak kayu i kerangen nari ku kuta.

4.       NGERINTAK KAYU

Kenca dung kayu itabahi, itentuken me warina ngerintak kayu e, emaka sukut si erbahan rumah ndah i tiap-tiap rumah si waluh jabu ermono mindo penampat, gelah anak peranan ras singuda-nguda ikut ku kerangen narik kayu, tambah ndilo kade-kade teman sada kuta, entah pe i kuta sideban nan lako nampati ngerintak kayu i kerangen nari. Si igelari “iserayaken” kade – kade tah pe anak kuta si ngerintak kayu e labo ngarapken upah, tapi nampati alu gegeh si lit i bas ia. Ibas seraya ngerintak kayu enda, suku nikapken nakan ras bengkau. Sangana ngerintak kayu enda lit si rende gelah ersada gegeh. Lagu ngerintak kayu erbage – bage. Umpamana “Iyah oleee…ah…oleee…, njoler – njoler sea nipe, iyah oleee… lompat sea katak ah oleee…ngenca erdalan iendeken tundal aleee…

Kewajiben si majek rumah waktu ngerintak kayu emekap psikapken: belo, gambar, mbako man isap, gula batak man ketepen. Lau inemen, ras nakan + bengkau man seraya. Adi enggo cukup perkayun seh i kuta maka ibahan me man-man. Kerina si ikut ngerintak kayu ras pande idilo. Kini kerina man – man e, singadangsa si empu rumah waluh jabuna.    

5.       PEBELIT-BELITKEN

Pebelit – belitken eme kalak si erbahan rumah arih – arih ras pande rumah, ngiket janji anak rumah ras pande. Kenca enggo itentuken wari pebelit – belitken, maka i peseh anak rumah ka me si enda man pengulu ras sangkep nggeluh tiap jabu si ikut majekken rumah. Nakan ras bengkau itanggung anak rumah, janah bengkauna manuk. Enca elah man, ibahan runggun pebelit – belitken. Ibas runggun enda i arihken asakai upah pande, kuga penggalarina, i orati ka ndingan rumah e dung. Kenca dung kerja pebelit – belitken, maka tulang marbar kayu.