近況
二零零三年七月十二號
呢排調咗出去實地調查，睇下啲公司重喺唔喺度。前幾日係有酷熱警告以來，懸掛時間最耐嘅。我都服咗自己乜可以咁惡劣嘅天氣下戶外工作。
我都諗緊好唔好掉低份工，全職搵份好工。自問好多事都可以抵受，然而咁又值唔值得呢。家吓做嘅嘢同自己個方向唔同喎。
二零零三年五月一號
今日勞動節假期，成日都無出過街，在家靜靜度過。都係睏覺、傾偈同上網搵資料。
歌詠組上個月學咗首歌，係容祖兒首我的驕傲嘅英文版。首歌唔知乜名。
我的驕傲-英文版
- 曲
- 詞
- 未有資料
- 注
- 泓景臺廣告歌
Hold me up, hold up tight
Helping me open my mind.
Lift me up to touch the sky
See me fly.
I'm proud to fly up high
Show you the best of mine
Till the end of the time
You hold me to the sky
I'm proud to fly up high
Show you the best of mine
The heaven in the sky
休息咗一日，好似好好多。清咗成個禮拜疲勞。
二零零三年四月廿號
都差唔多成個月無打近況。成個月好多事都圍住非典形肺炎呢個病。個病死咗好多人，重死得都幾急。學校停課。小到要電子顯微鏡先睇到嘅冠狀病毒，竟然令香港人心惶惶。財爺阿松一句有咁耐風流有咁耐折墮，都真係幾應境。一個人有無病，就係平時生活習慣嘅成績表。呢樣都可應驗響個社會、管治、經濟唔同方面。今次真係暴露唔少平時無乜留意，甚至刻意忽略嘅地方。家上點去改進先係重點。睇來從個人到整個社會，都大把嘢要執。
暫時對自己生活嘅影響唔係咁大，係事事要小心啲。要自己生活健康，咁令身邊每一個都安全，唔好累街坊。呢啲都係大家可以做到。家下幼童軍活動都要停一個月，睇下情況。成人義工隊嘅服務都要停。咁呢段時都有幫紅十字會包啲防炎包包，送畀啲老人。
尋晚到今朝係十一仔嘅第六周未，成班人好開心又響長洲過咗一夜。今朝傾偈都有講到呢個病。原來香港嘅唔只係政府公佈咁多宗，重有啲係死咗之後先知，好多都係要快快脆脆咁拎去火化。凡親愛滋病同呢個非典形肺炎死嘅人，都會有特快期畀佢哋火化。近排跳文華酒店死嘅張國榮都係咁急急火化，唔知有無關聯嘞。
二零零三年三月廿四號
春三月，天陰陰，地濕濕。
今日聽嘅歌係童軍歌
The Paddle Song
- 曲
- 詞
- 傳統歌曲
- 注
- 三部輪唱或與Land of the Silver Birch同時唱
Our paddles keen and bright,
Flashing like silver;
Swift as the wild goose flight,
Dip, dip, and swing.
Dip, dip, and swing them back,
Flashing like silver;
Swift as the wild goose flight,
Dip, dip and swing.
repeat
二零零三年三月廿三號
小弟嘅國語向來都係有限公司，家下忽然想聽一首，重係一聽再聽，試下聽到唱到幾多。
美麗心情
- 曲
- 中島美雪
- 詞
- 姚謙
- 唱
- 本多Ru Ru
多雨的冬季總算過去
天空微露淡藍的晴
我在早春清新的陽光裏
看着當時寫的日記
原來愛曾給我美麗心情
像一面深遂的風景
那深愛過他卻受傷的心
豐富了人生的記憶
只有曾天真給過的心
才瞭解等待中的甜蜜
也只有被辜負而長夜流過淚的心
才能明白這也是種運氣
讓他永遠 記得曾經有一個人
給過完完整整的愛情
那曾經愛着他的心情
有一股傻傻的勇氣
那深愛過他卻受傷的心
豐富了人生的記憶
只有曾天真給過的心
才瞭解等待中的甜蜜
也只有被辜負而長夜流過淚的心
才能明白這也是種運氣
讓他永遠 記得曾經有一個人
給過完完整整的愛情
只有曾天真給過的心
才瞭解等待中的甜蜜
也只有被辜負而長夜流過淚的心
才能明白這也是種運氣
當我安安心心的走在明天裏
有不後悔美麗的心情
對於我來講，愛慢熱。我中意嘅人一切，會滲入我生命之中。或者唔係咁明顯，其實已暗下痕蹟，融和響每一寸之中。
見到班幼童軍小隊長隊副，敎隊員敎得有板有眼，做事亦漸穩當，都感到欣慰。
二零零三年三月十五號
快樂，愉快，都有一個快字。古人將開心同時間流逝聯埋一齊，實在好妙。正所謂，快樂不知時日過。我知，好日子好似水，用五指撈唔撈唔住。就算係咁又點，好日子係自己創出來嘛。
呢排真係好多人對我好好，感動到想講都唔知邊度講起。實在唔知何因何緣。千萬個多謝。
二零零三年二月廿五號
前幾日睇電視，見到尼泊爾人來到香港都無工做。困難響佢哋唔識講廣東話，唔識中文。如果有人敎佢哋，唔知幫唔幫到呢？
今日架42A搬站。由佐敦道碼頭巴士總站搬去佐敦(匯翔道) 巴士總站，好在今朝早有留意名稱轉變，同早前望到有個新巴士站，唔係都唔知去邊度搵。搬到咁鬼遠，都唔知係咪畀人行去搭車，應該響原站附近，加返個中途站方便下搭客嘛。同43C又係咁，最多人落車應該響奧海城二期，偏偏唔開站響果度，開響荒地旁邊。
二零零三年二月廿四號
今日做嘢做得都幾攰，真係有啲想睏。咁同人做事，點都要做好佢嘅。
放工坐102，但架車實在好難頂。一來有陣異味，二來唔知係二氧化碳過高，搞到暈暈地。本來想睏，但又睏唔着。咁又諗咗陣嘢。
究竟生死係咪註定架呢？死神會安排所有人嘅生死，生死有次序。如果真係咁，死神都幾唔得閒。家下世界秒秒鐘都有大把人死，長此落去，可能重快過CPU，死神死十次都做唔掂。假若有神，要理世間每一個人，也未必太費神。
咁輪迴又點。小弟一直都未諗通，做乜會愈輪愈多人。究竟地球生物總數有無改變。雖然無法統計，但總覺得會愈來愈多。輪迴好似假設一切有生命總量唔變。搞到好似物理講質能守恆。
會唔會係人搞到咁鬼複雜，生就生，死就死啦。
有時見人拗，神可唔可以整一嚿自己搬唔郁嘅石頭，用呢樣嘢去證明神係唔係全能。咁實在太無謂。神嘅然係全能，咁就可以override所有邏輯，點會畀邏輯學壓死。就好似宇宙初開可以無時間概念。
我做乜會諗埋啲無離啦更嘅嘢呢。
二零零三年二月廿二號
呢排都可以維持返一定人數返幼童軍。都幾開心下。我可以敎佢哋乜呢？我承認近來疏於去處理要處理嘅事。有個friend以前同我睇掌，佢話我好得意，我會諗一排唔諗，之後又會諗返。我都覺得自己嘅一直以來，每一件事，都係『說不完的故事』。
二零零三年二月廿一號
忽然想聽呢首歌。
學生哥
- 曲
- Goldstein
- 詞
- 許冠傑/黎彼得
啦……
學生哥。好溫功課。咪淨係掛住踢波。
最弊肥佬咗。冇陰功囉。同學亦愛莫能助。
(和)肥佬咗。冇陰功囉。同學亦愛莫能助。
學生哥。好咪書囉。咪日夜掛住拍拖。
顧住十幾科。科科喎。面懵懵一肚火。
(和)十幾科。科科喎。面懵懵一肚火。
螞蟻亦要搵嘢食。唔做事確係冇益。
少壯就要多努力。來日望自食其力。
學生哥。要思己過。唔係。第日悔恨更多。
人之初。應知錯。唔自立就會挨餓。
(和)人之初。應知錯。唔自立就會挨餓。
螞蟻亦要搵嘢食。唔做事確係冇益。
少壯就要多努力。來日望自食其力。
學生哥。一個個。我地日日記住隻歌。
人多多。re-me-re-do。齊合力唱詠同和。
(和)人多多。re-me-re-do。齊合力唱詠同和。
啦……
二零零三年二月十七號
有時太多時情發生，個腦塞滿曬嘢，完全轉唔到，成個呆曬。所以要一啲時間，一啲空間，獨自胡思亂想，等佢慢慢消化，將自己封響思緒裏面。
二零零三年二月十號
擊壤歌中有一對，日出而作，日入而息。家下都幾難做到。日日都好似做咗廿四個鐘咁，之但係，又好似無做過啲乜嘢。連上網都無乜力。真係好想好想休息下。
我去睏囉。
二零零三年二月一號
今日係年初一，癸未羊年，新春伊始。祝願大家無論響乜環境，日日都開開心心，多添福氣。送大家一個福字。
福
願今年可以有好收入。
二零零三年一月廿七號
似曾相識嘅感覺，間唔中都會響生活之中出現。有時行街，坐車，聚會，都會見到一啲似曾相識嘅人。我禁唔住都會望多佢哋兩眼，諗下呢個人響以前邊度見過呢？有一啲我好肯定係曾個人。有一啲諗真係樣子相似嘅人。有一啲遇後先會回想。有一啲會即時諗起。肯定嘅有時我都會上前打個招呼。有時遇過便算。響心坎留低若有若無嘅痕蹟。
二零零三年一月廿五號
原來唔打電話提，唔少人都唔自覺應承咗人，亦唔會有所交帶。回想起自己，其實都有做過呢啲事。呢個係我應該不時反省嘅地方。
曾子曰。吾日三省吾身。為人謀而不忠乎。與朋友交而不信乎。傳而不習乎。
思意係我每日時時都反省自己。替人做事有無未盡力嘅地方呢？和朋友交有無不誠信嘅地方？人敎我嘢，有無嘢未溫習呢？
二零零三年一月廿三號
近來忙到休息都無乜時間，上下BBS、ICQ都難。放工比以前放學、讀大學時重多嘢搞。
工作都頗為愉快。最近出得信多，啲mail merge都用得幾熟下。原來做文員都有機會研究下4GL寫嘅程式，睇落都幾易寫，當然重要啲時間研究。
二零零三年一月十九號
唔知搞乜鬼？翻新個網頁都用咗成日去搞。重要未整晒。
二零零三年一月十八號
近來工作都幾順利，同事友善親切，見到好多好叻，態度好好嘅人。然而呢份工時日無多，要快啲搵工先得。
幼童軍團都家下人數充實咗好多，愈來愈熱鬧，一切原於勁源落力招募。我度收人嘅原則，就係小朋友有心玩，我都收。可能有啲人唔係好讚同，收就收啲乖嘅叻嘅，曳嘅就唔收。敎好一個細蚊仔，同佢準備成為社會有德有用嘅人，咁先係童軍運動嘅目的。
紅十字會成人義工隊方面呢。近日我個小組開返會，傾返好多嘢 。個個都好落力。原來大家都好多idea。好開心。準備緊三月尾，四月初做老人服務。今日開會學到嘢嘅可以用到好多地方。響小組維繫，策劃活動都有進一步認知。
長期都面對住逆境，身心都有啲攰。很感謝自出娘胎以來，身邊嘅人支持，難關過了一個又一個。樂在生命中。
二零零二年十二月十六號
今日去咗黃大仙街邊籌款，為大陸無書讀嘅小朋友起學校。今次個成績未係咁滿意呀。
二零零二年十二月十五號
小弟正響強積金部門做臨時文員，工作雖多到做不停，但生活仿如渡假。剛參加了紅十字會成人義工隊，正在籌備明年服務活動。幼童軍團有勁源深資童軍幫手，活動多元化好多。全旅又將近去camp囉。
