Sube ye xunav li gelî
Endelîb dixwentin di gel bilbilî
Ez dê biçime tewafa gerdenê hemayîlî
Sube ye sube lind e [bilind e]
Kuro tu meger bi bazbend e
Muhbeta dilan girêbend e
Devê çeman hemû dar û bî ne
Çawşî gerdenî guhar û binî ne
Te sîng û berê reş e, li dorê hemû mela û hacî ne
Xerîbim xerîbekî biyanî
Destê kulfetê xwe bigrim, agirekî berdim xanimanî
Gunehê kafiran bi min tê, xasma tu musilmanî
Sube ye sube nabe
Destê min di [ji] gerdena zer vena be
Terka çavê belek nadim heta qiyamet li min rabe
Sube ye weqtê seherê
Karêd xezalan meşyane mexelê
Keleşa min nemaye li ser keyfa berê
Were li min bibe mêwan [mêvan]
Ji te ra bînim şekir û sêwan [sêvan]
Cihê te dayînim li nîv sîng û beran
Helebê vir da mel e
Keleşa min ji hemamê derketî por î şil e
Ramûsanekê bide min, diya te got, bibêj: “Diranê min kul e.“
Were ez [û] tu herne bêriya miyan
Bigerine keyf û laqirdiyan
Eger diya te go;“Mere dereng e.“
Bê:“Zêrê serê min qetiyan.“
Li ser me ra çiya zer e
Di bin me ra dar û ber e
Hewara min Xwedê bextê bêbextan lê wergire
Pezê keleşa min bizin e
Min gerandî li deşt û tirazan e
Ezê bême Şam a şerîf, Heleba xopan
Bidim bi cotek bazin e
Pezê keleşa [Keleş] a min î beran e
Min gerandî li rêyan û li derban e
Ezê bême Şam a şerîf, Heleba xopan
Bidim bi cotek nîşan e
Ferato, feratê vî paloyî
Bi ser da xwar bû kelekek ji mîrî
Lawikê min çû welatê xerîban, dikim vî bîrî
Min dî bû li bin dara Leylayî
Zulfêd [wê] hilî dikin vî semayî
Ezê destê Keleşa xwe bigirim
Bavême bextê meriya mayî [mermayî]
Bazîdê vir da xaç e
Zêr li enya kafir bûne tac e
Kê dîtiye lawê begzade bi keç kurmanc e
Subhane di girî da
Bayekî hênik lêda
Xweziya min destê xwe li ber xanimê girêda
Dilê min ji te nabe
Tu diçî h’alê min ê çawa be
Terka dêma gulîn nadim heta dîwana sibê rabe
Min li diyarê gedûka payî
Benda şûr kete ser ebayî
Terka çavê belek nakim heta axirê dinyayî
Çavê reşî qedan e
Dan bi dane kildan e
Van çavan gelek jin ji mêran berdane
Sube ye tavê daye
Li ser sîng û berê zer vedaye
Du ramûsanan bide qismetê Xwedê daye.
