Nabibisaya
  Yang

PAGSUGBO, PAMUSIAG AG PAG-USWAG

    Sa mga nagrayang Silak ay medyo nagkatuyog kaling pobreng panambitan sa kadahilanang, maladyaw sa makitir nak isip ag mababaw nak paghuyagok namumungawmungawan uli sa ranutnot nak mga sigulanong naghuhuyat nak tuytuyon.

 ***

Kag nagligar nak Mayo, masubo kaming nagsalta sa banwang tinubuan para magramay sa pagtaliwan et amo pinalanggang Manong Mac.  Maramong kasimanwang nakiramay sa amo sa panahong kami ay nagluluksa, patunay siguro nak maramo ka ida naserbihang mga kasimanwa at kag sida ay buhi pa.

Sa mga nagbulig ag nagramay sa amo kasubuan, guingpapaabot namo ka hanuyos nak pasasalamat.

Sa pagsugbo et ka kinabuhi ni Manong Mac, nakita namo ka Pamusiag et bag-ong adlaw: bag-ong pag-asa nak kami ra siguro ay pwedeng maging usang Manong Mac gihapon: mabuligon; mahilakon; ag mapaghigugma sa Panginoon.

 ***

Sa malip-ot nak pagpaniir sa banwang gingrak-an, ako namuyatan ka mga pamusiag et pag-uswag, mga senyales et pag-asensong mayungotey nato maaguman kung kita ay MAGKAKAUSA yang.

Ako nakita ka mga kongkretong poste nag gingtugsok it DPWH sa ragat katupar it pantalan, mga pilote kuno para sa planong “mini-port” nak   atunaaney et patrabaho.

Niong mga kaanduan ka mararaya et kali? Inde mabilang sa tudlo, mga ragkong barko ay pwedeng mag-atraka, wayaey et pagbote ag pagleyo-leyo para magkarga ag magdiskarga et mga pedido; maalwaney ka paghakot et mga pangarga it mga estibador.

Mataboey pati ka Circumferential Road, nagpapamusiagey ka maalwan nak pagbiyahe, patukar ag pabisong sakay sa motor man o sa multi-cab.

Maayos nak transportasyon sa ragat ag duta; mga indikasyon et pag-uswag et banwang Bantoon.

***

Sa pag-uswag ay kanunot ka mga pangyayaring buko kaanduan ka hanrom, mga bagay nak nauuso ag nagiging parte it kabatan-on.

Inggwa’y kuno it naggagamit et shabu ag marijuana sa ato banwa. Nakakahadlok kali lalo sa mga kabataan nak mga malinghor pa para maintidihan ka mayain nak epekto sa inra mga kaisipan.

Kung klaro kali, dapat siguro ay maghiwasey ka ato Local Police. Gabutay ninro kinang mga panayok nak marijuana habang maintik pa; arestoha’y kinang mga suspected shabu users o pusher kung inggwa.

Bantoanong Kabataan, usang panambitan: aya giparaya sa bisyo nak droga; pangraliang ginhawa, ka kabaydo ay habang buhay nak agwanta; nakayog ka utok, nasisira ka hitsura; nayaga ka mata ag nagmumugtaw pa!!!

Picture
courtesy of Faigao Museum,
Banton, Romblon