|
It-Twaqqif Tal-Parroċċa Ta’
Raħal Ġdid
Il-Knisja ta’ Santa Ubaldeska tkabbret bil-ħsieb
li ssir Parroċċa. Bir-raġun kollu, il-Pawlisti talbu u
stennew dan permezz tal-Kapillan ta’ Ħal Tarxien stess Dr. Dun
Franġisk F. Attard li bagħat ittra lill-isqof Pietru Pace fis-7
ta’ Marzu 1905. Dan għax Raħal Ġdid kien qabeż lil
Ħal Tarxien fil-popolazzjoni u l-Pawlisti kienu qed jitqarrsu jmorru
bil-mixi sa Ħal Tarxien għal kull Sagrament jew ħtieġa
spiritwali. Għall-ewwel, l-isqof ma tax tweġiba pożittiva,
iżda wara petizzjoni, iffirmata minn 278 ruħ, inklużi
Anġlu Cutajar, Prokuratur, u Dun Karm Bologna Rettur, l-Isqof talab
lill-kappillan ta’ Ħal Tarxien isib qassis li jkun jista’ jagħmel
minn floku f’Raħal Ġdid. Naturalment l-għażla
waqgħet fuq Dun Salv stess. F’dikjarazzjoni ta’ l-Isqof fis-27
t’Awissu 1905, huwa amar lir-rettur ta Sant Ubaldeska, Dun Karm Bologna
idawwar il-benefizzju tiegħu lejn l-altar li kellu jitwaqqaf
f’kappellun li kellu jinbena taħt l-isem u titlu ta’ Santa Ubaldeska,
skond il-ftehim ta’ l-1900 mal-Gvern. Jumejn wara, l-Isqof Pace
ħareġ digriet li bih Raħal Gdid sar viċi
parroċċa.
Il-Knisja kellha d-drittijiet u d-dmirijiret kollha
li jmissu viċi parroċċi bħalha, mingħajr dannu
għad-drittijiet ta’ Ħal Tarxien bħala parroċċa,
Il-Viċi Kappillan kellu d-dmir li jieħu ħsieb spiritwali
tal-kommunita Nisranija ta’ Raħal Ġdid, li kien jinkludi li
joqgħod f’Raħal Ġdid, u li fil-Ħdud kollha u fil-festi
tal-preċett għandu jqaddes fil-għodu u jagħti
tagħlim tad-duttrina nisranija wara nofs in-nhar. Għal dan
ix-xogħol tħallewlu 20 Lira fis-sena mid-dħul tal-viċi
parroċċa. Sadattant inbena l-kappellun ġdid għall-altar
ta’ Santa Ubaldeska bil-benefizzju tar-rettur. L-altar maġġur
waqqfuh għall-isem tal-Qalb Imqaddsa ta’ Gesu li tiegħu
għamlu inkwadru sabiħ.
Fi żmien erba’ snin, fl-1909 iżda,
il-għadd tan-nies f’Raħal Ġdid kiber għad-doppju ta’
dak ta’ Ħal Tarxien. Kien jidher ċar għalhekk li Casal Paola
kellha tkun, bi dritt, Parroċċa għaliha. Wara talbiet li
saru min-nies ta’ Raħal Ġdid l-Isqof Pietru Pace bi qbil
mal-Kappillan Attard ta’ Ħal-Tarxien iddelimita t-truf
tal-parroċċa l-ġdida ta’ Casal Paola fis-26 ta’ Ottubru
1909. Saru l-preparamenti meħtieġa u fit-12 ta’ Lulju 1910
l-Isqof Pietru Pace ħareġ id-digriet li bih Casal Paola,
Raħal Ġdid, ħa l-istat tiegħu bħala
parroċċa. Fid-digriet iffirmat mill-kanonku Lwiġi M.
Camilleri, l-Isqof Pace spjega li Raħal Gdid kien ‘il bogħod wisq
minn Ħal -Tarxien, li l-għadd ta’ nies kien kiber ġmielu u
ġa kienu rranġaw il-knisja Viċi Parroċċa ta’ Santa
Ubaldeska li kienu issa ddedikaw lill-Qalb Imqaddsa ta’ Ġesu. Għalhekk
ħuwa, bis-setgħa mogħtija lilu bħala delegat
Appostoliku, fired lil Raħal Ġdid u waqqfu bħala
parroċċa taħt l-isem tal-Qalb Imqaddsa ta’ Ġesu, b’kull
dmir u dritt li jmissu lil Knisja Parrokkjali. Dun Salv Busuttil kien
imlaħħaq Vigarju Kurat sakemm ikun maħtur l-ewwel kappillan.
L-isqof, f’edittorjal maħruġ mad-digriet,
ħeġġeġ lin-nies tal-parroċċa l-ġdida
biex jaqdu dmirijiethom ta’ parruċċani tajba. Fl-aħħar
Raħal Ġdid kien indipendenti minn Ħal Tarxien.
Ikompli >>
|
