FLIMKIEN
X’ħin tirċievu
din ir-Rivista fid-djar tagħkom żgur
li se tistaqsu “DIN X’INHI?” Din hi Rivista li l-ħtieġa tagħha
ilha ħafna tinħass f’pajjiżna. Ilha
x-xewqa ta’ ħafna nies li
l-parroċċi f’Malta jaħdmu
aktar flimkien u li d-diversi fuljetti parrokkjali li jiġu
ppubblikati jkollhom aktar materjal ta’ formazzjoni għall-familji tagħna.
Kienet ukoll ix-xewqa ta’ ħafna
Kappillani li jogħla l-livell
tal-fuljetti parrokkjali tagħhom u dan ma
kienx qed ikun possibbli minħabba
l-ispejjeż meħtieġa għall-istampar.
Għaldaqstant
il-Kulleġġ tal-Kappillani ddeċieda li għandu jsir esperiment biex jintlaħaq dan il-għan. F’din l-inizjattiva ġdida qed jieħdu sehem numru kbir ta’ parroċċi
u għalhekk intgħażel dan it-titlu FLIMKIEN.
Din ir-Rivista se tibda titqassam kull xahar. Kull parroċċa se jkollha spazju ddedikat għaliha. Għalhekk
fil-paġni tan-nofs se nippruvaw li jkollna materjal, kif dejjem
ppruvajna nagħmlu, li jkun
ta’ nteress speċjali għall-parroċċa tagħna biss. Għal dan l-iskop żammejna l-logo
tal-fuljett Is-Saltna, li nistgħu ngħidu issa qed
jilbes libsa ġdida. Jiddispjaċina
li xi rubriki regulari li tant kienu jintogħġbu mill-qarrejja issa se jkollhom jitħallew barra minħabba nuqqas ta’ spazju.
Nawgurawlkom li taqraw kemm jista’ jkun l-artikli nteressanti li, bħal ma taraw minn din l-ewwel ħarġa, huma miktuba minn
persunalitajiet magħrufa u ntiżi
sew fis-suġġett li jiktbu dwarhu. Din il-kitba żgur li tgħinna nikbru fil-ħajja nisranija.
Nirringrazzjaw lil dawk kollha li matul is-snin tant ħadmu u għadhom jaħdmu biex
il-fuljett parrokkjali tagħna seta’
jkun ippublikat regularment u jitqassam fi djarkom.
|