Van do Prestige e Aínda Non Dimitiu Ninguén ¡Dimíteos ti!

O ESTRANO CASO DUN CARNOTÁN DESORIENTADO:
UNHA COUSA BOA, UNHA MALA E UN MISTERIO

No medio de tanta queima que houbo estes días no concello de Carnota anda o noso diputado ocupado en cousas que nos deixan un pouco descolocados. E de verdade que despois do que levamos vivido duns anos para acó non é doado.
Así é que non sabemos como interpretar que ande a estas alturas buscando pola plataforma nunca máis; as reflexións que resultan deste feito sen precedentes son variadas e eu non podo deixar de expresar aquí a miña.
Penso que as manifestacións de Oreiro deixan asomar unha cousa boa: el pregunta pola plataforma porque quere amosar o seu malestar pola pésima política forestal levada a cabo polo PP nos dezaséis últimos anos. Por iso nos busca, para reclamar, para exixir solucións e dimisións. Noraboa. Nunca é tarde e nós non discriminamos a ninguén.
A cousa mala vai referida á súa memoria, á súa mala memoria: ¿e que xa non lembra que o seu partido, xunto coa TVG, a voz de Galicia, o correo galego,... acabaron coa Plataforma Nunca Máis? Bueno, existir existe, pero non como entidade senon coma un sentimento, o cal me fai ser pesimista sobre si será quen de atopalo. Ai, esa memoria.
Por último, o misterio tradúcese no seguinte: ¿qué pensarán no seu partido da súa batasunización, dos seus ladridos? ¿É compatible a estas alturas ser militante do PP e berrar nunca máis? ¿Seguirá a cobrar o seu soldo de diputado?
Voulle dar unha solución para que non teña problemas co seu partido. Vostede ten moita dor e moita rabia dentro, e quere pedir a dimisión dos responsabeis da política forestal que nos levou á actual situación e estes...xa non están. Pois pódolle dicir que é un cidadán privilexiado xa que se pode permitir o luxo de pedir responsabilidades sen saír da casa: faga unha pancarta, póñase diante do espello, e berre moi forte: nunca máis, nunca máis, nunca...