15 December 2003

Mga nagmamalasakit na kababayan,

KAILANGAN PO NILA KAYO!

Marahil hindi na po lingid sa inyo ang kasalukuyang kalagayan ng mga stranded nating kababayan na nasa ating embahada sa Diplomatic Quarters. Nasa ika-apat na araw na po ang kanilang "hunger strike". Determinado at matatag nilang pinaninindigan ang kanilang aksyon. Ayon sa kanila, ito ay hindi nabuo ng isang araw o kanila lamang nasumpungan. Kung tutuusin, anila pa, ayaw nila sanang humantong ito sa ganitong kalagayan.

Subalit ang patuloy na magpalabuy-laboy sa lansangan, ang kawalang kasiguraduhan sa kanilang kakainin sa araw-araw at ang kawalang-linaw ng kanilang kaso gayundin ang kawalang katiyakan nang kanilang pag-uwi sa ating bayan ang nagtulak sa kanila upang gawin ito. Sa kasalukuyan nilang kalagayan, walang puwang ang argumentong "bawal ang ganitong aksyon dito sa Saudi Arabia" dahil handa sila sa anumang mangyayari sa kanila.

Sa pananaw ng Kapatiran sa Gitnang Silangan (KGS), ngayon sila nangangailangan nang ating tulong at kalinga. Sa kagyat, hinihiling namin ang inyong personal na pagdalaw sa ating mga stranded na kababayan upang ipakita ang ating simpatya sa kanilang abang kalagayan. Tatanawin nilang isang napalalaking bagay at tulong ito para sa kanilang mga hinaing.

Ito man lamang po ay magawa natin bilang paggunita sa nalalapit na Kapaskuhan.

Una na ang aming pasasalamat.


Mabuhay po kayo,

Richard F. Bautista
Chairperson
Kapatiran sa Gitnang Silangan (KGS)
Riyadh, Kingdom of Saudi Arabia