Ndeheri Persoalen

Mbue me enda enggo tambah bahan pikiren ibas tulisen-tulisen kiremen keluarga milis nari, milis egroups.com tanahkaro/kristenkaro/berastagi. Kam kerina si enggo ergairah nyemarakken milista e, kam si nanggapi alu antusias tulisen si enggo ku kiremken ku milis tanahkaro e, duana kam kalak Sembiring ena i Batam nari, si enggo mereken janah memperluas pokok-pokok pikiren ibas tulisen e, arah enda patut me aku ngataken bujur melala man bandu duana. Man bangku, selain nambah perbendaharaan kata-kata cakap Karo, si la talu pentingna, enda me kap mbuka pikiren erdasarken situasi konkret/aktuel i taneh kemulihenta, bage kape tah enda me salah sada dalan si mehulina man banta mersada arih ngeraduken odakta ngukuri kai si mendesak sibahan ibas tingkat perkembangen negerinta gundari enda, kai sibahan simehulina ras si mungkin, ngepkep perkembangen ras kemajuan kalak Karo ras kerina daerah ingan kemulihenna, ngangkat nasipta si mbue dengan ketadingen. Ija nari kin me enda mungkin idat tambahen pemeteh tentang daerah ras bangsanta adi la ibas kam nari kerina?

Ibas tulisen si enggo lewat e, si singetken soal pendidiken, meningkatkan kebudayaan/pengetahuan, kwalitet kehidupen kalak Karo sebagai tantangen pertama man banta, terutama man petugas-petugas eksekutif/legislatif kalak Karo i daerah ras i pusat. Maun-maun bagi si sangsi ka nge aku ibas perumusen e. Tah ulin me adi sikataken/sirumusken: enda me tantangen man banta kerina kita kalak Karo! La lit si erndobah, la lit si tading. Adi siinget ibas adatta emkap sistem anakberu-senina-kalimbubu. Adat enda cerah perspektifna, mbelin ertina man perkembangen pikirenta, mbelin ertina man perkembangen bangsanta ibas perkembangen demokrasi, sebab enda me sada contoh demokrasi sejati, ngatur kehidupen individu ibas kolektif keluarga si ndeher bagepe si ndauh, demokrasi horizontal dengan sistem ’hierarki’ kolektif bergilir dan adil, sistem demokrasi si lenga ku idah lit bandingenna ibas perkembangen demokrasi dunia. Sistem demokrasi enda kapken enggo me si pake ibas perdalanen kegeluhenta, sejak ratusen tahun, tah pe mungkin enggo ribuan tahun, sistem demokrasi si mbelin ertina ibas zaman modern enda pe, sebab asa gundari nge sipake denga janah la mungkin la ipake ibas ngatur kegeluhenta sehari-hari ibas hubungen kekeluargaan setiap individu gia pe kita misalna ringan ndauh ibas kutanta nari. Jadi tantangen e, adi si nehen pe alu senter adat ras tradisinta, alu senter demokrasi, alu senter reformasi, salah me kapken adi la si kataken: Enda me tantangen man banta kerina! Persada arih raduken odakta! 

"Masyarakat Karo termasuk salah satu suku bangsa yang cukup gigih dalam menyekolahkan anak", nina Thomas A.Sembiring i Batam nari ibas tulisenna i milis tanahkaro (responna man tulisen KAI NGENDA SIBAHAN?). Enda seh me kapken payona, kenna me kerina kita ibas pusuhta adi si inget-inget mulihken uga susah-payah ras serana nande-bapanta janah labo jarang turangta, seninanta bagepe tah si biak anakberu/kalimbubunta ikut kerina erkorban ndukung usaha sekolahta e. Ibas usaha sekolah nuntut ilmu enda, melala me kita si berhasil, tapi melala ka nge si ngadi itengah dalan, la bo kapken perbahan kisat tah la tutus, tapi si mbuena emkap perbahan la nai lit sabah tahpe juma si banci igadeken! Emakana "genduari enteremkel kita kalak Karo si tading ibas Taneh Karo si la tamat sekolahna." nina ka pe T.S.Meliala i Batam nari ibas tulesenna i milis tanahkaro. Lit si la tamat sekolah tinggi, si la tamat SMA tah pe melala ka nge si la tamat SMP tah pe SD, kerina erkite-kiteken kesusahen ekonomi ngurus sekolah e, tahpe jarakna ku sekolah si lit e ndauhsa man anak-anak si kitik denga, la lit sen mbangun sekolah si ndeher ku kuta ingan tading penduduk. Tapi adi si bandingken asakai buena sen si ’bene’ i pusat bage pe i pemda Sumut ibas zaman diktatoris Orba, adi biaya man SD/SMP/SMA i Sumut ngenca la bo kapken asa ujung-ujungna pe. 

Bage ka pe adi si nehen kekayaan alam ras kemungkinen perkembangen ekonomi taneh kemulihenta (Sumatra Timur), bage ka pe adi ngenehen semangat kegigihenta nekolahken anak (enda kapken modal spirituil si la ternilai), janah adi la lit si ’pande mbeneken sen’, janah adi kerina kekuaten rakyatta ras kalak si beluhta "kita sinergykan menjadi satu kekuaten yang cukup hebat untuk diberikan kepada masyarakat Karo" (kutipen ibas tulisen Thomas A Sembiring nari), maka lit me kemungkinen ngusahaken ras memperjuangken sekolah gratis ibas SD, SMP terus ku SMA, bage pe bantuan finansial tertentu meringankan beban mahasiswanta ibas kerina daerah kemulihen kalak Karo, i Sumatra timur ibas 4 kabupaten + Dairi ras Karo Aceh. (50% lebih kalak Karo tading iluar kabupaten T.Karo, akibat batas-batas buatan penjajah Belanda tah pe akibat garis-batas buatan pemerintah diktator Suharto/Orba). 

Pengalamen sekolah i Eropah, misalna i Swedia, sekolah ngayak SMA kerina gratis bage pe ndat nakan sekali (makan siang anak sekolah sekitar jam 11- 12 siang ). Bage kape mahasiswa ibere duit pinjamen, ertina ibayar kembali enca pagi selesai janah enggo dat dahin, ipotong ibas gajina nari (ibas jumlah pinjamen e, sebagian gratis). Soal makan siang enda tah lenga bo aktuel, tah lenga tercapai man banta (tapi engkai maka lenga? Paling tidak i SD ras SMP!), tapi sidebanna gratis ibas sekolah e, kuakap enggo me mungkin si ikuti. Kekayaan negerinta ras semangat meganjang bangsanta mereken kemungkinen pelaksanaan si enda ibas kenyataan. 

Penghalang si mbelin man si enda kerina emkap bagi si ikataken ndai adi setiap tahun sen negara ’bene’ usur la ieteh kuja lawesna, penakit kronis sejak kekuasaan diktator Suharto/Orba. Tapi penakit enda mungkin si tambari genduari ibas zaman pergolaken besar enda, ibas kancah gerakan besar reformasi ras geraken besar demokrasi enda, alu operasi besar, ertina kerina kita ngembah ’piso-operasi’, kerina ikut ngoperasi ula sada pe tading. Enda ngenca dalan nambari penakit e, la lit si deban! Ijenda perlu cara transparant, perlu media, kerina bentuk media, media elektronik bage pe kerina bentuk media biasa seh pentingna, gelah kerina banci i gerakken, kerina banci ikut ibas geraken transparant operasi besar e. Musuhta emkap penakit, terutama penjegahen penakit e, penakit si enggo ndekah ngerongrong kesehaten kegeluhenta, kesehaten moral ras cara berpikir si enggo me ndekahsa nganggu perkembangen ekonomi ras kebudayaanta. Operasi enda berjangka panjang, terus menerus la erngadi-ngadi, sebab penakit enda banci reh katawari pe, janah banci njangkiti ise pe, emaka musuhta labo sekalak-sekalak individu tertentu, tapi musuhta emkap penakit si enggo kerina kita metehsa, penakit si enggo terkenal e, KKN ibas masalah ekonomi/keuangan, ibas masalah politik/kekuasaan bage pe ibas masalah peradilan/juridis, ras kerina ibas masalah si debanna pe, sebab ibas zaman diktatoris Orba banci me alu kepastian sikataken lanai lit lapangen kai pe ije la rasar KKN. Fenomena enda enggo sempat membudaya, enggo sempat melembaga ibas hampir kerina lapangen kegeluhen bangsanta, ibas kerina institusi negara mulai i datas nari terus bage pe ku teruh sampai ku tingkat kelurahen, RW/RT. 

Ise kin ngenda si nggit jadi pengulu/camat tahpe jadi polisi adi la ia banci korupsi? Adi enggo tertutup kerina dalan si memungkinkan ’uang masuk’? Ibas tingkat kesedaren si gundari jawabna: La lit isepe! Si idah me usur asakai ’uang keluar’ setiap calon lurah/camat (terutama i Jawa) ula ngataken ’uang keluar’ calon bupati ibas setiap pemilihen ibas masa diktatoris Orba, bage pe ibas pemilihen si mbaru enda (1999/2000), sebab enggo me i hitung-hitung untung-rugina, asakai ’uang keluar’ ras asakai pagi ’uang masuk’, adi enggo kari berhasil kundul ibas kursi jabatan e – untungna pasti berlipat ganda! Enda me maka pang kita ngatakenca KKN enggo melembaga, enggo membudaya ibas kegeluhen bangsanta. Dasar ideologi si ipake emkap keserakahen/ketamakan: duit – kekuasaan, kekuasaan – duit. Moralta emkap moral duit, ertina si la erduit la lit inganna ibas kalak terhormat, si mbue duitna ia me jadi pujaan janah terhormat. Duit ipake ndarami kekuasaan, kekuasaan ipake ndarami duit; duit ipake ndarami gelar, gelar ipake ndarami duit (ula si peseri ras ndarami ilmu/pemeteh). La lit sada pe si ngaku la er Tuhan, tahpe si encidahken la rajin sembahyang, ngerauk duit haram ras rajin sembahyang enggo ergandengen tangan, ertina kerina me enda atas nama/sepengetahuan Tuhan. Tah enda me maka Voltaire (300 tahun si enggo lewat) erkata: "Adi soalna masalah duit, kerina jelma sada agama." Ise kin si agamana lain ibas zaman gemilang KKN Orba? Rumah sekolah cires tarumna, anak-anak udanen sangana erlajar (terutama ibas daerah-daerah si tertading/itadingken), lit kin pejabat si sempat ngukurisa? Enda me ideologi ras moral Orba! 

Mungkin kin bangsanta nadingken ideologi/moral Orba enda? Si persempit daerahna. Mungkin kin kalak Karo nadingken ideologi/moral Orba e adi kin ateta enggo tutus mbangun taneh kemulihenta?

Ugakin ideologi/moral kalak Karo?

Kita la nggit subuk, biasa sikataken. Tah labo ngenca sikataken, tapi bage me umumna lagunta ibas kegeluhenta sehari-hari. Janah enda siakap kapken sikap si positif, patoken si mehuli man banta. Kalak si deban pe melala nge metehsa, bagenda me kalak Karo. Kebalikenna emkap ninta kalak si nggit subuk, kalak gutul tah pe kalak anceng. Sejajar ras ’la nggit subuk’ enda, kita pe senang dan bisa menikmati kesepian dan ketenangan (introvert), sebalikna emkap kalak si senang dan bisa menikmati keributan dan ketergesa-gesaan (extrovert). Definisi introvert/extrovert enda menurut C.G.Jung. Sikap-sikap psikologis si lit ibas kita mbelin pengaruhna man caranta rukur, ibas gilirenna enda mbelin ertina man ideologi/moralta secara umum. Adi kita la nggit subuk janah la senang keributen/ketergesa-gesaan, enda kuakap dasar si la ternilai ergana, jadi dasar si mehuli ku arah tujuan e, nadingken ideologi/moral Orba e, moral si ’nggit subuk’ banci ikataken.. Emaka labo kuakap susahsa siakap ngubah dirinta adi persoalenna nadingken si ’subuk’, sebab la bertentangen ras watak psikologis si enggo tertanem mbagas secara alamiah ibas jiwa ras kegeluhenta. 

Adi si singetken ijenda nadingken ideologi/moral Orba, labo kapken berarti kita (kalak Karo) ndai ikut nggulingken-bana ibas kubang mbagas paya-kerbo KKN Orba, tah pe ikut ndilati im….put diktator Suharto ngayak mejelis, ertina berdiri digaris depan ngelaksanaken kerina keinginen sang diktator. Enda kuakap mberatsa me man banta, sesuai ras sikap psikologis self-respect/dignity kalak Karo, bage pe sesuai ras kenyataan si banci si saksiken ibas zaman Orba, ise ndai tah pe asa gundari si ndeherna ku bapak ’pembangunan’(?) e. Sang diktator pe ngerti me enda kalak Karo maka sadape la ipakena langsung jadi tukang bersih-bersihna. Keterikutenta enda me kapken terbaba arus angin si megegeh, tapi tetap kuat ertahan ngusahaken la ikut enceburken-bana ibas kubang si mbagas, labo perbahan pandena kita ngenehen 32 tahun ku depan, tapi enda me pencerminen perasaan mendalam dan unik serta kekukuhan kepercayaan terhadap potensial tinggi dalam diri sendiri dalam memandang dan merespon kejadian luar, sifat-sifat si secara alamiah tertanem mbagas ibas jiwa kalak Karo. 

Uraian enda banci ka kapken iertiken lain, pertama bagi si cenderung mbela jelma si ersalah ibas kalangen kalak Karo, kedua emkap ngelepasken tanggung jawab kerusakan besar si iakibatken Orba. Penjelasen perlu me, man banta sendiri bage pe man kerina iluar kalak Karo. 

Definisi kekuasaan menurut Max Weber emkap kemampuan seseorang atau kelompok menjalankan kehendaknya menentang kehendak yang lain. Kehendak si erdalan, enda me kehendak seseorang/kelompok si berkuasa menentang kehendak si la berkuasa. Enda me sepenuhna terjadi i Indonesia Orba, pusat bage pe daerah, la terkecuali Sumut, kekuasaan absolut individu/kelompok tertentu, la pernah lit kekuasaan integratif menurut kehendak rakyat secara demokratis. Kalak Karo banci ka nge ikataken ras bage ibas kenyataan pe, kundul i luar kekuasaan, bage i Sumut apai denga ka i pusat sebab sang diktator ngerti me ise si banci i pake. Gia i T.Karo (ijenda pendudukna kerina kalak Karo, tapi jumlahna la lit setengah pe ibandingken ras jumlah kerina kalak Karo si lit i Sumut) bupatina kalak Karo, tapi tan ras nahena tertambat sebab militer ras polisi (ABRI) me ngenca si erkata masin. Kalak Karo si tading i luar T.Karo, gia jumlahna buen asa kalak Karo i T.Karo, ibereken kekuasaan penuh ibas soal ertoto man si Mehaganta, gelah setan ras kerina begu ula pagi merawasa, erpangir ras encibalken belo, enda me ngenca. Ibas realitetna gubsu ras ABRIna bage pe kerina bupati-bupatina, adi la kelompok kalak Tapanuli tentu kelompok kalak Melayu (bagi si gundari) si usur nentuken nasip malang kalak Karo i daerah-daerah e. Kesempaten kalak Karo ku bas kekuasaan ijenda (kai denga ka si ergelar tingkat Sumut) bali me ras mindoken bulan ras bintang gelah ndabuhken emas asa takal kuda ku lebe-lebenta. Emaka banci me sikataken, ndarami kesalahen kalak Karo (sebagai suku bangsa) i Sumut ibas kekuasaan absolut Orba/Golkar la mbue ertina, kita ndauh tersingkir ibas kekuasaan nari. 

Tentu la ka bo kapken banci si kataken lalit kalak Karo si terjerumus kubas moral Orba. Absolut la banci lit pendapat bage. Bagi si enggo i singetken ndai, kenna arus angin si bage gegehna melala nge kalak mbulak, termasuk jelma kalak Karo, gia ibas ingan jabaten si teruh-teruh adah. Tapi ula kita metersa. Ibas geraken reformasi, geraken demokrasi, pendidiken kultur/kebudayaan enda, ula kita ngenehen kudatas ngenca. Jabaten si teruh-teruh enda me pagi si mbue menentuken berhasi tah lahang kita ibas tujuanta e, sebab mbangun daerah ateta, ningetken soal pendidiken, soal kultur/kebudayaan, penting me usur i teruh nari, labo kapken banci kita nangkih meganjang adi lalit bangunen si meteguh (redan) i teruh nari. 

Persada arihta, Raduken odakta, simulai me geraken pehuli nasip enda, i T.Karo bage pe ula sitadingken kalak Karo si ringan i daerah-daerah i luar ’batas’ T.Karo, ertina kerina taneh kemulihen kalak Karo! 

Bujur ras mejuahjuah kita kerina.

Malem Ukur Ginting.
Swedia, Okt 2000.