Reh menda usur ukur tah banci sibahan tah kai gia pe, tah banci kari mbantu memperlancar perkembangen kemajuan ras pembangunan negerinta, bage pe taneh kemulihenta. Meningkatken kemajuan kultur/kebudayaan kalak Karo sebagai salah sada suku bangsa dari ratusan suku bangsa si lit i Indonesia, sebab percaya nge kita kerina, kemajuan Indonesia enda kapken tergantung sepenuhna man kemajuan setiap suku bangsa ras kerina suku bangsa la sadape ketadingen tah pe itadingken/ianak-tiriken. Peningkaten kwalitet kehidupen la me kapken terpisahken ras kemajuan/peningkaten kwalitet kultur/kebudayaan janah enda kerina pe la ka bo terpisahken ras kemajuan ekonomi negerinta secara keseluruhen ras daerah inganta khususna, ije umumna kalak Karo tading (i Sumatra -Timur, ibas 4 kabupaten: Tanah Karo, Dairi, Deli-Serdang, Langkat – gia penariken garis-garis batas daerah-daerah enda kuakap la adil, lenga banci ikataken garis batas definitif/final, sebab enda me ulah penjajah kalak Belanda tahpe lakon diktator Suharto/Orba).

Rukur ku jah rukur ku je, ngalor ngidul nina kita kalak Jawa, tah labo kari kita seh seh, tapi enda me enggo lit si erbahan secara praktis, kam anak-anak muda/mahasiswa/alumni si enggo nciptaken milis enda. Singkat, praktis ras mbue gunana, man banta kerina sebagai salah sada dalan ningkatken kebudayaanta, nggunaken alat termodern ibas abad enda – komunikasi elektronik. KEPRAKTISEN, KESEDERHANAAN dalam pelaksanaan/penyelesaian persoalen, bagi si enggo ibahan kam enda, tah enda me filsafat si cocokna ndorong perkembangen i daerahta bage pe Indonesia. IT (teknik informasi) enda si gunaken me semaksimal mungkin. Bagi kami si sangana tading i perantauan enda tah enda me ngenca dalan si tersedia maparken pikiren/ide si mungkin banci iterima janah si mungkin lit gunana man perkembangen taneh kemulihenta.

Banci ikataken kerina me kita enggo metehsa uga belinna ertina IT enda man perkembangen kemajuan bangsa-bangsa i dunia, i Eropah bage pe i Asia daerahta. Daerah/negeri si enggo maju pesat, enda me kapken daerah/negeri si enggo fasih nggunaken bage pe ngembangken IT enda. Kemajuan IT i sada negeri nandaken ketinggian kwalitet kebudayaan/SDM (termasuk SDM akademik) ras sekali gus ka ndorong perkembangen kebudayaan/SDM daerah/negeri e. La kin IT enda sitik luar biasa pengaruhna? Mungkin ka kin enda luar biasa pengaruhna man perkembangen daerahta/negerinta? Jawabna enggo me pasti, tapi enda me tergantung man banta kerina si enggo lit kesempaten ras kemungkinen nggunaken alat elektronik enda, bage ka pe man bandu kerina si beluh ngembangken teknik enda, ras perluasen pemakaianna i daerah kemulihen kalak Karo kerina. (Adi ku singetken ijenda daerah kalak Karo, tahpe daerah kemulihenta, tentu ka nge la bo tertadingken Indonesia, sebab bagi si enggo ijelasken i datas, perkembangen setiap suku bangsa janah kerina suku bangsa, enda me kapken perkembangen riil negerinta Indonesia, labo mungkin kita maju berkembang sisada, tapi setiap suku bangsa arus nge berkewajiban mengembangken ras memajuken dirina/daerahna, sebab ndungi tegun mbelang labo mungkin adi tegun kitik pe lenga terdungi kita).

Genduari si gunaken me alat komunikasi elektronik enda secara efektif, tukar menukar pikiren ras pengalamen, si terjadi i taneh kemulihenta, i Indonesia bage pe secara internasional sebab melala ka nge kita si tading i luar negeri, banci ikataken i 5 benua. Pikiren/pemgetahuan bage pe pengalamen secara internasional usur nge perlu, sebab labo lit negeri, kai denga ka sada daerah mungkin maju sendiri tanpa pengaruh luar.Tapi pemusaten ras titik tolakta bage pe ingan ngelangkahta mesti nge si fokusken ku daerahta, adi kin ateta memajuken/mengembangken taneh kemulihenta, meningkatken kwalitet kultur/kebudayaan kalak Karo, kwalitet kehidupen, bage si la kurang pentingna tah pe mungkin si terpenting, emkap peningkaten kwalitet pikiren/pengetahuan kalak Karo. Ijenda terpaksa nge kita ngerana soal pendidiken. Persoalen mbelin man banta kerina, man Indonesia, seluruh dunia. Tapi si perkitik lingkungenna – taneh kemulihen kalak Karo. Enda ku kutip sitik kata-kata T.S.Meliala i Batam nari ibas tulisenna i milis tanahkaro: "Sada masalah si perlukel kuakap iperhatiken ibas taneh kemulihenta emekap masalah pendidikan. Sieteh maka enteremkel kalak karo si enggo meganjang sekolahna/pendahinna tapi ngukurken ugakin maka pendidiken i taneh karo reh majuna bagi sikurang si mikirkenca." Ijenda teridah me kai si perlu ras kai si terjadi – melala si meganjang tapi sitik si mikirkenca.

Adi si ukuri mbagas sitik, ibas kalimat ke 2 kalak sembiringta e, tercermin me kerina seluruh filsafat kegeluhen kalak Karo, ciri khas, sikap ras karakter psikologis si enggo terbaba secara alamiah ibas kelahirenta nari (introvert, soal enda si perluas ibas kesempaten si deban), bage pe mencakup ka nge kelebihen ras kekurangenta sebagai salah sada suku bangsa Indonesia. La kin enda seh randalna adi enterem kalak Karo si meganjang sekolahna/pendahinna? Enda me si positifna! Segi lainna, sitik si mikirkenca uga maka muat buena meganjang sekolahna/pendahinna. Enda me negatifna! Adi si sederhanaken enda kerina (secara teori) emkap gelah kita mendorong si positifna janah ngurangi si negatifna. Masalah si la sederhana emkap praktekna, uga carana ndorong si positif e, janah uga carana ngurangi si negatifna e si banci ikataken si terpenting janah mendesak. Sada si enggo pasti emkap adi muat lalana kita mikiri si enda, muat lalana ka me dalan si mungkin si pake rikut muat cepatna kita ndungisa. Jadi tantangen pertama (challenge, gelah ula isalah tafsirken) em kap uga maka muat lalana kita si mikiri soal e, terutama tentu uga maka muat lalana petugas politikta, petugas eksekutif/legislatif i daerah bagepe si enggo ndauh i pusat si mikiri ras ncurahken tenagana ku je. Petugas daerah i T.Karo, Dairi, Deli/Serdang ras Langkat si langsung berhadapen ras kalak Karo la banci lahang terpaksa ikut ibas tantangen (challenge) pertama ndai. Sada segina emkap ibas daerah-daerah enda me tading kalak Karo (enda me taneh kemulihen kalak Karo sejak ratusen tahun, ula ngenehen garis-garis batas si ban Belanda tahpe diktator Suharto), segi si deban emkap petugas-petugas daerah ijenda la bo kapken kerina kalak Karo bage kape pendudukna multi etnis (kecuali T.Karo). Tapi enda me erbahan meriah janah dinamik tinggi. Kwalitet tantangen ijenda banci ikataken exceptional, ras kerina kelebihen bagepe kekurangenna.

Petugas-petugas legislatif kalak Karo si mewakili daerah, pindah ku pusat perbahan lit daerah, pusat lit perbahan lit daerah (kai si ergelarken ’wakil pusat’ mbue me perspektifna janah lenga dung prosesna ibas kancah reformasi /gerakan demokratisasi ras pergolaken tuntuten otonomi daerah). Emaka labo lit alasen man pemimpin kalak Karo si enggo jadi perwakilenta i pusat, ngukuri Indonesia/ngukuri pusat piah lupa ngukuri taneh kemulihenta. La erbahan kai pe man taneh kemulihenta, enda bali ka nge la erbahan kai pe man Indonesia, ertina kai si ibahanna e kepentingenna sisada me. Kerina suku bangsa ras daerahna – enda me kap Indonesia. Indonesia la lit adi la lit suku bangsa ras daerahna! Ngukuri daerah ras ngukuri Indonesia la banci i pisah-pisah ibas tingkat perkembangen si sangana erdalan gundari, bage ibas segi nasional nari (ethnic revival enggo melanda seluruh jagat, la terkecuali Indonesia), bage ibas segi internasional nari, sebab globalisasi ibas hampir kerina aspek kegeluhen enggo melanda tah pe mulai melanda kerina plosok dunia/daerah janah la mungkin lit daerah si atena maju, terlepas ibas pengaruh enda nari. (bersambung...)

Malem Ukur Ginting.
Göteborg - Swedia, Okt 2000.